KORINHTUQ
Pê Chyáng Hî Dàm Hun Kat é Laiká
(1 Corinthians)
1
Garai Gasang ô nau é eq rajung za, Hkrisidùq Yesuq é lagyo dùt râ matú ji yù huî é sû ngò Poluq eq, ngá-mòq é gu-mang hpó Sositeni gi, 2 jowò hkangmó má ngá-nhûng é Yhûmsîng Yesuq Hkrisidùq é myìng lé lâng é bang eq rahá, chyoiyúng bang dùt râ matú ji yù huî é eq Hkrisidùq Yesuq má lhoq sân-yúng é huî é bang nghut é, Korinhtuq wà mó mâ é, Garai Gasâng é noqkuq hpúng lé, dang kyô kat lhê; Hkrisidùq gi, ngá-mòq eq yhángmòq é Yhûmsîng nghut lhê.3 Ngá-nhûng é Îwa Garai Gasang eq Yhûmsîng Yesuq Hkrisidùq chyáng mâ é jeju eq nguì ngón hkyô gi, núngmòq chyáng ru joq nyî sháng gàq ô!
Hkrisidùq É Yánmai Wó É Jeju
4 Garai Gasâng jeju lé Hkrisidùq Yesuq dông mai núngmòq lé byi bê nghut mù luî, ngò gi, núngmòq é matú Garai Gasang lé ayang jeju hkya-ôn nyi lhê. 5 Hkâsu mù gâ le, núngmòq gi, Hkrisidùq dông mai, núngmòq dang taî é hkyô bànshoq eq núngmòq é sumsé hpàqchyî bànshoq má je lhoq gúmjùp é hui bekô nghut ri. 6 Haû gi, Hkrisidùq Yesuq eq séng luî, ngá-mòq sàksé hkâm é hkyô têng é lé, núngmòq chyáng shit nyi é nghut lhê. 7 Haû mù, ngá-nhûng é Yhûmsîng Yesuq Hkrisidùq dum htoq shit râ lé, núngmòq gyai myòqbyu láng nyi é u má, núngmòq gi, so é hkyô eq sêng é chyûnghuq haî lé le langhpyùt kôrâ a nghut. 8 Ngá-nhûng é Yhûmsîng Yesuq Hkrisidùq é buìnyì má, núngmòq lé mara hûn râ hkyô a bò shoq, Hkrisidùq gi, núngmòq lé, htáng shoq gingtíng nhang nyì râ nghut lhê. 9 Ngá-nhûng é Yhûmsîng nghut é Yhang Zo Yesuq Hkrisidùq eq rahá zùm yàp râ matú, núngmòq lé ji yù bê sû Garai Gasang gi, lhumzui Sû nghut ri.
Noqkuq Hpúng Má Gam Hkoq Lhûm É Hkyô
10 Gu-mang wuì ê, núngmòq hkaû má gam hkoq lhûm é hkyô pé a jòq é za, núngmòq é myìt eq myìt sôn wú é hkyô má gúmjùp shoq rading ralhum za dùt nyì sháng gàq, núngmòq lhúnglhâng bang rayùq eq rayùq byìn hpyé góhut huî nyì keq nghû, ngò, núngmòq lé, ngá-nhûng é Yhûmsîng Yesuq Hkrisidùq é myìng mai dûng tôngbán kat lhê. 11 Ngá é gu-mang wuì ê, Hkilo‑e é yhûmbyù wuì gi, núngmòq hkaû má mabyòq htoq hkyô jòq é lé, ngo lé hkyáng lo shit akô. 12 Ngò haû su nghû taî é gi, núngmòq mâ é rayùq yùq gi, “Ngò gi, Poluq htâng châng lhê.” ga, góyùq gi, “Ngò gi, Apolo htâng châng lhê.” ga, dum rayùq gi, “Ngò gi, Kehpa htâng châng lhê.” ga, dum góyùq gi, “Ngò gi, Hkrisidùq htâng châng lhê.” ga, taî bùm kô é yánmai nghut lhê.
13 Hkrisidùq gi, gam hkoq é hui bê lhú? Ngò Poluq gi, núngmòq é matú tapzîng má jén sat é hui bê lhú? Núngmòq gi, ngá é myìng mai wuìmyhup hkâm yù kô é lhú? 14 Ngò gi, Krisipu eq Ge‑u nhik mai lai luî, núngmòq ó yùq lé le wuìmyhup a hkám byî wú é yánmai, 15 núngmòq ó yùq le, ngá é myìng mai wuìmyhup hkâm yù bê nghû a wó taî é nghut mù, ngò, Garai lé jeju hkya-ôn lhê. 16 (Sitehpana é yhûmbyù wuì lé le, ngò wuìmyhup hkám byî é nghut lhê, haû mai lai luî gótû ó lé hkám byî záng ashî làq, ngò a myìtbun lo nghut ri.) 17 Hkâsu mù gâ le, Hkrisidùq, ngo lé nhang kat é gi, wuìmyhup hkám byi râ matú a nghut, gabú danglù hko kyo râ matú shèq nhang kat é ru nghut lhê; nghut kôlhang, waxâng zô wui é hpàqchyî byéng-yá dang dông hko kyô é a nghut mù, Hkrisidùq é tapzing é a-tsam gi, akôm a dùt byùq é nghut lhê.
