A Târa É Sû
2
Gu-mang wuì ê, haû ngá-nhûng é Yhûmsîng Yesuq Hkrisidùq dum lé râ hkyô, Yhang eq ngá-nhúng rahá zùp nyi to râ hkyô eq séng luî, núngmòq lé ngá-mòq pying kat nau é gi, 2 haû Yhûmsing é buìnyì gi, jé to gù nghut bê gâ é myìqhtoi dang, lùhkyang, laiká pé rajung jung, ngá-mòq chyáng mâ é nghut lhê ga núngmòq chyáng jé é nghut jáng, núngmòq é myìt luì za hkâduî kó, hkâgyùq dàn kó. 3 Hkâsu mù gâ le, haû htên byòq é yhang zo nghut é a târâ Sû htoq shit luî, haû gumlau toq é hkyô hí a htoq htoq gi, buìnyì haû jé râ a nghut, haû mù luî, núngmòq lé, ó yùq èq, hká dông mai mhaú kôlhang hkâjíng kó. 4 Haú yùq gi, Garai ga noqkuq huî é zè lhúnglháng lé htuqhtíng luî, haú pé bànshoq é htoq má yhânggùng yhang lhoqgyaú yû râ nghut lhê; haû mù luî, Garai Gasâng é noqkuq yhûm má zung to luî, yhânggùng yhang Garai Gasang nghut lhê ga taí râ nghut lhê.5 Ngò gi, núngmòq eq rahá nyi tô é hkûn, shí hkyô pé lé lhaq taî kyo kyo kut é hkyô lé, núngmòq a bun lo kó lhú? 6 Haú yùq gi, ahkyíng yàm-yòq jé jáng shèq htoq shit sháng gàq ga, ahkuî, yhang lé hai èq hkûm zing tô é hkyô lé, núngmòq sê lhê. 7 Haû a târa é hkyo é haq htung é a-tsam gi, mû zuî nyì gù nghut bê; nghut kôlhang, haû lé hkûm zing nyì sû gi, huî htòt pyám huî é hkûn jé shoq, haû lé hkûm zing nyì shirâ nghut lhê. 8 Haû huî htòt pyám huî é hkûn, a târâ Sû htoq shit râ nghut lhê; haû Yhûmsîng Yesuq kúm gi, Yhâng nhut mâ é soq èq yhang lé sat pyám râ eq, Yhang gyó lo u lhê é hpungwup mó èq, yhang lé lhoqhtên pyám râ nghut lhê. 9 Haû a târâ Sû lé lo é gi, Tsádán a-tsam dông làklaí alhô agàn pé, alhô agàn pé, maúhpo múzó pé ajung jung kut mhaû é eq, 10 htên byòq huî nyi é bang lé mhaú zo râ agè ashop é hkyô jung hkangmó lé tûn shit râ nghut lhê. Yhángmòq htên byòq é gi, haû tengmán hkyô lé chyitdàp luî hkyi yù hui râ nghut é hkyô lé he-ngìk pyám kô é yánmai nghut ri. 11 Hau é yánmai, Garai Gasang gi, haû tengmán hkyô lé a lùmjíng é za agè ashop hkyô má ô nau é lhúnglhâng bang mara byî é hui kó sháng gàq ga, 12 mhaû é dang lé jíng kôrâ matú, a-tsam mó bo é lum shut râ hkyô lé, yhángmòq chyáng nhâng byi bê nghut ri.
Mhoqshit É Hkyô Má Gîng Nyì Râ Hkyô
13 Nghut kôlhang, haû Yhûmsîng chyitdàp é gu-mang wuì ê, ngá-mòq gi, hkâ-nhám le, núngmòq é matú Garai Gasang lé jeju hkya-on râ dùt ri. Hkâsu mù gâ le, haû So èq lhoq sân-yúng nyi é múzó dông le, tengmán hkyô lé lùmjíng é dông le, hkyi yù hui râ matú, Garai Gasang gi, núngmòq lé, sânghi mai hkyin yù bê nghut ri. 14 Yhang gi, ngá-nhûng é Yhûmsîng Yesuq Hkrisidùq é hpungwup shingkang má, núngmòq wó bo lòm shoq ga, ngá-mòq é gabú danglù dông núngmòq lé shí hkyô má ji yù bê nghut lhê. 15 Haû mù luî, gu-mang wuì ê, nhutdang dông nghut nghut, laiká dông nghut nghut, núngmòq lé ngá-mòq lhai byî é mhoqshit hkyô lé zuî gîng nyì luî, ging ging yàp nyì keq.
16 Yhâng é jeju yánmai, ngá-nhúng lé, ahtum abyùq é myìt wum byi hkyô eq ge é myìt myòqbyù hkyô lé byî é, ngá-nhúng lé chyitdàp é, ngá-nhûng é Îwa Garai Gasang eq ngá-nhûng é Yhûmsîng Yesuq Hkrisidùq gi, 17 núngmòq é i‑myìt má wum byi luî, ge é múzó eq ge é nhutdang lhumjup má, núngmòq lé wum-o lhoqkíng byi sháng gàq ô!