ROMAQ
Pê Chyáng Hun Kat é Laiká
(Romans)
1
Hkrisidùq Yesuq é duìnhâng zoshâng eq lagyo dùt râ matú, Garai Gasâng èq ji yu é hui luî, chyoiyúng Chyúmdang pé má, 2 Garai Gasang gi, hí hí mai Yhâng é myìqhtoî pé dông danghtum htûm to bê nghut é, Yhâng é Yùqzô é hkyô nghut é, Garai Gasâng é gabú danglu é matú hkyin to huî é sû, ngò Poluq gi, Romaq wà mó má nyi é, Garai Gasâng èq chyitdàp é hui luî, sân-yúng bang dùt râ matú ji yu é bang bànshoq lé, dang kyô kat lhê. 3 Yhâng é Yùqzo haû gi, byù hkyam dông ga jáng, Dawiq é awùt ashín nghut ri; 4 Yhang gi, shi é mai dum dui toq é dông, Garai Gasâng é Yhangzo nghut é hkyô lé, chyoiyúng hkyo é Sô dông mai, hpungwup a-tsâm èq sé nhâng bê nghut ri. Yhang gi, ngá-nhûng é Yhûmsîng Yesuq Hkrisidùq nghut ri. 5 Yhang dông mai le, Yhâng mying é matú le, ngá-mòq gi, byù myû chângjup mai byù ji yù mù, lùmjíng hkyô lé châng nyì nhâng râ matú, jeju eq lagyo ayá lé wó hkam yù bê nghut lhê. 6 Núngmòq le, Yesuq Hkrisidùq eq séng râ matú ji yù huî é bang má lòm bekô nghut ri.7 Ngá-nhûng é Îwa Garai Gasang eq Yhûmsîng Yesuq Hkrisidùq chyáng mâ é jeju eq nguì ngón hkyô gi, núngmòq chyáng ru joq nyî sháng gàq ô!
Poluq, Romaq Wà Mó Má Ló Kum Nau É Hkyô
8 Núngmòq é lùmjíng hkyô lé, mingkan gón má taî pyo ló bê nghut é yánmai, sânghi má, ngò gi, Yesuq Hkrisidùq é myìng mai, núngmòq bànshoq bâng é matú, ngá é Garai Gasang lé, jeju hkya-ôn lhê. 9 Ngá é kyûdung dang pé má, ngò, núngmòq lé hkâ-nhám le bûn nyi é hkyô lé, Yhâng é Yùqzô é hkyô gabú danglù lé hko kyô nyi é má, ngá é myìt nhiklhum bànshoq èq dójaú é Garai Gasang gi, ngá é sàksé nghut lhê; 10 Garai Gasang ô nau é nghut jáng, hkâ-í a myáng má, ngò, núngmòq chyáng wó jé lé râ hkyô htong byi râ matú, ahkuî, ngò kyûdûng lhê.
11 Ngò gi, núngmòq lé, so é hkyô eq sêng é chyûnghuq wó gâm byi mù, núngmòq lé wum-o wó lhoqkíng byi râ matú, núngmòq lé gyai yhang myàng nau nyi ri. 12 Haû su nghu é gi, ngá-nhúng rayùq eq rayùq é lùmjíng hkyô dông mai, núngmòq eq ngò, myìt wum byî é hui râ matú nghut lhê. 13 Gu-mang wuì ê, ngò gi, haû tûngbaù pê chyáng mai ashi wó yu é eq rajung za, núngmòq chyáng mai le ashi wó yû râ matú, núngmòq chyáng lé jé râ nghû adàm dàm haq htung wú é nghut kôlhang, ahkuî jé shoq hkûm tang pyám huî é hkyô lé, núngmòq lé sé nhâng nau ri.
14 Ngò gi, Grik pé lé le, Grik a nghut bang lé le, hpàqchyî bò bang lé le, hpàqchyî a bò bang lé le, chyîn dap to sû nghut lhê. 15 Haû nghut é yánmai, ngò gi, Romaq wà mó mâ é bang núngmòq lé le, haû gabú danglù gyai yhang hko kyo nau nyi é nghut lhê.
16 Haû gabú danglù hkyô má, ngò gi, a hoq é nghut lhê; hkâsu mù gâ le, haû gi, sânghi má Yudaq byu pé, hau htâng tûngbaù pé má, lùmjíng é sû yùq hkangmó lé hkyi yu é wó hui nhâng râ nghut é, Garai Gasâng é hpungwup a-tsam nghut lhê. 17 Hkâsu mù gâ le, lùmjíng myìt mai wó yû luî, lùmjíng myìt má gîng nyi é, Garai Gasâng chyáng mâ é díngmán hkyô lé gi, gabú danglù haú má hpông shit bê nghut ri. Haû gi, “Haû díngmán sû gi, lùmjíng myìt mai chyungxe duì râ nghut lhê.”a ga kâ tô é eq rajung za nghut ri.
