Ló Htáng Má Sidìq Byî É Dang Pé
13
Ahkuî, ngò, núngmòq chyáng lé kum râ gi, sum lhîng nghû râ dàm nghut lhê. Haû gi, “Mara hun é hkyô hkangmó lé, sàksé í yùq sum yuq èq lhoqteng ra râ nghut lhê.”a ga kâ tô é eq rajung za nghut lhê. 2 Ngò gi, í lhîng nghû râ dàm núngmòq eq rahá nyi é hkûn, núngmòq lé sidìq byî to gû nghut lhê. Ahkuî le, núngmòq eq wê gâng tô é u lé, dum taí kôlé, ngò dum jé lé é hkûn, noq mai mara shut tô é bang lé nghut nghut, góbang ó yùq lé nghut nghut, hkyâmsa a byi lo râ nghut lhê. 3 Haû gi, ngò dông mai Hkrisidùq dang taî nyi é hkyô sàksé shit râ lé, núngmòq dûng nyì kômù nghut lhê. Yhang gi, núngmòq é hkyô lé hkâsu kut shuî-û é hkyô má wum nyhôm é a nghut, núngmòq chyáng a-tsam mó shit sû shèq ru nghut ri. 4 Hkâsu mù gâ le, Yhang gi, wum nyhôm é má jén sat é hui bê nghut kôlhang, Garai Gasâng é a-tsâm èq dui nyi é gi, hkyak têng lhê. Haû eq rajung za, ngá-mòq gi, Yhang su wum nyhóm kôlhang, núngmòq lé dójaú râ matú, Garai Gasâng é a-tsâm èq, Yhang eq rahá dui nyì râ nghut lhê.5 Núngmòq gi, lùmjíng hkyô má nghut nyi lhê lùq, yhûmsing gùng yhûmsîng myî wú keq. Yhûmsing gùng yhûmsîng chyam wú keq. Núngmòq gi, chyam é má sûm byùq é za a nghut jáng, núngmòq chyáng Hkrisidùq Yesuq lúng nyî bê hkyô lé sé kôrâ nghut lhê. 6 Ngá-mòq gi, chyam é má a sûm é hkyô lé, núngmòq wó sé kôrâ nghut lhê nghû, ngò hkyak lum tô lhê. 7 Ahkuî, ngá-mòq gi, núngmòq shut é hkyô haî a kut kôrâ matú, Garai Gasâng chyáng kyûdung byî lhê. Haû gi, ngá-mòq chyâm hui luî wó lùt é hkyô lé byu pé myàng kôrâ matú a nghut é za, ngá-mòq sûm é su dùt kôlhang, núngmòq ge é hkyô kut kôrâ lé myàng râ matú nghut lhê. 8 Hkâsu mù gâ le, ngá-mòq gi, haû tengmán hkyô eq shai é dông haî le a ge kut é za, tengmán hkyo é matú za kut râ dùt é nghut lhê. 9 Ngá-mòq wum nyhóm kôlhang, núngmòq wúm bo é hkûn, ngá-mòq gabú é nghut lhê; ngá-mòq kyûdûng é gi, núngmòq gúmjùp râ matú nghut lhê. 10 Ngò gi, wê gâng tô é hkûn, haú hkyô pé lé haî mù kâ é gâ le, ngò jé lé é hkûn, ahkáng ayá lé ngò chung é má htân htân a kut râ matú nghut lhê. Ahkáng ayá haû gi, núngmòq lé lhoqhtên pyám râ matú a nghut, núngmòq lé kô myhang lò nhâng râ matú, haû Yhûmsîng ngo lé byî é shèq ru nghut lhê.
Ló Htâng É Shi-kyám Dang
11 Ló htáng má ngò taí nau é gi, gu-mang wuì ê, nguì ngón yùqyo nyì keq. Gúmjùp hkyô shut sô nyì keq, ngò dûng tôngbán é dang lé gyo keq, myìt rahkat za dùt nyì keq, nguì ngón shoq chyungxe dui nyì keq. Haú hkûn, chyitdàp hkyô eq nguì ngón hkyo é Garai Gasang gi, núngmòq eq rahá nyi nyì râ nghut lhê.
12 Chyoiyúng é bo-puq puq é èq, rayùq eq rayùq shi-kyâm lhum keq. 13 Sân-yúng bang bànshoq gi, núngmòq lé shi-kyâm kat akô.
14 Haû Yhûmsîng Yesuq Hkrisidùq é jeju, Garai Gasâng é chyitdàp myìt eq Chyoiyúng So é zùm yàp hkyô gi, núngmòq bànshoq bâng chyáng ru joq nyî sháng gàq ô.