HTESALONI
Pê Chyáng Hî Dàm Hun Kat é Laiká
(1 Thessalonians)
1
Ngò Poluq, Silaa eq Timohti pé gi, Îwa Garai Gasang eq Yhûmsîng Yesuq Hkrisidùq má nghut nyî bê bang, haû Htesaloni wà mó byu pê é noqkuq hpúng lé dang kyô kat lhê. Garaî jeju eq nguì ngón hkyô gi, núngmòq chyáng ru joq nyî sháng gàq.Jeju Hkya-ôn É Hkyô
2 Ngá-mòq gi, hkâ-nhám le, núngmòq bànshoq bâng é matú, Garai Gasang lé jeju hkya-on luî, ngá-mòq é kyûdung dang má núngmòq lé bo dûng lhôm nyi lhê. 3 Núngmòq é lùmjíng myìt mai zui saî é núngmòq é múzó lé le; chyitdàp myìt é yánmai, núngmòq shi-kùt é hkyô lé le; ngá-nhûng é Yhûmsîng Yesuq Hkrisidùq má myìt myòqbyu tô é yánmai, núngmòq hkam jân é hkyô lé le, ngá-nhûng é Îwa Garai Gasâng é hí má, ngá-mòq ru bûn nyi lhê.
4 Garai Gasang chyitdàp é gu-mang wuì ê, Yhang núngmòq lé hkyin yù bê lé, ngá-mòq sê lhê. 5 Hkâsu mù gâ le, ngá-mòq é gabú danglù gi, nhutdang dông za núngmòq chyáng jé é a nghut, wum-o a-tsam dông le, Chyoiyúng Sô dông le, tengmán hkyô byíng jùp é dông le, jé bê nghut é yánmai nghut lhê. Ngá-mòq, núngmòq eq rahá nyi é hkûn, núngmòq é matú hkâsu kut laî lo é hkyô lé, núngmòq sé gû nghut lhê. 6 Núngmòq gi, wuîhke jamjau myo myo hui zo kôlhang, Chyoiyúng Sô byî é gabú myìt mai, danglù haû lé lhom yù kôluî, ngá-mòq lé le, haû Yhûmsîng lé le, alìk kut yu é bang dùt bekô nghut ri. 7 Haû mù, Makedoni mau eq Ahkai-a mau mâ é lùmjíng bang bànshoq é alìk, núngmòq dùt bekô nghut ri. 8 Núngmòq chyáng mai, Makedoni mau eq Ahkai-a mau má, haû Yhûmsing é mungdang hû htoq ló é za a nghut, Garai Gasang má núngmòq lùmjíng é hkyô gi, jowò hkangmó jam ló bê nghut luî, ngá-mòq gi, haî le taí nó a ra lo nghut ri. 9 Hkâsu mù gâ le, ngá-mòq lé núngmòq hká dông lhom hkûlum yu é hkyô lé, yhángmòq yhang, ngá-mòq lé shit kyô akô. Núngmòq gi, hparà lhô pé lé tô pyám luî, Garai Gasang shut hkâsu kut lhing lò mù, rû dui nyi é eq tengmán é Garai Gasang lé dójaú nyi é hkyô lé le; 10 mauhkûng mâ é haû Yhang Zo lé láng nyi é hkyô lé le, yhángmòq taî kyô akô. Yhang zo haû gi, Yhâng èq shi é mai lhoqdui toq yu é hui luî, jé lô râ nhikmó-yo hkyô mai ngá-nhúng lé hkyi yù sû, Yesuq nghut ri.