EHPESU
Pê Chyáng Hun Kat é Laiká
(Ephesians)
1
Garai Gasang ô nau é eq rajung za, Hkrisidùq Yesuq é lagyo nghut sû, ngò Poluq gi, Ehpesu wà mó má nyi é, Hkrisidùq Yesuq má lhumzui bang nghut é, haû sân-yúng bâng chyáng nguì ngón dang shit kyô kat lhê.2 Ngá-nhûng é Îwa Garai Gasang eq Yhûmsîng Yesuq Hkrisidùq chyáng mâ é, jeju eq nguì ngón hkyô gi, núngmòq chyáng ru joq nyî sháng gàq ô!
Hkrisidùq Mâ É, Sô Eq Sêng É Shimân Jeju Pé
3 Mauhkûng htoq tsáng myhâng má, so é hkyô eq sêng é shimân jeju jung hkangmó lé, Hkrisidùq má ngá-nhúng lé shimân byi sû, ngá-nhûng é Yhûmsîng Yesuq Hkrisidùq é Yhâng wa, Garai Gasang gi, hkungsô wó nyî sháng gàq. 4 Hkâsu mù gâ le, ngá-nhúng gi, Garai Gasâng é hí má, chyoiyúng é bang eq mara a bo é bang dùt râ matú, Garai Gasang gi, mingkan lé a hpân shi mai, Hkrisidùq Yesuq má ngá-nhúng lé hkyin yu to bê nghut ri. 5 Hau htoq agó, Yhang, ngá-nhúng lé chyitdàp é yánmai, Yhang myìt nguì ô nau é eq rajung za, Yesuq Hkrisidùq mai yhang zô pé kut yù râ matú, hí mai ngá-nhúng lé masàt to bê nghut ri. 6 Haû mù, Yhang chyitdàp é Sûa má, ngá-nhúng lé laí laí byi bê nghut é, hpungwup shingkang bo é jeju chyûnghuq lé, chôm hkya-on sháng. 7 Garai Gasâng é agùn agó é jeju yánmai, ngá-nhúng mara hkyut byî é hui luî, Yhang Zô é sui dông mai, ngá-nhúng gi, Yhang má hkyi yù hkyô wó yu é nghut lhê. 8 Jeju haû lé gi, hpàqchyî byéng-yá eq sê gyô é u-nuq bànshoq le kut, Yhang, ngá-nhúng lé agùn agó byi bê nghut lhê. 9 Garai Gasang gi, Yhang myìt ngui é eq rajung za, Hkrisidùq dông mai kut râ matú hen to bê nghut é, Yhâng é zaú tô é hkyô lé, ngá-nhúng lé shit bê nghut ri. 10 Sê gyo wuî é hkyô haû gi, lhoqdìk râ ahkyíng jé jáng, mauhkûng htoq eq myigùng htoq mâ é lhúnglháng lé, Hkrisidùq má rading ralhum za kut râ nghut é hkyô nghut lhê.
11 Hkrisidùq má sânghi myìt myòqbyù bang nghut é ngá-nhúng gi, Yhâng é hpungwup shingkang lé hkya-on kúngtôn sháng gàq ga, 12 Garai Gasang gi, Yhang myìt sôn tô é lhúnglháng lé ban kut mù, Yhang ô nau é dông, hí mai myìt hpyit to bê eq rajung za, ngá-nhúng lé le, Hkrisidùq má hkyin yu to bê nghut ri. 13 Hau htoq agó, núngmòq le, núngmòq é hkyi yù hkyo é gabú danglù gâ é tengmán mungdang lé wó gyo kô é hkûn, Hkrisidùq eq sêng é bang dùt bekô nghut ri. Núngmòq gi, Hkrisidùq lé lùmjíng bekô nghut é yánmai, haû danghtum htûm tô é Chyoiyúng Sô dizìk htûng tap byî é hui bekô nghut ri. 14 Garai Gasâng é hpungwup shingkang lé hkya-on râ matú, Yhang eq sêng é byu pé hkyi xe yù huî é hkyíng jé shoq, Chyoiyúng Sô haû gi, ngá-nhûng é muìzè lé hkyak wó yû râ nghu é masàt nghut ri.
Poluq Kyûdung Byî É Hkyô
15 Haû mù luî, Yhûmsîng Yesuq lé núngmòq lùmjíng é hkyô eq sân-yúng bang lhúnglháng lé núngmòq chyitdàp é hkyô lé, ngò wó gyô é yánmai, 16 ngò gi, ngá é kyûdung dang má núngmòq lé myìtbun uchyang, a-num yhang, núngmòq é matú jeju hkya-ôn nyi lhê. 17 Ngá-nhûng é Yhûmsîng Yesuq Hkrisidùq é Garai Gasang nghut é, hpungwup shingkang bò sû haû Îwa gi, Yhang lé núngmòq je sé râ matú, hpàqchyî byéng-yá wó byî é eq san za wó sé nhang é Sô, núngmòq lé byi sháng gàq nghû, ngò, Yhâng chyáng dûng nyi lhê. 18 Hau htoq agó, Yhang, núngmòq lé ji yu é myìt myòqbyù hkyô, hkâsû é nghut é lé le, Yhâng é hpungwup shingkang bo é muìzè gi, sân-yúng bâng chyáng agùn agó jòq nyi é hkyô lé le, Yhâng é kô dik é a-tsam mó gi, lùmjíng bang ngá-nhûng é matú nghut é lé le, 19 núngmòq wó sé râ matú, núngmòq é myìt myòqjí lhoqgyeng byî é hui sháng gàq nghû, ngò kyûdung byî nyi lhê. A-tsam mó haû gi, Garai Gasang, Hkrisidùq lé shi é mai lhoqdui toq yû mù, 20 mauhkûng htoq tsáng myhâng má, Yhâng é lòqyò hkyam shut zùng nhang é hkûn, chung é wum-o a-tsam mó eq rajung za nghut ri. 21 Hkrisidùq gi, ùphkang é, ahkáng ayá wó é, a-tsam bo é eq ùp zô é bang bànshoq htoq má le, ahkui pyàt eq htang pyàt má myhîng é myìng lhúnglhâng é htoq má le, je gyaú é sû nghut lhê. 22 Hau htoq agó, Garai Gasang gi, lhúnglháng lé Yhâng é hkyîwa ô má tô to luî, haû noqkuq hpûng é matú, Yhang lé, jung hkangmó é ushuq dùt râ dông masàt to bê nghut ri. 23 Noqkuq hpúng haû gi, Hkrisidùq é gùngdu nghut luî, hkyô hkangmó má jung hkangmó lhoqbyíng jùp é Hkrisidùq byíng nyi é nghut ri.