KORINHTUQ
Pê Chyáng Htang Dàm Hun Kat é Laiká
(2 Corinthians)
1
Garai Gasang ô nau é eq rajung za, Hkrisidùq Yesuq é lagyo rayùq dùt sû ngò Poluq gi, ngá-nhûng é gu-mang Timohti le kut, Korinhtuq wà mó mâ é, Garai Gasâng é noqkuq hpúng lé le, Ahkai-a mau gón mâ é sân-yúng bang bànshoq chyáng le, dang kyô kat lhê: 2 Ngá-nhûng é Îwa nghut é Garai Gasang eq haû Yhûmsîng Yesuq Hkrisidùq chyáng mâ é jeju eq nguì ngón hkyô gi, núngmòq chyáng ru joq nyî sháng gàq.Nhiktíng hkyô bànshoq é Garai Gasang
3 Ngá-nhûng é Yhûmsîng Yesuq Hkrisidùq é Yhâng wa eq Garai Gasang, shogyo nhikmyin hkyo é Îwa eq nhiktíng hkyô bànshoq é Garai Gasang gi, hkya-on kúngton é huî nyì sháng gàq. 4 Garai Gasâng chyáng mai ngá-mòq wó yû bê nghut é nhiktíng hkyo èq, hkâsû é wuîhke hkyô hui bang lé le ngá-nhúng wó nhiktíng byi sháng gàq ga, Yhang gi, ngá-mòq é wuîhke hkyô bànshoq má nhiktíng byî ri. 5 Hkâsu mù gâ le, Hkrisidùq hui zô é jamjau hkyô myo myo lé ngá-mòq bo hui zô é su, Hkrisidùq dông mai, ngá-mòq é nhiktíng hkyô le byíng mui nyi é nghut lhê. 6 Ngá-mòq, myìt myo myìt chiq é huî é nghut jáng, núngmòq é nhiktíng hkyô eq hkyi yù hkyo é matú nghut nyi ri; ngá-mòq, nhiktîng é huî é nghut jáng, núngmòq é nhiktíng hkyo é matú nghut luî, haû gi, ngá-mòq jamjaû é eq rajung za nghut é jamjau hkyô lé, myìt hing é dông mai wó jân pyám râ a-tsam, núngmòq chyáng lhoqhtoq byî é nghut lhê. 7 Haû mù, ngá-mòq é jamjau hkyô pé má núngmòq bo lòm bekô nghut é su, ngá-mòq é nhiktíng hkyô má le núngmòq bo lòm bekô nghut é hkyô lé, ngá-mòq sê é yánmai, núngmòq lé ngá-mòq myìt myòqbyu kat é hkyô gi, hkyak wó lum to bê nghut lhê.
8 Gu-mang wuì ê, Asi-a mau má, wuîhke jamjaû é ngá-mòq gyai yhang hui zô é hkyô lé, ngá-mòq gi, núngmòq lé kyô kat nau ri. Ngá-mòq wó jân é a-tsam lháng htum shoq hpuzô é nghut luî, ngá-mòq gi, chyungxe duì lo râ lháng a myìt myòqbyù lô é nghut lhê. 9 Gè gè yhang, ngá-mòq gi, sat hui berâ nghû, ngá-mòq é i‑myìt má lùmjíng pyâm é nghut lhê. Nghut kôlhang, haû gi, ngá-mòq gùng ngá-mòq a lùmhkau é za, shî bê bang lé lhoqdui toq sû Garai Gasang lé lùmhkaû râ matú dùt é nghut lhê. 10 Garai Gasang gi, haû sû é shî râ hkyô mai hkyi yù bê nghut mù, ngá-mòq lé hkyi yù râ za nghut lhê. Yhang gi, ngá-mòq é matú núngmòq kyûdung byî nyi é u má, xoq luî ngá-mòq lé hkyi yù râ za nghut lhê nghû, ngá-mòq gi, Yhang lé myìt myòqbyu to bê nghut luî, 11 myo myo kyûdung byî é lé gyo byî é má ngá-mòq shimân jeju wó mù, byù myo myo gi, ngá-mòq wó é shimân jejû é yánmai Garai Gasang lé jeju hkya-on kôrâ nghut lhê.
