KOLOSE
Pê Chyáng Hun Kat é Laiká
(Colossians)
1
Garai Gasâng èq hkyin yù mù, Hkrisidùq Yesuq é lagyo dùt sû, ngò Poluq eq ngá-nhûng é gu-mang Timohti gi, 2 Kolose wà mó má nyì bang nghut é, Hkrisidùq má chyoiyúng bang nghut é, lhumzuî é gu-mang wui chyáng dang kyô kat lhê. Ngá-nhûng é Îwa Garai Gasâng chyáng mâ é jeju eq nguì ngón hkyô gi, núngmòq chyáng ru joq nyî sháng gàq.Jeju Hkya-ôn É Eq Kyûdûng É Dang
3 Ngá-mòq gi, núngmòq é matú kyûdung byî é hkûn, ngá-nhûng é Yhûmsîng Yesuq Hkrisidùq é Îwa nghut é Garai Gasang lé ayang jeju hkya-ôn lhê. 4 Haî mù gâ le, Hkrisidùq Yesuq má núngmòq lùmjíng é hkyô eq Yhâng é sân-yúng bang bànshoq lé núngmòq chyitdàp é hkyô lé, ngá-mòq wó gyô é yánmai nghut lhê. 5 Lùmjíng myìt eq chyitdàp myìt haû gi, núngmòq é matú mauhkûng htoq má hkong to byî é myìt myòqbyù hkyôa mai lo é nghut lhê. Myìt myòqbyù hkyô haû lé gi, núngmòq chyáng jé to bê gabú danglù nghut é tengmán mungdang mai, núngmòq wó gyô to gû nghut lhê. 6 Núngmòq gi, gabú danglù haû lé wó gyo luî, Garai Gasâng jeju eq sêng é tengmán hkyô lé sê hkyang é buìnyì mai, núngmòq chyáng ashi zuî é eq kô myhang nyì bê nghut é eq rajung za, gabú danglù haû gi, mingkan gón má ge é ashi zuî nyi é eq kô myhang nyì bê nghut ri. 7 Núngmòq gi, haú hkyô lé, ngá-mòq é chyitdàp byìnzùm Epahpra chyáng mai mhoq yu é nghut lhê. Yhang gi, ngá-mòq é gùnglik dông, Hkrisidùq é lhumzuî é hpúng mû wùn sû nghut lhê. 8 Yhang gi, haû So èq núngmòq lé byî tô é chyitdàp hkyô lé, ngá-mòq lé taî kyo sû le nghut ri.
9 Haû nghut é yánmai, ngá-mòq gi, núngmòq eq sêng é hkyô lé wó gyô é nyí mai, núngmòq é matú ayang kyûdung byî nyi lhê. Garai Gasang ô nau é hkyô lé sé râ hpàqchyî lé, sô eq sêng é hpàqchyî byéng-yá eq sê gyô é u-nuq bànshoq dông mai núngmòq chyáng lhoqpyíng byi sháng gàq nghû, Yhâng chyáng kyûdung byî nyi lhê. 10 Haú su kut kyûdung byî é gi, haû Yhûmsîng ô nau é hkyô eq gíngdán é dông núngmòq chyungxe wó duî luî, hkyô hkangmó má Yhang lé wó gabú nhâng râ matú nghut lhê. Hau dông mai, núngmòq gi, ge é múzó hkangmó má ashi zuî nyì luî, Garai Gasang lé sê é hpàqchyî má kô myhang nyì kôrâ nghut lhê. 11 Hau htoq agó, núngmòq gi, Yhâng é hpungwup a-tsam dông mai a-tsam bànshoq èq wum-o lhoqkíng byî é huî nyì kôrâ nghut lhê. Haû mù, núngmòq gi, gyai hkam jân é hkyô eq myìt hing é hkyô lé, gabú myìt mai wó yû kôrâ nghut lhê. 12 Maubó é mîngdán má, sân-yúng bang eq sêng é muìzè lé wó bo hkam yù râ matú, núngmòq lé gíngdán nhang é sû haû Îwa lé le, jeju wó hkya-on kôrâ nghut lhê. 13 Hkâsu mù gâ le, Îwa haû gi, ngá-nhúng lé, mauchut èq ùp é hkaû mai hkyi htoq yû luî, Yhang chyitdàp é Yhang Zô é mîngdán má shuî hâng é Sû nghut lhê. 14 Ngá-nhúng gi, haû Yhang Zo dông mai, hkyi xe yu é hui mù, yubàk mara hkyut pyám byî é hui bê nghut lhê.
