GALATIQ
Mau Bâng Chyáng Hun Kat é Laiká
(Galatians)
1
Byu pê chyáng mai le a nghut, ó yùq èq nhang é le a nghut é za, haû Yesuq Hkrisidùq lé shî bê mai dum lhoqdui toq yu é sû Îwa Garai Gasang eq Yesuq Hkrisidùq chyáng mai nhang kat é lagyo rayùq nghut sû, ngò Poluq gi, 2 ngò eq rahá nyi é gu-mang wuì bànshoq bang le mù, Galatiq mau mâ é noqkuq hpûng pê chyáng dang kyô kat lhê.3 Ngá-nhûng é Îwa Garai Gasang eq Yhûmsîng Yesuq Hkrisidùq chyáng mâ é, jeju eq nguì ngón hkyô gi, núngmòq chyáng ru joq nyî sháng gàq ô! 4 Haû Hkrisidùq gi, ngá-nhûng é Îwa Garai Gasang ô nau é eq rajung za, agè ashop é i-pyàt shî mai, ngá-nhúng lé xe yù râ ga, ngá-nhûng é yubàk marâ é matú yhâng gùng lé Yhang byî pyám bê nghut ri. 5 Haû hpungwup shingkang gi, Garai Gasâng chyáng pyàt dedu ahtum abyùq ru joq nyî sháng gàq ô. Amen.
Gótû Gabú Danglù A Jòq É Hkyô
6 Ngò gi, haû Hkrisidùq é jeju mai núngmòq lé ji yù Sû lé, núngmòq haû í han kâng pyâm to kôluî, shai é gabú danglù shut lhing ló nyî kô é hkyô lé, gyai yhang maú nyi ri. 7 Danglù haû gi, gabú danglù ra-tsuí lháng a nghut. Byù ra-am mai núngmòq lé lhoqshuk byi luî, haû Hkrisidùq é gabú danglù lé, shi-kùt luî lhoqshai nhang pyâm nyì kô é hkyô za nghut lhê. 8 Nghut kôlhang, núngmòq lé ngá-mòq hko kyo bê gabú danglù mai lai luî, ngá-mòq nghut nghut, mauhkûng htoq mâ é maumang lagyo rayùq nghut nghut, shai é gabú danglù, núngmòq lé hko kyô é nghut jáng, haú yùq gi, ahtum abyùq dam byî é hui zo sháng gàq ô! 9 Ngá-mòq taî wú bê eq rajung za, ahkuî le, ngò dum taí kôlé: rayùq yùq mai, núngmòq hàp yu to bê é gabú danglù mai lai luî, gótû hko nyi é nghut jáng, haú yùq gi, ahtum abyùq dam byî é hui zo sháng gàq ô!
10 Haû su nghû taî é gi, ahkuî, ngò, byu é hí má myòqdong wó râ matú shi-kùt nyi é nghut lhê lhú? Haû a nghut jáng, Garai Gasâng é hí má myòqdong wó râ matú shi-kùt nyi é nghut lhê lhú? Byù lé gabú nhâng râ matú, ngò shi-kùt nyi é nghut lhê lhú? Ngò gi, byu pé lé za ru gabú nhâng nau nyi é nghut le gi, Hkrisidùq é duìnhâng zoshâng dùt râ a nghut.
Poluq Lé, Garai Gasang Ji Yu É Hkyô
11 Gu-mang wuì ê, ngò hko kyô é gabú danglù haû gi, byu èq kut htoq é hkyô a nghut é lé, ngò, núngmòq lé sé nhâng nau ri. 12 Ngò gi, haû lé, byu chyáng mai wó yu é le a nghut, góyùq èq mhoq byî é le a nghut é za, Yesuq Hkrisidùq èq shing-rán byî é dông wó hàp yu é ru nghut lhê.
13 Ngò, Yudaq noqkuq htûng má nghut nyi ashî hkûn, Garai Gasâng é noqkuq hpúng lé ladu lai shoq hkâsu kut zing-ri luî, haû lé lhoqhtên shi-kùt wún é, ngá é hí hpyang lhê é chyungxe duì hkyô lé, núngmòq wó gyô wú bekô râ nghut lhê. 14 Ngò gi, ngò eq ra-kyám zâ é Yudaq byu pé myo myô é htoq má, Yudaq noqkuq htûng lé je cháng sû nghut é htoq agó, ngá é îchyí îwâ pê é htûngli lé ladu lai shoq myìt zìng zùq sû nghut lhê. 15 Nghut kôlhang, ngá nû é ûnghkaû mai yhang hkyin to luî, Yhâng é jeju yánmai ngo lé ji yu é Garai Gasang gi, 16 haû Yhang Zô é hkyô gabú danglù lé, ngò mai tûngbaù pê chyáng hko kyo sháng gàq ga, Yhang Zo lé ngá chyáng htoq shit nhâng râ matú myìt hpyit yu é hkûn, ngò gi, ó yùq eq le a hpyê yù, 17 Yerusalem wà mó má dòq ló luî, ngá hí má lagyo kut é bang lé le a ló huî é za, radá dâm Arabi-a mau shut ê luî, Damasikuq wà mó má dum taû ló bê nghut lhê.
18 Sum zân laî é htâng má, ngò gi, Yerusalem wà mó má dòq ló mù, Petiruqa lé ló hui luî, yhang eq raxe ngo nyí, ló nyi nyi é nghut lhê. 19 Haú má, Yhûmsing é yhang gu Yakuq mai lai luî, lagyo góbang lé ngò a myàng nghut ri. 20 Núngmòq lé ngò ká byî kat é má, mhaû é hkyô a bò nghû luî, Garai Gasâng hí má, hkyak, ngò taî lhê. 21 Hau htâng má, ngò gi, Suriq mau eq Kiliki mau má ê jé é nghut lhê. 22 Haú hkûn, haû Hkrisidùq má nghut é, Yuda mau mâ é noqkuq hpúng byû wuì gi, ngo lé myòqno a shú kó nghut ri. 23 Yhángmòq gi, “Hí hkûn, ngá-nhúng lé zing-ri sû gi, yhang mai lhoqhten râ matú radàm shi-kùt wú é lùmjíng hkyô haû lé, ahkuî hko nyi ri.” gâ é hkyanglù lé wó gyô wú kôluî za, 24 ngá é yánmai, Garai Gasang lé hkya-ôn bum akô nghut ri.