4
Haû mù luî, chyitdàp é luzúm wuî le nghut mù, ngò chyitdàp bûn nghâm nyi é, ngá é gabú jowò eq jánmaú nghut nyi é, ngá é gu-mang wuì ê, haû gi, Yhûmsîng má núngmòq hkâsu kut yàp gîng nyì râ hkyô nghut lhê.Lhoqpun Lhoqkyîng É Hkyô
2 Ngò gi, Uyodi‑a eq Suntuki nhik lé, haû Yhûmsîng má rayùq eq rayùq myìt huî lhûm nyì râ matú, gyai yhang pying kat lhê. 3 Ngá é mû wùn luzúm kyîng ê, ngò gi, myiwe shí nhik lé garúm yû làq nghû, nang lé le dûng tôngbán kat lhê; yhángnhik gi, Kilemen eq le, chyungxe jihpán laiká bùk má myìng bo é, ngá é mû wùn luzúm wuî góbang eq le, haû gabú danglù hkyô má ngò eq rahá gyai shi-kùt wú bê su nhik nghut lhê.
4 Haû Yhûmsîng má hkâ-nhám le gabú nyî keq! Ngò dum taî lhê, gabú nyî keq! 5 Núngmòq nú nhâm é hkyô, byù bànshoq bang lé sé nhâng keq. Haû Yhûmsîng gi, chyáng bê nghut ri. 6 Haî eq séng luî le, myìt hkâ-myo hkâchiq kó; hkyô hkangmó má jeju hkya-on uchyang, kyûdûng é eq dûng tôngbán é dông, núngmòq dûng é hkyô pé lé, Garai Gasâng chyáng shit kyô nyì keq. 7 Haú hkûn, sê hkyang é u-nuq bànshoq htoq má gyaú é, Garai Gasâng é nguì ngón hkyô gi, núngmòq é myìt nhiklhum eq núngmòq myìt é hkyô lé, Hkrisidùq Yesuq má ùpzúng byî nyì râ nghut lhê.
8 Jihtûm má, gu-mang wuì ê, tengmán é, hpautap gíng é, díngmán é, sansêng é, wó chyitdàp é, hkúngga gíng é, haî má nghut kôlhang, xânghpoq nge wó dik é hkyô rajung jung, a nghut jáng, hkya-on gíng é hkyô rajung jung bo é nghut le gi, haû sû é hkyô pé lé myìt nyì keq. 9 Núngmòq gi, ngá chyáng mai wó mhoq hkam yù bê hkyô pé, wó gyo wó myang yù bê hkyô pé, haî lé le châng kut nyî keq. Haú hkûn, nguì ngón hkyô byî é Garai Gasang gi, núngmòq eq rahá nyi nyì râ nghut lhê.
Jeju Bûn É Hkyô
10 Ahkuî kúm gi, ngá é hkyô lé núngmòq dum myìt chiq byi kô é yánmai, ngò gi, haû Yhûmsîng má gyai yhang gabú nyi lhê; gè gè yhang, núngmòq myìt chiq byî nyì kôlhang, haû lé tûn shit râ ahkáng a wó kó nghut ri. 11 Ngò îsu nghû taî nyi é gi, ngò má râ é hkyô bo tô é yánmai taî é a nghut, hkâsu mù gâ le, ngò gi, ngò hui mîhui má, nhik dìk nyì râ matú mhoq yû bê nghut lhê. 12 Râ tô é u lé, hkâsu kut râ ngò sê lhê; agùn agó wó é u lé, hkâsu kut râ ngò sê lhê; hkyô hkangmó eq dùt tô é ahkyô lhum jùp má, wam gyi kôlhang, zò-mut kôlhang, agùn agó wó tô nyì kôlhang, râ to kôlhang, myìt dik nyì râ hpàqchyî lé ngò wó mhoq yû bê nghut lhê. 13 Ngò gi, ngo lé wum-o a-tsam byi sû Hkrisidùq é yánmai, hkyô hkat hkangmó wó kut lhê.
14 Nghut kôlhang, ngò wuîhke jamjau huî nyi é hkûn, núngmòq garúm yû kô é gi, ge é hkyô kut bekô nghut ri. 15 Hau htoq agó, Hpilipi byu pé núngmòq sê é eq rajung za, haû gabú danglù lé, ngò hkô mù núngmòq wó gyô yu hi é buìnyì pé má, ngò Makedoni mau mai htoq ló râ hkûn, haû byî é hkyô eq lhom yu é hkyô má, núngmòq mai lai luî, noqkuq hpúng gótû ralhum lháng, ngo lé garúm kat é hkyô a bo é nghut lhê. 16 Ngò Htesaloni wà mó má nyi tô é hkûn lé lháng, núngmòq gi, ngò râ é hkyô lé adàm dàm hûn byi bekô nghut ri. 17 Ngò gi, chyûnghuq chyûnghtâng lé ho nyi é a nghut, núngmòq mai ashi je myo zuî jàt râ matú lé za shèq ho nyi é nghut lhê. 18 Ngò gi, haî le gúm shoq myang yu é htoq agó, chyân shoq lháng nghut bê. Ahkuî, haû núngmòq hun kat é chyûnghuq lé, Epahprodi chyáng mai ngò lhom myang yù luî, ngò má agùn agó nghut nyî bê. Haú pé gi, namngón jung hkungga su, Garai Gasang lé gabú nhang é, hàp yù gíng é hkungga ralhum nghut ri. 19 Ngá é Garai Gasang gi, Yhang agùn agó wó sùt nyi é eq rajung za, núngmòq râ é hkyô bànshoq lé, Hkrisidùq Yesuq má lhoqgúm lhoqjùp byi râ nghut lhê.
20 Hpungwup shingkang gi, ngá-nhûng é Îwa Garai Gasâng chyáng pyàt dedu ahtum abyùq ru joq nyî sháng gàq ô! Amen.
Shi-kyám Dang
21 Hkrisidùq Yesuq má sân-yúng bê bang bànshoq lé bo shi-kyám byi keq. Ngò eq rahá nyi é gu-mang wuì gi, núngmòq lé shi-kyâm kat akô nghut ri. 22 Sân-yúng bang bànshoq gi, núngmòq lé shi-kyâm kat akô; Kehtaq é yhûm mâ é sân-yúng bang gi, je riyhang shi-kyâm kat akô nghut ri.
23 Yhûmsîng Yesuq Hkrisidùq é jeju gi, núngmòq bànshoq bang eq rahá ru joq nyî sháng gàq ô!