Poluq, Hen Tô É Múzó Htaî Pyâm É Lé Taî Hung É Hkyô
12 Ngá-mòq nghutbûn é gi, Garai Gasâng chyáng mâ é chyoiyúng hkyô eq lhumzui hkyô má, mingkan zo wuî eq ngá-mòq chyungxe duì bê hkyô lé le, je luî núngmòq eq zùm yàp é hkyô lé le, ngá-mòq é myìt sôn sê é hkyo èq, sàksé hkám byî é hkyô nghut lhê. Ngá-mòq haû su kut é gi, mingkan hpàqchyî byéng-yá dông mai kut é a nghut é za, Garai Gasâng é jeju dông mai kut é ru nghut lhê. 13 Hkâsu mù gâ le, ngá-mòq gi, núngmòq a dàt nghap é eq a sê gyô é haî le a ká byî kat é nghut lhê. Ngò, myìt myòqbyu kat é gi, 14 núngmòq gi, ngá-mòq é hkyô ra-am lé wó sê gyô yù bê eq rajung za, haû Yhûmsîng Yesuq é buìnyì má núngmòq é hkyô lé ngá-mòq nghutbun râ nghut é su, ngá-mòq é hkyô lé núngmòq wó nghutbun râ matú, núngmòq, bànshoq lé sê gyo kôrâ nghut lhê.
15 Haú hkyô lé, ngò hkyak myìt lum to bê nghut é yánmai, núngmòq gi, a-kyû í dâm wó hkam yù kó sháng gàq nghû, ngò gi, núngmòq chyáng hí lé kum râ matú hen to bê nghut lhê. 16 Ngò gi, Makedoni mau shut e ló é hkyôwuì má núngmòq lé hí lé kum mù, Makedoni mau mai núngmòq chyáng dum taû lò luî, Yuda mau shut e é hkyôwuì má, núngmòq, ngo lé garúm kat kôrâ lé myìt lum to bê nghut lhê. 17 Ngò gi, haú hkyô hen é hkûn, agon za hen hkyut é nghut lhê lhú? Haû a nghut jáng, ngò hen é pé gi, ra-u má za, “Nghut lhê, nghut lhê.” nghu é eq, “A nghut, a nghut.” nghu é wó taí râ matú, mingkan myìt dông hen é nghut lhê lhú?
18 Gè gè yhang, Garai Gasang gi, lhumzui sû yhang nghut é eq rajung za, ngá-mòq é danglù gi, núngmòq chyáng “Nghut lhê” lé, “A nghut” nghu é a nghut. 19 Hkâsu mù gâ le, ngo èq le, Sila èq le, Timohti èq le, núngmòq chyáng hko kyo bê nghut é sû, Garai Gasâng é Yhangzo Yesuq Hkrisidùq gi, “Nghut lhê” nghu é eq “A nghut” nghu é sû a nghut é za, Yhang má gi, hkâ-nhám le “Nghut lhê” nghu é za jòq lhê. 20 Hkâsu mù gâ le, Garai Gasang gi, danghtum hkâ-myhó htûm to kôle, haú pé gi, Hkrisidùq má “Nghut lhê” chyat nghut lhê. Haû mù, Garai Gasâng é hpungwup shingkâng é matú, Yhâng dông mai, ngá-nhúng gi, “Amen” nghû taî é nghut lhê. 21 Ngá-mòq eq núngmòq lé Hkrisidùq má yàp gingtíng nhang é sû gi, Garai Gasang nghut ri. Yhang gi, ngá-nhúng lé masàt é xû bùt byi mù, 22 Yhang sing lhê gâ é dizìk, ngá-nhúng lé htûng tap byi luî, jé lô râ hkyô pé hkyak jòq lhê nghu é masàt zè dông, Yhâng é Sô lé ngá-nhûng é i‑myìt ûnghkaû má kat byi bê nghut ri.
23 Ngò gi, núngmòq hkyâmsa râ matú, Korinhtuq wà mó má a dum taû lé é hkyô têng é lé, ngá é sàksé dùt râ dông Garai Gasang lé wùt dûng lhê. 24 Haû gi, núngmòq é lùmjíng hkyô lé ngá-mòq sing pyám byî é a nghut é za, núngmòq é gabú hkyo é matú, núngmòq eq rahá chôm zui saî é ru nghut lhê; haî mù gâ le, lùmjíng myìt mai za núngmòq wó yàp gîng nyi bùm kô é ru nghut lhê.