Garaî É A-tsam Eq Hpàqchyî Byéng-yá Gi, Hkrisidùq
18 Hkâsu mù gâ le, tapzîng má Yesuq shî hkâm é hkyô eq sêng é danglù gi, htên byòq hui râ bâng é matú, danggang dùt byùq ri; nghut kôlhang, hkyi yu é huî nyì bang ngá-nhûng é matú gi, Garai Gasâng é a-tsam nghut ri. 19 Hkâsu mù gâ le, Chyúmdang má kâ tô é gi,
“Hpàqchyî bò bâng é hpàqchyî byéng-yá lé, Ngò lhoqhtên pyám râ nghut lhê; u-nuq nyaù bâng é sê hkyâng u-nuq lé, Ngò, ajè dùt pyám nhâng râ nghut lhê.”a
gâ ri.
20 Hpàqchyî byéng-yá bò bang gi, hká má lhú? Hpàqchyî laiká kung bang gi, hká má lhú? I-pyàt shi é dang taí kung bang gi, hká má lhú? Garai Gasang gi, mingkân é hpàqchyî byéng-yá lé lhoqngòk pyám bê a nghut lhú? 21 Hkâsu mù gâ le, Garai Gasâng é hpàqchyî byéng-yá mai ga jáng, mingkan zo wuî gi, yhûmsing é hpàqchyî byéng-yá dông mai Garai Gasang lé a wó sé kô é yánmai, danggang gâ pyám byi kô é mungdang lé hko kyô é dông lùmjíng bang lé hkyi yù râ matú, Garai Gasang myìt hpyit é nghut lhê. 22 Yudaq byu pé gi, maúhpo alhô agàn pé lé dûng akô; Grik byu pé gi, hpàqchyî byéng-yá lé ho akô nghut ri. 23 Nghut kôlhang, ngá-mòq gi, tapzîng má jén sat huî é Hkrisidùq é hkyô lé hko kyô lhê. Haû gi, Yudaq byu pê é matú myìt lèqbàt jowò eq tûngbaù pê é matú danggang dùt byùq ri. 24 Nghut kôlhang, Garai Gasâng èq ji yù huî é Yudaq byu pé eq Grik byu pê é matú, Hkrisidùq gi, Garai Gasâng é a-tsam eq Garai Gasâng é hpàqchyî byéng-yá nghut ri. 25 Hkâsu mù gâ le, Garai Gasâng é ngòk hkyô gâ é lháng gi, byu é hpàqchyî byéng-yá htoq má je gyaú ri; Garai Gasâng é wum nyhóm hkyô gâ é lháng gi, byu é wum-o htoq má je gyaú ri.
26 Gu-mang wuì ê, Garai Gasang, núngmòq lé ji yu é hkûn, núngmòq hkâsu dùt nyi é hkyô lé myìt wú keq. Waxâng zô wui é nyì yàp a-tsáng dông hpàqchyî byéng-yá bo é bang, ahkáng ayá wó é bang, zaugun sûwún a-myû mâ é bang a myô é nghut lhê. 27 Nghut kôlhang, Garai Gasang gi, hpàqchyî byéng-yá bò bang lé hoq lhoqhpu râ matú, mingkan mâ é ngòk bang gâ é lé hkyin yu é nghut lhê; Garai Gasang gi, wum bô bang lé hoq lhoqhpu râ matú, mingkan mâ é wum nyhóm bang gâ é lé hkyin yu é nghut lhê. 28 Yhang gi, mingkân èq ahkyàk tô é lé lhoqhtên pyám râ matú, haî a nghut é lé le, mingkan mâ é xânghpoq nge wó hkyô a wó é eq wú tiq pyám huî é lé le, hkyin yu é nghut lhê. 29 Haû gi, ó yùq le, Yhâng é hí má a ge nghutbun râ matú nghut ri. 30 Garai Gasâng é yánmai, núngmòq gi, Hkrisidùq Yesuq má nghut nyî bekô nghut ri; Hkrisidùq gi, ngá-nhûng é matú, Garai Gasâng chyáng mâ é hpàqchyî byéng-yá dùt bê nghut ri. Haû gi, ngá-nhûng é díngmán hkyô, chyoiyúng hkyô eq hkyi yù hkyô nghut ri. 31 Haû mù luî, “Taî nghutbûn é sû gi, haû Yhûmsîng má taî nghutbun sháng gàq.”b ga kâ tô é eq rajung za nghut ri.