HTESALONI
Pê Chyáng Htang Dàm Hun Kat é Laiká
(2 Thessalonians)
1
Ngò Poluq eq Sila, Timohti pé gi, ngá-nhûng é Îwa Garai Gasang eq Yhûmsîng Yesuq Hkrisidùq má nghut nyî bê bang, haû Htesaloni wà mó byu pê é noqkuq hpúng lé dang kyô kat lhê.2 Haû Îwa Garai Gasang eq Yhûmsîng Yesuq Hkrisidùq chyáng mâ é jeju eq nguì ngón hkyô gi, núngmòq chyáng ru joq nyî sháng gàq ô!
Jeju Hkya-ôn É Eq Kyûdûng É Hkyô
3 Gu-mang wuì ê, ngá-mòq gi, hkâ-nhám le, núngmòq é matú Garai Gasang lé jeju hkya-on râ dùt ri; haû gi, gíng lhê; hkâsu mù gâ le, núngmòq é lùmjíng myìt gi, je je kô jàt lo nyì luî, núngmòq yùq hkangmó é chyitdàp myìt le, rayùq eq rayùq é ahtoq má je myô jàt lo nyi é yánmai nghut lhê. 4 Haû mù luî, ngá-mòq gi, núngmòq zing-ri huî é hkyô pé eq wuîhke jamjau huî é hkyô pé bànshoq lé, núngmòq wó jân nyì kô é yánmai, núngmòq é hkam jan hkyô eq lùmjíng hkyô lé, Garai Gasâng é noqkuq hpúng pê é hí má taî nghutbûn nyi lhê.
5 Shí hkyô bànshoq gi, haû Garai Gasang díngmán é dông jéyáng é hkyô lé sàksé tûn shit é nghut lhê; haû mù luî, núngmòq gi, Garai Gasâng é mîngdán é matú wuîhke jamjau hui zo bekô nghut é yánmai, mîngdán haû eq gíngdán é bang gâ é hui kôrâ nghut lhê; 6 Garai Gasang gi, tengmán Sû nghut lhê; haû mù, núngmòq lé jamjau byî é bang lé, Yhang mai jamjau byi râ eq, 7 jamjau huî nyi é bang núngmòq lé le, ngá-mòq lé le lhoqlhut byi râ nghut lhê. Shí hkyô gi, haû Garai Gasang lé a sê é bang eq ngá-nhûng é Yhûmsîng Yesuq eq sêng é gabú danglù lé a gyo a châng é bang lé, jéyáng râ matú, 8 haû Yhûmsîng Yesuq, wum-o a-tsam byíng é Yhâng é maumang lagyô pé eq rahá, myishâm eq mauhkûng mai htoq shit é hkûn, dùt râ nghut lhê. 9 Yesuq jé lé lô mù, Yhâng é chyoiyúng bang má hpungwup shingkang wó yu é eq lùmjíng bang bànshoq mai maú hong é huî é buìnyì má, yhángmòq gi, htên byòq hkyô lé ahtum abyùq jéyáng é hui zo kôrâ nghut lhê. 10 Hau htoq agó, haû Yhûmsing é hí mai le, Yhâng é a-tsam kô lam é mai le, lhoqkâng pyâm é hui kôrâ nghut lhê. Ngá-mòq é sàksé dang lé núngmòq lùmjíng bekô nghut é yánmai, haû lùmjíng bang má núngmòq le lòm bekô nghut lhê.
11 Haû mù luî, ngá-nhûng é Garai Gasang gi, núngmòq lé, Yhang ji yu é hkyô eq gíngdán ri ga râ le, haû Yhâng é wum-o a-tsam mai, núngmòq myìt tô é ge é hkyô hkangmó eq núngmòq é lùmjíng myìt eq sêng é múzó lhumjup lé, lhoqdìk byi sháng gàq nghû le, núngmòq é matú, hkâ-nhám le, ngá-mòq kyûdung byî nyi lhê. 12 Ngá-mòq haû su dung byî nyi é hkyô gi, ngá-nhûng é Garai Gasang eq Yhûmsîng Yesuq Hkrisidùq é jeju yánmai, haû ngá-nhûng é Yhûmsîng Yesuq é myìng gi, núngmòq má hkya-on wàq toq é wó hui mù, núngmòq gi, Yhang má hkya-on wàq toq é wó hui kôrâ matú nghut lhê.