Xângzo Byu Pê Htoq Má Garai Nhikmó-yô É Hkyô
18 Haû tengmán hkyô lé, yhûmsing é agè ashop hkyo èq zìk hkûm pyâm é byu pê é agè ashop hkyô eq garai a bo é hkyô pé bànshoq htoq má, mauhkûng mai Garai Gasâng é nhikmó-yo hkyô lé hpông shit bê nghut ri. 19 Haî mù gâ le, Garai Gasang gi, Yhang eq sêng é hkyô, yhángmòq lé san za tûn shit bê nghut é yánmai, Garai Gasang lé sé âng é hkyô gi, yhángmòq chyáng san za dùt bê nghut ri. 20 Hkâsu mù gâ le, mau htoq xâng hkun mai, hpan tô é zè pé lé wú jáng, Yhâng é a byu-myang é isâm nghut é, ahtum abyùq é hpungwup a-tsam eq Garaî é myìt sâmlai lé gi, san za wó myâng, wó sê gyô é nghut lhê. Haû mù luî, byu pé gi, mara mai wó he lùt râ hkyô a jòq lo nghut ri.
21 Haî mù gâ le, yhángmòq gi, Garai Gasang lé sê to kôlhang, Yhang lé Garai dông a shigyaú kô é eq, jeju a hkya-on kó nghut ri; yhángmòq myìt é hkyô pé gi, akôm dùt byùq é eq, nhik a gyîng é yhángmòq é myìt nhiklhum gi, chut byùq bê nghut ri. 22 Yhángmòq gi, hpàqchyî bò bang nghut lhê ga kôlhang, ngha é bang dùt byùq bekô nghut ri. 23 Haû mù, htên byòq a sê é Garai Gasâng é hpungwup shingkang lé, htên byòq sê é byù zòng, nghoq lhô, gaunyhaú lhô eq yê jung gaunyhaú lhô pê èq, htaî lhik pyám bekô nghut ri.
24 Hau é yánmai, Garai Gasang gi, yhángmòq é gùngdu lé rayùq eq rayùq hpau a tap lhum kôrâ matú, a sansêng é gùngsho zùm yàp hkyô kut râ nghut é, yhángmòq é yùt yùt ô nau é i‑myìt má, yhángmòq lé àp pyám bê nghut ri. 25 Yhángmòq gi, haû Garai Gasâng é tengmán hkyô lé, mhaû é hkyo èq htaî lhik pyám kômù, hpân Sû lé noqkuq dójaú râ malaî, mhaú hkyô nghut é hpan tô é zè pé lé noqkuq mù, dójaú akô nghut ri. Hpân Sû haû gi, ahtum abyùq hkya-on hui sû nghut ri. Amen.
26 Haû nghut é yánmai, Garai Gasang gi, yhángmòq lé, ahoq ahi é yùt yùt ô naù hkyô má àp pyám bê nghut ri. Yhángmòq é myiwe wuì lháng gi, htûng a-kyîng lé tô pyám kômù, haû eq shai é dông htaî lhik pyâm nyi akô nghut ri. 27 Haû eq rajung za, yùqgè wuì le, myiwe wuì eq zum é htûng a-kyîng lé tô pyám kômù, rayùq eq rayùq, myi su nyé shoq yùt yùt ô nau lhum kômù, yùqgè yhangchang rayùq eq rayùq agòt a‑û hkyô kut shut lhum kôluî, yhángmòq kut shut é eq gíngdán é yubàk dam lé, yhûmsing gùng yhûmsîng hkam yù nyì bekô nghut ri.
28 Hau htoq agó, haû Garai Gasang lé sê é hkyô gi, a-kyû bo é a nghut ga yhángmòq myìt yù kô é yánmai, a kut âng é hkyô kut nhâng râ matú, Garai Gasang gi, yhángmòq lé, htên byòq sê é myìt má àp pyâm é nghut lhê. 29 Yhángmòq gi, agè agaú hkyô ajung jung, agè ashop hkyô, myòqnòq hkyô eq a naù a wôm lhûm é hkyô pé byíng jùp tô é bang dùt bekô nghut ri; mânon é, byù sat é, mabyòq jishûm htoq é, mhaú zô é eq myìt goí bo é pé le byíng bum ri. 30 Yhángmòq gi, lùmu é bang, gànsang é bang, Garai lé a naù a wôm é bang, byù rhoi é bang, nghutbûn é bang, gyáng é bang, agè ashop kut râ hkyô lhoqhtoq é bang, mó wui é jì-no a gyô é bang nghut akô. 31 Yhángmòq gi, a gying a hâng é bang, gidìq a zung é bang, chyit myìt a bo é bang, shogyo nhikmyin a sê é bang nghut akô. 32 Haú pé lé kut é bang gi, shî gíng lhê gâ é, Garai Gasâng é díngmán târâ jòq é lé, yhángmòq sê to kôlhang, haú pé lé, yhángmòq xoq kut nyì kô é htoq agó, haú hkyô lé kut é bang lé le, hkya-on wàq toq akô nghut ri.