Poluq É Myòqwùp Shing-rán Pé
12
Ngò gi, rû taî nghutbûn nyì râ za nghut lhê. A-kyû wó râ a nghut kôlhang, haû Yhûmsing chyáng mai lo é myòqwùp shing-rán pé eq hpông shit é shing-rán pé lé taî nghutbun râ nghut lhê. 2 Ngò gi, laî lò bê raxe myi zân hkûn, mauhkûng sum tsáng nghu é má shuî toq yû huî é, Hkrisidùq mâ é byù rayùqa é hkyô lé sê lhê. Yhang gi, gùngdu eq nghut é lùq, a nghut é lùq, ngò a sé, nghut kôlhang, Garai Gasang gi, sê lhê. 3 Yhang hparadisu má shuî toq yû huî é gi, ngò sê lhê. Yhang gi, gùngdu eq nghut lhê lùq, a nghut é lùq, ngò a sé, nghut kôlhang, Garai Gasang gi, sê lhê. 4 Yhang gi, byu pé taî kyô htoq râ ahkáng a wó é hkyô pé nghut é, a wó taî sân kyô é hkyô pé lé wó gyô ri. 5 Ngò gi, haú yùq sû é byu é hkyô eq séng luî taî nghutbun râ nghut lhê; nghut kôlhang, ngò gi, ngá é wum nyhóm hkyô eq séng luî, taî nghutbûn é mai lai luî, ngá gûng ngò taî nghutbun râ a nghut. 6 Ngò gi, taî nghutbûn é hkyô lé hkyin yù râ dùt é nghut jáng lháng, byù gò dùt râ a nghut, haî mù gâ le, ngò gi, tengmán hkyô taî nyì râ nghut lhê. Nghut kôlhang, ó yùq le, ngò kut é eq ngò taî é mai myìt lum to kô é htoq má, ngo lé, je a myìt lo kó sháng gàq nghû, ngò a taî nghutbun kut pyâm nyi lhê.7 Haû làklaí dik é dông ngo lé hpông shit é shing-rán mó pê é yánmai, ngò a nghutbûn byùq sháng gàq ga, ngo lé gunjang râ matú, Tsádán é lagyo nghut é zu lé, ngá é gùngsho má kat byî to bê nghut ri. 8 Haú lé ngá chyáng mai yu pyám byi râ matú, ngò, Yhûmsîng lé sum dâm dûng tôngbán wú bê nghut lhê. 9 Nghut kôlhang, Yhang gi, “Ngá é jeju gi, náng é matú lùqdun é nghut lhê; hkâsu mù gâ le, Ngá é a-tsam gi, wum nyhôm é hkyô má lhoq gúmjùp é hui ri.” ga luî, ngo lé taî ri. Haû mù luî, Hkrisidùq é a-tsam gi, ngò má wó jòq nyì sháng gàq nghû, ngò gi, ngá é wum nyhôm é hkyô pé eq séng luî, gabú myìt mai je riyhang taî nghutbun râ nghut lhê. 10 Haû nghut mù luî, ngò gi, Hkrisidùq é yánmai, wum nyhôm é hkyô pé má le, rhoî huî é hkyô pé má le, wuîhke jamjau huî é hkyô pé má le, zing-ri huî é hkyô pé má le, awui ahke dùt é hkyô pé má le, gabú nhik dìk nyi lhê. Hkâsu mù gâ le, ngò wum nyhôm é hkûn shèq, ngò wúm bo é nghut lhê.
