Lagyo A-pyoq Pé Eq Poluq
11
Ngò gi, ngá é ra-tsuí ngòk é dang lé, núngmòq jân pyám byi râ lé myòqbyu é nghut lhê; gè gè yhang, núngmòq gi, haû su kut nyî gù nghut bekô. 2 Haî mù gâ le, ngò gi, Garai Gasang mai núngmòq lé mâgum é myìt èq, núngmòq é matú magûm byî lhê. Ngò gi, núngmòq lé, sân-yúng é zo-myi gyíng lé su, Hkrisidùq chyáng wó shit sháng gàq nghû, Hkrisidùq nghut é yhûmsîng hpô chyáng za núngmòq lé byi zo râ nghû, danghtum htûm to bê nghut lhê. 3 Nghut kôlhang, Ewaq gi, lhângmuì mó hpàqchyî haq htung é èq mhaú zo huî é su, núngmòq myìt é hkyô pé gi, Hkrisidùq chyáng núngmòq é lhumzuî é eq sansêng é i‑myìt àp nhong é hkyô mai shuî nghoq ló byùq é hui râ lé, ngò myìt chiq ri. 4 Hkâsu mù gâ le, rayùq yùq gi, núngmòq chyáng lé jé mù, ngá-mòq hko kyô é Yesuq é hkyô eq shai é dông hko kyô é nghut nghut, núngmòq hàp yu to bê Sô eq a pung é sô lé núngmòq hàp yu é nghut nghut, núngmòq lhom yu to bê gabú danglù eq a pung é danglù lé lhom yu é nghut nghut, núngmòq gi, haú lé luì luì za lhom hàp yu é dùt bekô nghut ri. 5 Nghut kôlhang, ngò gi, “Ahkyàk-lagyô pé” ga bâng é htoq má ra-tsuí lháng gyàmgyì gyó sû a nghut nghû myìt ngam é nghut lhê. 6 Ngò gi, dang taí hpàqchyî kung sû rayùq a nghut kôlhang, sumsé hpàqchyî bò sû nghut lhê. Ngá-mòq gi, hkyô hkangmó má, núngmòq lé haú hkyô hkyâng shoq sé nhâng bê nghut lhê.7 Ngò, núngmòq lé, Garai Gasâng é gabú danglù lé ahpau a yu é za hko kyô é dông, núngmòq lé wàq toq râ matú, ngá gùng ngò lhoqnyhum é gi, ngá é mara dùt byùq bê lhú? 8 Ngò, núngmòq lé dójaú râ matú, gótû noqkuq hpûng pé mai htuqbáng é lé hàp yu é gi, haú bâng chyáng mai ngò zìk lú yu é dông dùt bê nghut lhê. 9 Ngò gi, núngmòq eq rahá nyì mù, rajung jung râ é hkûn, ó yùq lé le wòlai a dùt nhang é nghut lhê; hkâsu mù gâ le, Makedoni mau mai lé jé é gu-mang wuì gi, ngò haî râ é lé htuqbáng byi kô é yánmai nghut lhê. Hká dông nghut kôlhang, ngò gi, ngá gûng lé, núngmòq é matú wòlai a dùt nhâng shoq kut bê nghut mù, xoq luî le haú dông kut nyî râ nghut lhê. 10 Haû Hkrisidùq é tengmán hkyô gi, ngò má hkyak yhang bo é nghut lhê mù, Ahkai-a mau mâ é bang ó yùq lháng, ngò haû su taî nghutbûn é hkyô lé wó hkûm zìng râ a nghut. 11 Haî mù lhú? Ngò, núngmòq lé a chyitdàp é yánmai nghut lhê lhú? Ngò, núngmòq lé chyitdàp é hkyô lé, Garai Gasang sê lhê. 12 Ngò gi, yhángmòq zui saî é lé taî nghutbûn é hkyô pé má ngá-mòq eq rawuí za són byi râ ahko ahkáng ô nau é bang lé ahkâng a byi râ matú, ngò kut nyi é su xoq luî kut shirâ nghut lhê.
13 Hkâsu mù gâ le, haû sû é bang gi, lagyo a-pyoq pé, mhaú zô é mú zui bang, Hkrisidùq é lagyô pé dông kut mhaû é bang nghut akô. 14 Haû gi, maú râ hkyô a jòq, hkâsu mù gâ le, Tsádán lháng gi, maubó é maumang lagyo rayùq dông kut mhaû é sû nghut lhê. 15 Haû mù, Tsádán é duìnhâng zoshâng wuì gi, díngmán hkyo é duìnhâng zoshâng wuì dông kut mhaû é nghut jáng, maú dân râ hkyô a jòq é nghut lhê. Yhángmòq é ló htâng má gi, yhángmòq kut é eq rajung za hui zo kôrâ nghut lhê.
