Shi-kyám Dang
16
Ngò gi, Kenhkre‑a noqkuq hpúng mâ é hpúngtê, ngá-nhûng é gu-nhá Hpobe lé, núngmòq chyáng nhang kat byî lhê. 2 Núngmòq gi, sân-yúng bang kut gíng é eq rajung za, haû Yhûmsîng má yhang lé hàp yù luî, yhang râ tô é hkyô haî nghut kôle, yhang lé htuqbáng keq. Hkâsu mù gâ le, yhang gi, byù myo myo lé le, ngo lé le, gyai yhang garúm lai bê sû nghut lhê.3 Hkrisidùq Yesuq má ngò eq mû wùn luzúm nhik nghut é, Prisikila eq Akula lé bo shi-kyám byi keq. 4 Yhángnhik gi, ngá é chyungxê é matú, yhángnhik é chyungxe sum râ í yhang dùt wú kô é nghut mù, ngò za a nghut, tûngbaù pê é noqkuq hpúng pé bànshoq le, yhángnhik lé jeju bûn lhê.
5 Yhángnhik é yhûm má chôm huî zùp é noqkuq hpúng lé le, bo shi-kyám byi keq.
Asi-a mau má, Hkrisidùq lé sânghi lùmjíng wang lo é, ngò chyitdàp é Epanetu lé bo shi-kyám byi keq.
6 Núngmòq é matú gyai yhang shi-kùt wú bê sû nghut é Mariq lé bo shi-kyám byi keq.
7 Ngò eq rahá htóng lúng wú bê nghut é, ngá é buìnùm, Andironiku eq Yuni‑a nhik lé bo shi-kyám byi keq. Yhángnhik gi, lagyô pé má myòqdong wó su nhik nghut é htoq agó, ngá é hí má, Hkrisidùq má ngò a nyì shi lé nyì bê sû nhik nghut akô.
8 Haû Yhûmsîng má, ngò chyitdàp é sû, Ampili-atu lé bo shi-kyám byi keq.
9 Hkrisidùq má, ngá-mòq é mû zui luzúm nghut é Oriban eq ngá é chyitdàp luzúm Sitaku lé, bo shi-kyám byi keq.
10 Hkrisidùq má chyam é hui mù, wó lûm bê sû, Apele lé bo shi-kyám byi keq.
Arisitobulu eq sêng é yhûmbyù wuì lé bo shi-kyám byi keq.
11 Ngá é buìnùm Herudi-on lé bo shi-kyám byi keq.
Haû Yhûmsîng má nghut nyî bê bang, Narikiso é yhûmbyù wuì lé bo shi-kyám byi keq.
12 Haû Yhûmsîng má mû zui shi-kùt é myiwê nhik, Truhpena eq Truhposa lé bo shi-kyám byi keq.
Haû Yhûmsîng má mû zui gyai yhang shi-kùt é myiwe góyùq, ngá é chyitdàp luzúm Perisi lé bo shi-kyám byi keq.
13 Haû Yhûmsîng má hkyin yu é hui bê sû, Ruhpu lé le, ngá nu dông nghut wú bê nghut é Ruhpu é yhâng nu lé le, bo shi-kyám byi keq.
14 Asunkritu, Hpelegon, Herime, Patroba, Herima eq yhángmòq eq rahá nyi é gu-mang wuì lé, bo shi-kyám byi keq.
15 Hpilologu, Yuli‑a, Nere‑a eq yhâng é nhammó eq, Olumpa, yhángmòq eq rahá nyi é sân-yúng bang bànshoq lé, bo shi-kyám byi keq.
16 Rayùq eq rayùq, chyoiyúng bo-puq é èq shi-kyâm lhum keq.
Hkrisidùq é noqkuq hpúng pé bànshoq gi, núngmòq lé shi-kyám dang sang kat akô nghut ri.
17 Gu-mang wuì ê, núngmòq é lùmjíng hkyô má, núngmòq mhoq hkam yù bê nghut é mhoqshit hkyô eq shai lhûm é, gam hkoq hkyô pé eq myìt lèqbàt hkyô pé lhoqhtoq é bang lé sidìq keq nghû, wum taî tsuq kat lhê. Yhángmòq lé koi pyám keq. 18 Hkâsu mù gâ le, haû sû é bang gi, ngá-nhûng é Yhûmsîng Hkrisidùq lé dójaú é bang a nghut é za, yhûmsing é wamdaû matú dójaú é bang nghut akô. Yhángmòq gi, myìt nú nhâm é bang lé, dang ngón dang nguî dông mhaú zô akô nghut ri. 19 Núngmòq, jì-no gyo kô é hkyô lé, yùq hkangmó wó gyo bê nghut ri; haû mù, ngò gi, núngmòq é matú gyai yhang gabú nyi lhê; nghut kôlhang, ge é hkyô eq séng luî gi, núngmòq hpàqchyî bò mù, agè ashop hkyô eq séng luî gi, núngmòq a bo lòm râ lé, ngò ô nau ri.
20 Nguì ngón hkyo é Garai Gasang gi, a myáng má, núngmòq é hkyîwa ô má Tsádán lé nâng pyeq pyám râ nghut lhê.
Ngá-nhûng é Yhûmsîng Yesuq é jeju gi, núngmòq eq rahá nghut nyî sháng gàq ô!
21 Ngá é mû zui luzúm Timohti gi, núngmòq lé shi-kyám dang sang kat ri; haû eq rajung za, ngá é buìnùm wuì Luki, Yason eq Sosipata pé le, shi-kyám dang sang kat akô nghut ri.
22 Laiká shî lé bo ká sû ngò Teriti‑u gi, haû Yhûmsîng má núngmòq lé shi-kyâm kat lhê.
23 Ngo lé le, noqkuq hpúng gón lé le, bíng hkûlum é sû Ge‑u gi, núngmòq lé shi-kyám dang sang kat ri.
Haû wà mâ é ngùn zui sû Erasitu eq ngá-nhûng é gu-mang hpó Ku‑aritu gi, núngmòq lé shi-kyám dang sang kat akô. 24 Ngá-nhûng é Yhûmsîng Yesuq Hkrisidùq é jeju gi, núngmòq lhúnglhâng bang eq rahá nghut nyî sháng gàq. Amen.a
25 Byù myû chângjup bang lùmjíng luî, Yhâng é jì-no gyo sháng gàq ga, a‑nham pyàt mai haq tô é hui kôlhang, 26 ahkuî, ahtum abyùq é Garai Gasâng é hkunmó é yánmai, myìqhtoi laiká pé dông hpông shit é eq sé nhâng bê nghut é, sê gyo wuî é hkyo é shing-rán má cháng luî, ngá é gabú danglù eq Yesuq Hkrisidùq é hkyô taî pyo é dông, núngmòq lé wó lhoq gingtíng byî é, 27 rayùq zâ é hpàqchyî bò sû Garai Gasâng chyáng, Yesuq Hkrisidùq dông mai, hpungwup shingkang gi, ahtum abyùq ru joq nyî sháng gàq ô! Amen.