Góyùq Lé Myìt Ngón Nhâng Râ Hkyô
15
Lùmjíng hkyô má wum-o bo é ngá-nhúng gi, yhûmsîng myìt ngón râ hkyô lé a ho é za, wum-o a bò bâng é wum nyhóm hkyô lé, hkam jan byî nyì râ dùt lhê. 2 Ngá-nhúng yùq hkangmó gi, yhûmsing é chyáng nâm mâ é su é ge é hkyô dùt râ matú, yhang wó kô myhang lò shoq, yhang lé lhoqngón byî nyì sháng. 3 Hkâsu mù gâ le, Hkrisidùq lháng gi, Yhânggùng yhang lhoqngón é a nghut; haû gi, “Nang lé rhoî bâng é dang gi, Ngá chyáng gyó ke bê nghut ri.”a ga, kâ tô é eq rajung za nghut ri. 4 Hkâsu mù gâ le, laî lò bê hkûn kâ tô é lhúnglháng gi, ngá-nhúng lé mhoq byi râ matú chyat kâ tô é nghut lhê; haû gi, Chyúmdang mâ é hkam jan hkyô eq myìt wum byi hkyô dông mai, ngá-nhúng myìt myòqbyù hkyô wó râ matú nghut lhê.5 Haû hkam jan hkyô eq myìt wum byi hkyô lé byî é Garai Gasang gi, núngmòq, Hkrisidùq Yesuq é htâng châng nyi é u lé, núngmòq yhangchang rading ralhum za dùt é sô byi sháng gàq; 6 haû jáng shèq, núngmòq gi, i‑myìt rahkat eq nhut htê ralhûm èq za, ngá-nhûng é Yhûmsîng Yesuq Hkrisidùq é Yhâng wa nghut Sû, Garai Gasang lé, wó hkya-on kúngtôn kôrâ nghut lhê.
7 Haû mù luî, Hkrisidùq gi, núngmòq lé hàp yù bê é eq rajung za, Garai Gasâng é hpungwup shingkang lé lhoqhtoq shit râ matú, núngmòq le, rayùq eq rayùq hàp yu lhum keq. 8 Hkâsu mù gâ le, ngò, núngmòq lé taí kôlé, haû myìng hû é îchyí îwâ pé lé danghtum htûm tô é pé lhoqging râ matú, Hkrisidùq gi, Garai Gasâng é tengmán hkyo é malaî, Yudaq byu pê é duìnhâng zoshâng dùt bê nghut ri. 9 Haû mù, Garai Gasâng é shogyo nhikmyin hkyo é yánmai, haû tûngbaù pé, Garai Gasang lé wó hkya-on kúngtôn kôrâ nghut lhê. Haú hkyô gi,
“Haû mù luî, tûngbaù pê chyáng má, Nang lé, ngò hkya-on râ nghut lhê;
Náng é myìng lé, ngò hkya-on mahkôn râ nghut lhê.”b
“Tûngbaù pé ê, Yhâng é byu pé eq rahá gabú nyì keq.”c
“Núngmòq tûngbaù pé lhúnglhâng bang ê, haû Yhûmsîng lé hkya-on keq, byù myû lhúnglhâng bang ê, Yhang lé hkya-on mahkôn hkôn keq.”d
“Yese é A-myìt gi, yùq htoq lô luî, Yhang gi, byù myû chângjup é ahtoq má ùp râ sû nghut lhê;
tûngbaù pé gi, Yhang má myìt myòqbyù kôrâ nghut lhê.”e
gâ ri.
13 Haû myìt myòqbyù hkyô byî é Garai Gasang gi, Yhang lé lùmhkau nyi é bang núngmòq lé, gabú hkyô bànshoq eq nguì ngón hkyô lhoqpyíng byi sháng gàq; haû jáng shèq, núngmòq gi, Chyoiyúng So é wum-o a-tsâm èq, myìt myòqbyù hkyô wó byíng mui nyì kôrâ nghut lhê.
A Gyùq A Wam É Za, Poluq Laiká Kâ É Hkyô
14 Ngá é gu-mang wuì ê, núngmòq gi, ge é hkyô byíng jùp é bang, hpàqchyî má gúmjùp é bang, rayùq eq rayùq mhoqshit lhûm é má kûng é bang nghut é lé, ngá gûng ngò yhang hkyak lùmjíng lhê. 15 Ngò gi, núngmòq lé dum lhoqpûn é dông, ahkyàk é pé ra-am lé a gyùq a wàm kâ kat bê nghut lhê. 16 Hkâsu mù gâ le, tûngbaù pé gi, Chyoiyúng Sô dông mai lhoq sân-yúng é hui luî, Garai Gasâng èq hàp yù gíng é hkungga wó dùt kó sháng gàq ga, Garai Gasâng é gabú danglù lé hkô râ hkyangjông é wò dông, tûngbaù pê chyáng, Hkrisidùq Yesuq é hpúngmû wùn sû dùt râ matú, Garai Gasang, ngo lé jeju byî é yánmai nghut lhê.
