Poluq, Yhâng É Hpúngmû Lé Taî Hung É Hkyô
10
Núngmòq eq myòqdong hkyúm nghut é hkûn gi, gyùq kyûm myìt bo ri ga, wê gâng é hkûn gi, a gyùq a wàm dùt ri ga kô é sû, ngò Poluq gi, Hkrisidùq é nûm é hkyô eq nú nhâm é hkyô dông mai, núngmòq lé pying kat lhê. 2 Shî mingkân é nyì yàp a-tsáng dông ngá-mòq chyungxe dui ri ga myìt ngam é byù ra-am lé, ngò a gyùq a wam é myìt lé shit râ hen tô lhê. Ngò jé lé é hkûn, núngmòq lé haú sû é myìt a shit ra sháng gàq, ngò núngmòq lé dûng tôngbán kat lhê. 3 Hkâsu mù gâ le, ngá-mòq gi, mingkan shî má chyungxe dui nyì kôlhang mingkan byu pé kut é dông majan zân é a nghut. 4 Ngá-mòq majan zân é làknàk gi, mingkan shi é làknàk a nghut é za, shut shai é dông dangnyhin nyhin hkyô nghut é, gingtîng é gyèdap pé lé lhoqhtên pyám râ matú Garaî é a-tsam byíng é làknàk ru nghut lhê. 5 Ngá-mòq gi, dangnyhin nyhîn lhûm é hkyô pé eq Garai Gasang lé sê é hkyô lé shut shaî shoq yhûmsing gùng yhûmsîng lhoqmyhang mhaû é hkyô hkangmó lé lhoqhtên pyám mù, Hkrisidùq é jì-no gyo râ matú, myìt sôn é hkyô hkat hkangmó lé shúm kut yu é nghut lhê. 6 Núngmòq é jì-no gyo hkyô gi, gúmjùp é hkûn, jì-no a gyô é hkyô hkangmó lé ngá-mòq dam byi râ rì rì dùt râ nghut lhê.7 Núngmòq gi, ahtoq pyâm lé za wú nyi é bang nghut akô. Rayùq yùq gi, Hkrisidùq eq sêng é sû hkyak nghut lhê ga myìt lum tô é nghut jáng, ngá-mòq le, yhang eq rajung za, Hkrisidùq eq sêng é bang nghut é lé, yhang dum bûn sê nyì sháng gàq. 8 Hkâsu mù gâ le, núngmòq lé lâng hkyó râ nó gi, núngmòq lé kô myhâng nhâng râ matú, ngá-mòq lé haû Yhûmsîng byî é ahko ahkáng lé gyai taî nghutbûn le lháng, ngò gi, hoq hpû é hui râ a nghut. 9 Ngò gi, ngá é laiká pê èq núngmòq lé kyuq é su a dùt nhâng nau é nghut lhê. 10 Hkâsu mù gâ le, ra-am gi, “Yhâng é laiká pé gi, gàng bo é eq wum-o bo é nghut ri; nghut kôlhang, yhâng gùng gi, byùwup a bo é nghut mù, yhang taî é dang pé gi, haî a nghut.” ga taî akô. 11 Ngá-mòq gi, wê gâng é hkûn, ngá-mòq é laiká pé má bo é eq rajung za nghut é hkyô eq, rahá nghut nyi é hkûn, ngá-mòq zui saí râ nghut é hkyô lé, haû sû é bang sê gyo râ dùt lhê.
12 Ngá-mòq gi, haû yhûmsing gùng yhûmsîng owaq é bâng é hpúng má bo lom é hkyô nghut nghut, yhángmòq eq whuî é hkyô nghut nghut, a wám kut é nghut lhê. Yhángmòq gi, yhángmòq gùng yhángmòq chîn lhûm wú é eq yhángmòq gùng yhángmòq whuî lhûm wú kô é hkûn, hpàqchyî a bo é bang dùt bekô nghut ri. 13 Nghut kôlhang, ngá-mòq gi, âng é mai lai shoq taî nghutbun râ a nghut é za, ngá-mòq lé Garai Gasang masàt to byî é, núngmòq chyáng lháng hkyit jé shoq nghut é maukyo hkaû má za taî nghutbun râ nghut lhê. 14 Ngá-mòq gi, núngmòq chyáng a jé lé wú é dông mai, gyai yhang taî nghutbûn nyì râ a nghut; hkâsu mù gâ le, ngá-mòq gi, Hkrisidùq é gabú danglù chûng mù, núngmòq chyáng lháng lé jé bê nghut lhê. 15 Dum, ngá-mòq gi, góbang kut é múzó lé le, âng é mai lai luî taî nghutbûn lhaî é a nghut. Ngá-mòq myòqbyu é hkyô gi, núngmòq é lùmjíng myìt kô myhang jàt nyì jáng shèq, núngmòq chyáng ngá-mòq zui saî é jowò gyai wó lhoqlâm râ nghut lhê. 16 Haû gi, núngmòq é mau lháng lai shoq, gabú danglù lé ngá-mòq wó hko kyo râ matú nghut lhê. Hkâsu mù gâ le, ngá-mòq gi, góyùq èq zui saî to bê lòqzó eq séng luî, taî nghutbún nau é a nghut. 17 Nghut kôlhang, “Taî nghutbûn é sû gi, haû Yhûmsîng má taî nghutbun sháng gàq.”a ga kâ tô ri. 18 Hkâsu mù gâ le, yhûmsing gùng yhûmsîng owaq é sû gi, hàp yù huî é a nghut é za, haû Yhûmsing èq owaq byî é sû shèq, hàp yù huî é ru nghut lhê.