Yhâng É Wuîhke Jamjau Hkyô Eq Séng Luî, Poluq Taî Nghutbûn É Hkyô
16 Ngò puq taí kôlé, ó yùq le, ngo lé byù gò dông a sôn yù kó sháng gàq. Nghut kôlhang, núngmòq sôn yu é nghut jáng, ngò ra-tsuí wó taî nghutbun sháng gàq, byù gò lé núngmòq hàp yu é su, ngo lé hàp yù kó làq. 17 Ngò, haû su taî nghutbûn é hkyô gi, haû Yhûmsîng o é dông ngò taî nyi é a nghut, byù gò rayùq dông taî nyi é ru nghut lhê. 18 Byù myo myo gi, mingkân é hkyô dông taî nghutbûn nyi bum lhê nghut mù, ngò le taî nghutbun râ nghut lhê. 19 Núngmòq gi, hpàqchyî lûm bò kô é nghut mù, byù go pé lé gabú myìt èq jân nyi akô nhung! 20 Gè gè yhang, núngmòq gi, núngmòq lé jùn kut é sû lé le, núngmòq lé rhoî zô é sû lé le, núngmòq chyáng a-kyû hô zô yu é sû lé le, yhânggùng yhang owaq é sû lé le, núngmòq lé bo-pyuq pyuq é sû lé le, jân nyi akô nghut ri. 21 Ngá-mòq gi, núngmòq lé haú hkyô kut râ má wum gyai nyhôm lhê nghû yín yû râ lé, ngò, hoq ri!
Rayùq yùq, haî lé wám taî nghutbûn é nghut jáng, ngò le, haû lé wám taî nghutbûn lhê nghû, byù gò rayùq dông ngò taî nyi é nghut lhê. 22 Yhángmòq gi, Hebre byu pé nghut akô lhú? Ngò le nghut lhê. Yhángmòq gi, Isira-elaq byu pé nghut akô lhú? Ngò le nghut lhê. Yhángmòq gi, Abraham é awùt ashín pé nghut akô lhú? Ngò le nghut lhê. 23 Yhángmòq gi, Hkrisidùq é duìnhâng zoshâng wuì nghut akô lhú? (Ngò gi, myìt a gyîng é sû dông haû su taî é nghut lhê.) Ngò gi, je nghut lhê. Ngò gi, mú zui je shi-kùt bê, htóng a-num num je lúng wú bê, je riyhang bàt é huî wú bê, shî râ í dùt é adàm dàm huî wú bê nghut lhê. 24 Ngò gi, Yudaq byu pé nuìchûm èq bàt é myi xê dàm byíng râ radàm ra ra dùt é, ngo lhîng hui zô wú é nghut lhê. 25 Ngò gi, dumbáng èq nhuq huî é sum dàm, shî sháng gàq ga lùqgòk èq dú huî é radàm, wuìsanghpo byòq huî é sum dàm, wuimau má myû byôm é ra-nyí ra-myìn hui zô wú bê nghut lhê. 26 Ngò gi, xoq xoq hkyôwuì htoq e ló é hkûn, wuì gû é gyùq chiq jung, da-myàq huî é gyùq chiq jung, ngá é a-myû wui chyáng mâ é gyùq chiq jung, tûngbaù pê chyáng mâ é gyùq chiq jung, wà mó hkaû pé mâ é gyùq chiq jung, yòso pé mâ é gyùq chiq jung, wuimau mâ é gyùq chiq jung eq gu-mang a-pyoq pê chyáng mâ é gyùq chiq jung pé hui zô wú bê nghut lhê. 27 Ngò gi, mú lé zuî ngú zuî hkyik mù, a-num num a myang yhup shoq dùt wú bê nghut lhê. Ngò gi, zò-mut wuìshit huî é eq zoshuq a wó é a-num num huî laî lo wú bê nghut lhê. Ngò gi, gyòq hpû é eq gùngchîn dùt é huî wú bê nghut lhê. 28 Haú pé lhúnglhâng htoq má, noqkuq hpûng pé bànshoq é matú ngò myìt chiq byî é hkyô gi, nyí wuî ngò má wòlai dùt nyi ri. 29 Rayùq yùq wum nyhóm le, ngò le wum a nyhóm râ lhú? Rayùq yùq mara shuî kut shut é huî le, ngò myìt a nyé râ lhú?
30 Ngò taî nghutbun râ dùt é nghut le gi, ngò wum nyhôm é hkyô lé tûn shit é pé lé taî nghutbun râ nghut lhê. 31 Ngò a mhaû nyi é hkyô lé pyàt dedu hkya-on huî é sû, haû Yhûmsîng Yesuq é Îwa eq Garai Gasang sê lhê. 32 Damasikuq wà mó má, Hkóhkâm Areta é a‑ô mâ é mau zau gi, ngo lé chyup râ matú, wà mó lé zúng nhang é nghut lhê. 33 Nghut kôlhang, ngò gi, mhanghkoq má lúng mù, wà mó mâ é wàhkûm mâ é hkohot dong mai lhoqhkyô kat é hui luî, yhâng é lòq mai wó lùt é nghut lhê.