Lhúnglhâng Bang Lé, Ge É Hkyô Kut Byi Râ Hkyô
6
Gu-mang wuì ê, rayùq yùq gi, mara záng kut shut é nghut jáng, Sô wum-o bò bê bang núngmòq gi, nûm é myìt èq haú yùq lé lhoqpun lhoqkyîng yù keq. Nghut kôlhang, nàng gi, gúnglaú é a hui sháng gàq, sidìq nyì àq. 2 Rayùq eq rayùq é wòlai lé tê byî lhûm nyì keq; haú dông mai, núngmòq gi, Hkrisidùq é târâ lé wó lhoqdìk kôrâ nghut lhê. 3 Rayùq yùq gi, yhûmsing gùng haî le a nghut é wá, ahkyàk su ngam é nghut jáng, haú yùq gi, yhûmsing gùng lé mhaû pyâm é sû nghut ri. 4 Yùq hkangmó gi, yhûmsîng nyì yàp é hkyô lé taû myìt wú keq; haú hkûn, yhûmsing gùng lé góbang eq whuí nó a râ é za, yhûmsing gùng má xânghpoq nge wó râ nghut lhê. 5 Hkâsu mù gâ le, yùq hkangmó gi, ó le ô wò lé wùn wàq ra râ dùt lhê.6 Haû mungdang lé mhoq yu é sû gi, mhoqshit byi sû lé, ge é zè bànshoq gàm byi sháng gàq.
7 Garai Gasang lé gi, wó rhoî râ a nghut, yhûmsing gùng yhûmsîng mhaú zô é hkâhui nhâng kó; byù gi, hô kat é eq rajung za, shû yù râ nghut lhê. 8 Haû yhûmsing é yubàk gùngsho lé lhoqngón râ matú hô kat é sû gi, myìt haû mai htên byòq é hkyô lé myang hkam yù râ nghut lhê; haû Sô lé lhoqngón râ matú hô kat é sû kúm gi, Sô haû mai ahtum abyùq é chyungxe lé myang hkam yù râ nghut lhê. 9 Ngá-nhúng gi, ge é hkyô kut é má ngú byùq é bang a dùt sháng gàq, hkâsu mù gâ le, haû lé ngá-nhúng a tô pyâm é nghut jáng, ahkyíng yàm-yòq jé é hkûn, ngá-nhúng gi, a-kyû myang hkam yù râ nghut lhê. 10 Haû mù luî, ngá-nhúng gi, kut râ ahkyíng wó tô é u lé, byù lhúnglhâng bang lé ge é hkyô kut byi sháng, haû lùmjíng hkyô eq sêng é i-kun byu pé lé, je riyhang kut byi sháng.
Ahpyo-kuq Hpyit É Hkyô A Nghut É Za, Byù Sik Hpân Huî É Hkyô
11 Ngò, núngmòq lé, ngá é lòq èq hkâ-í kô é laiká cham kâ kat byî é lé, wú wú keq!
12 Ahtoq pyâm za ge é hkyô lé kut shit nau é bang gi, ahpyo-kuq hpyit kó sháng gàq ga, núngmòq lé zìk shi-kùt nyi é bang nghut akô; yhángmòq haû su kut é hkyô gi, Hkrisidùq é tapzing é yánmai zing-ri huî é hkyô lé, koi pyám râ matú za nghut ri. 13 Hkâsu mù gâ le, haû ahpyo-kuq hpyit é bang lháng jep é târâ lé a cháng kó nghut ri; nghut kôlhang, yhángmòq gi, núngmòq é gùngsho eq séng luî wó taî nghutbun kó sháng gàq ga, núngmòq lé ahpyo-kuq hpyit nhâng nau akô nghut ri. 14 Ngò kúm gi, ngá-nhûng é Yhûmsîng Yesuq Hkrisidùq é tapzîng eq séng luî taî nghutbûn é mai lai luî, haî má le a taî nghutbun sháng gàq; Yhâng é yánmai, mingkan gi, ngá é matú jén sat é hui bê; ngò gi, mingkân é matú jén sat é hui bê nghut lhê. 15 Ahpyo-kuq hpyit é nghut nghut, ahpyo-kuq a hpyit é nghut nghut, hai a-kyû a bò; byù sik hpân huî é hkyô za shèq, ahkyàk é nghut lhê. 16 Târâ haû lé châng é lhúnglháng bâng é ahtoq má le, haû Garai Gasâng é Isira-elaq byu pêa é ahtoq má le, nguì ngón hkyô eq shogyo nhikmyin hkyô gi, ru joq nyî sháng gàq ô.
17 Ahkuî mai gi, ó yùq le ngo lé jamjau a lhoqhtoq byi lo sháng gàq; hkâsu mù gâ le, ngò gi, Hkrisidùq é duìnhâng zoshâng nghut é sàksé dàmhkô lé wun wún lhê.
18 Gu-mang wuì ê, ngá-nhûng é Yhûmsîng Yesuq Hkrisidùq é jeju gi, núngmòq é sô eq ru joq nyî sháng gàq ô! Amen.