17 Haû mù luî, ngò gi, Garai Gasang lé dójaú é hkyô eq séng luî, Hkrisidùq Yesuq má nghutbûn nyi lhê. 18 Ngò gi, ngò taî é eq zui saî é múzó dông le, haû So é a-tsam chûng mù, alhô agàn pé eq làklaí alhô agàn pé dông le, tûngbaù pé lé, Garai Gasâng é jì-no gyo shoq shuî û é má, ngo lé Hkrisidùq nhang é múzó hkyô lé taî é mai lai luî, gótû haî lé le wám taî é a nghut. 19 Haû mù luî, ngò gi, Yerusalem wà mó mai Ilurihkam mau jé shoq é hkyô awui ayàm jàm shoq, Hkrisidùq é gabú danglù lé hko kyo bê nghut lhê. 20 Ngò hkâ-nhám le myìt tuî nyi é hkyô gi, góyùq hi tô é a-pûn awang má dum a puq saî pyâm é za, Hkrisidùq lé a sé shî é jowò má gabú danglù hko kyo râ hkyô nghut lhê. 21 Haû gi,
“Yhâng é hkyô lé, taî kyô é a hui shî é bang, myàng kôrâ nghut luî,
a wó gyô wú é bang, sê gyo kôrâ nghut lhê.”f
ga kâ tô é eq rajung za nghut ri. 22 Haû mù luî, ngò, núngmòq chyáng lé jé râ lé, a-num num hkyîkyô lùqlhum dùt nyi é gi, múzó hau é yánmai nghut lhê.
Romaq Wà Mó Lé Ló Kum Râ Sôn É Hkyô
23 Nghut kôlhang, ahkuî gi, shí mau pé má ngò zui saí râ jowò a jòq lô é nghut mù, núngmòq lé myàng nau nyi é zànwut myo myo nghut bê eq rajung za, 24 ngò, Sipin ming shut ló é hkûn, núngmòq chyáng wàng râ sôn tô lhê. Ngò gi, laî ló é hkûn, núngmòq lé lo sô kum mù, núngmòq eq rayòq zo zùm yàp ngón é htâng má shèq, ngá é hkyôwui matú, núngmòq haû mai htuqbáng kat râ lé, ngò myòqbyu tô lhê. 25 Ahkuî, ngò kúm gi, Yerusalem wà mó mâ é sân-yúng bang lé dójaú râ matú, haú wâ shut e ló é hkyôlat má nghut nyi lhê. 26 Hkâsu mù gâ le, Makedoni eq Ahkai-a mau mâ é bang gi, Yerusalem wà mó mâ é sân-yúng bâng chyáng mâ é myùng bâng é matú, garúm chyûnghuq hkyui tsíng nau bùm bekô nghut ri. 27 Yhángmòq gi, haû su kut nau bùm bekô nghut ri, gè gè ga jáng, haû gi, yhángmòq chyîn dàp tô é dông ru nghut lhê. Hkâsu mù gâ le, haû Yudaq byu pê é sô eq sêng é shimân jeju lé, tûngbaù pé bo hkam yù bê nghut le gi, yhángmòq é sùtzè shimân jeju lé, Yudaq byu pé eq chôm chûng râ chyîn dàp tô é dông nghut lhê. 28 Haû mù luî, ngò gi, múzó shí lhum ban kut mù, garúm chyûnghuq shî lé, yhángmòq wó hàp yù bê lé hkyak sê é htâng má, Sipin ming shut ló râ nghut mù, laî ló uchyang, núngmòq chyáng lé sô kum râ nghut lhê. 29 Ngò gi, núngmòq chyáng lé jé é hkûn, núngmòq é matú Hkrisidùq é shimân jeju byíng jùp é èq jé lé râ nghut é lé, ngò sê lhê.
30 Gu-mang wuì ê, ngá é matú Garai Gasâng chyáng kyûdung byî é dông, ngò wum kat yhang shi-kùt é hkyô má núngmòq bo wang lòm râ matú, ngá-nhûng é Yhûmsîng Yesuq Hkrisidùq eq So é chyitdàp myìt é yánmai, ngò, núngmòq lé wum taî tsuq kat lhê. 31 Yuda mau mâ é a lùmjíng bâng chyáng mai, ngò hkyi yu é wó hui luî, Yerusalem wà mó má ngò wùn wàq é múzó lé, haú mâ é sân-yúng bang hàp yù gíng é wó dùt râ matú kyû bo dung byi keq. 32 Haû jáng shèq, ngò gi, Garai Gasang ô nau é dông mai, gabú myìt èq núngmòq chyáng wó jé lé mù, núngmòq eq rahá wum-o wó yû râ nghut lhê. 33 Haû nguì ngón hkyo é Garai Gasang gi, núngmòq bànshoq bang eq rahá rû nyi nyì sháng gàq ô. Amen.