Jung Hkangmó É Ushuq, Hkrisidùq
15 Hkrisidùq gi, myòq èq a byu-myang é Garai Gasâng é gùnghkyâng isâm nghut luî, zo-mún dông hpan tô é lhúnglhâng htoq má gyaú é sû nghut ri. 16 Hkâsu mù gâ le, mauhkûng eq myigùng htoq má jòq é azíng zê pé, myòq èq byu-myang é eq a byu-myang é pé nghut kôle, hkóhkâm ayá pé, a-tsam pé, ùphkâng bang, ahkáng ayá wó bang nghut kôle, lhúnglháng gi, Yhâng èq hpan to huî é chyat nghut lhê. Lhúnglháng gi, Yhâng é matú, Yhâng èq hpan to huî é chyat nghut ri. 17 Yhang gi, lhúnglhâng é hí mâ é nghut mù, lhúnglháng gi, Yhâng é yánmai jòq gîng bum é chyat nghut lhê. 18 Yhang gi, noqkuq hpúng nghu é gùngdû é ulhum nghut ri; Yhang gi, jung hkangmó má gyaú dik é ushuq dùt sháng gàq ga, sânghi awang nghut sû eq shi é bang mâ é hî dui toq é zo-mún dùt sû nghut ri. 19 Hkâsu mù gâ le, Garai Gasang gi, Yhâng é byíng jùp hkyô bànshoq, Yhang Zo má jòq nyì râ lé myìt nguì ô nau é nghut mù, 20 haû tapzîng má htoq byî é Yhang Zô é sui dông mai nguì ngón hkyô kut byî é èq, myigùng htoq mâ é azíng zê nghut nghut, mauhkûng mâ é azíng zê nghut nghut, lhúnglháng lé, Yhang Zo dông mai, Yhang eq nguì ngón yùqyò hkyô xoq yû bê nghut ri.
21 Núngmòq gi, Garai Gasang eq wê gâng é bang dùt wú kôluî, núngmòq é agè ashop nyì yàp sâmlaî é yánmai, núngmòq i‑myìt má, Yhâng é gyè dùt wú bekô nghut lhê. 22 Nghut kôlhang, ahkuî, Garai Gasang gi, núngmòq lé, râ é hkyô a bo é eq mara hûn râ hkyô a bo é za, chyoiyúng é dông Yhâng é hí má shit râ matú, Hkrisidùq é gùngsho gùngdu shî hkâm é dông, núngmòq eq nguì ngón yùqyò hkyô xoq yû bê nghut ri. 23 Haû gi, gabú danglù mai wó yu tô é myòqbyù hkyô mai a htòt byùq é za, kô myhang nyi é eq gingtîng nyì mù, núngmòq é lùmjíng hkyô má xoq nyi nyi é nghut jáng shèq dùt râ nghut lhê. Gabú danglù shî gi, núngmòq wó gyô wú bê nghut é htoq agó, mauhkûng ô má hpan tô é jung hkangmó lé hko kyô nyì bê nghut lhê. Ngò, Poluq le, gabú danglù hau é duìnhâng zoshâng dùt é nghut lhê.
Noqkuq Hpûng É Matú Poluq Wùn Wàq É Hkyô
24 Ahkuî, ngò gi, núngmòq é matú jamjau huî é má gabú lhê; hau htoq agó, Hkrisidùq é gùngdu nghut é, noqkuq hpûng é matú, râ tô ashî nghut é, Yhang hpuzô é hkyô lé, ngá é gùng má ngò lhoq gúmjùp yu nyi lhê. 25 Ngò gi, Garai Gasâng é mungdang lé, núngmòq chyáng gúmjùp shoq hko kyo râ matú, Garai Gasang, ngo lé hun tô é wò mai, noqkuq hpúng hau é mû wùn sû dùt é nghut lhê. 26 Mungdang haû gi, góhkûn mai apyàt pyàt haq tô gyó lo é zaú tô é hkyô nghut kôlhang, ahkuî gi, haû sân-yúng bang lé hpông shit bê nghut ri. 27 Garai Gasang, haû su kut é gi, zaú tô é hkyô hau é agùn agó hpungwup shingkang, tûngbaù pê chyáng hkâsu nghut é hkyô, yhángmòq lé sé nhâng râ matú nghut lhê. Zaú tô é hkyô haû gi, hpungwup shingkang lé myòqbyù é hkyô nghut é, núngmòq má Hkrisidùq dui nyì bê hkyô lé gâ é nghut lhê.
28 Hkrisidùq má gúmjùp é dông, byù yùq hkangmó lé wó shuî jé sháng gàq nghû, ngá-mòq gi, Hkrisidùq é hkyô lé taî pyô luî, yùq hkangmó lé, hpàqchyî byéng-yá bànshoq èq taî pun taî kyîng é eq mhoqshit nyi é nghut lhê. 29 Ngò, haû í yhang wó wùn wàq shi-kùt é gi, ngò má wum-o a-tsam byíng byíng mû zuî nyì Su é wum-o bànshoq èq wùn wàq shi-kùt nyi é ru nghut lhê.