Poluq Chiq Byî É Hkyô
11 Ngò gi, ngá gûng ngò byù gò lhoqkut yû bê nghut lhê; nghut kôlhang, haû gi, núngmòq kut nhang é nghut lhê. Ngò gi, núngmòq èq owaq é hui ang sû nghut lhê; hkâsu mù gâ le, ngò gi, haî a nghut kôlhang, “Ahkyàk lagyô pé” ga bâng é htoq má ra-tsuí lháng gyàmgyì gyó sû a nghut. 12 Lagyo rayùq é masàt alhô agàn nghut é, alhô agàn pé, maúhpo múzó pé eq làklaí alhô agàn pé lé, ngò gi, gyai yhang hkam jan mù núngmòq chyáng kut bê nghut lhê. 13 Ngò gi, núngmòq é matú, hkâ-nhám le wòlai a dùt é nhîng, núngmòq gi, hkâsu mù, gótû noqkuq hpûng pé htoq má gyàmgyì gyó nyi akô lhú? Ngò, haú hkyô má shut é nghut jáng, mara hkyut pyám byi kó laq!
14 Ahkuî, ngò gi, núngmòq lé, sum lhîng nghû râ dàm, lé kum râ rì rì nghut to bê mù, núngmòq é matú wòlai gi, a dùt râ nghut lhê. Haî mù gâ le, ngò gi, núngmòq é sùtzè lé ô nau é a nghut, núngmòq lé shèq ru nghut lhê. Hká dông nghut kôle, zo wuî gi, mó wui é matú sùtzè hkong to byi râ dùt é a nghut, mó wuî shèq, zô wui é matú hkong to byi râ dùt é nghut lhê. 15 Haû mù luî, ngò gi, gyai yhang gabú é myìt mai, ngò wó é jung hkangmó lé núngmòq é matú chung jaì râ nghut mù, ngá gûng lé lháng chung jaì râ nghut lhê. Ngò, núngmòq lé myô chyitdàp é yánmai, núngmòq gi, ngo lé shaû chyitdàp kôrâ lhú? 16 Ngò gi, núngmòq chyáng wòlai a dùt é hkyô têng lhê. Nghut kôlhang, ngò gi, hpàqchyî haq da sû dùt mù, mhaû lhik é dông núngmòq lé chyup yû sû dùt byùq bê ga núngmòq ra-am myìt akô myhî-nhung! 17 Ngò gi, núngmòq chyáng nhang kat byî é byù dông, núngmòq chyáng a-myàt kut zô yù bê nghut lhê lhú? 18 Ngò gi, Tituq lé núngmòq chyáng lé râ matú wum taî tsuq mù, ngá-mòq é gu-mang lé, yhang eq rahá nhang kat bê nghut lhê. Tituq gi, núngmòq chyáng a-myàt kut zô é nghut lhê lhú? Ngá-nhik gi, rajung zâ é myìt dông chyat kut mù, rajung zâ é hkyô lé chyat châng é su nhik nghut lhê, a nghut kó lhú?
19 Ngá-mòq gi, núngmòq hí má ngá-mòq gùng ngá-mòq taî hung yu nyi ri nghû, ahkuî jé shoq myìt nyi akô lhú? Ngá-mòq gi, Hkrisidùq mâ é byu pé dông, Garai Gasâng hí má taî nyi é nghut lhê. Chyitdàp é gu-mang wuì ê, ngá-mòq kut é jung hkangmó gi, núngmòq é a-kyu matú chyat nghut lhê. 20 Hkâsu mù gâ le, ngò lé jé é hkûn, ngò, núngmòq lé dùt nhâng nau é su, núngmòq a wó dùt kôrâ eq, núngmòq, ngo lé dùt nhâng nau é su, ngò a wó dùt râ lé, ngò myìt gyùq ri. Ngò gi, mabyòq jishûm htoq é, mânon é, nhik‑ûm bùq é, byù hpûng gam é, gànsang é, lùmu é, gyai nghutbûn é eq a-tau ahû dùt é hkyô pé jòq râ lé gyùq ri. 21 Ngò dum lé jé é hkûn, ngá é Garai Gasang gi, núngmòq é hí má ngo lé myìt nyhûm nhâng mù, yhángmòq ô nau é myìt châng é má shut é dông nyì zô lhúm nau é i‑myìt, gùngsho zùm yàp é yubàk mara eq a sân-yúng é hkyô kut shut é mai myìt a lhîng bang myo myô é yánmai, yón kuq é hui zo râ lé, ngò myìt chiq ri.