Malata Zinlóng Má Jé Nyi Tô É U Lhê Hkyô
28
Ngá-mòq wó lùt dàp ló jáng shèq, zinlóng haû gi, Malata gâ é lé sê ri. 2 Zinlóng byu pé gi, ngá-mòq lé shogyo myìt gyai lhom tûn shit akô. Mau ru jâng wo nyì luî gyòq é yánmai, yhángmòq gi, myi mut byi mù, ngá-mòq bànshoq bang lé hkûlum yu akô. 3 Haú hkûn, Poluq gi, htang rawàq gùq tsîng yù mù, myihkyóm má kat kat é hkûn, myi soq htan lò jáng, dùq htân lhângmuì radu gi, htoq lò mù, yhâng é lòq má htê zing tô ri. 4 Zinlóng byu pé gi, Poluq é lòq má lhângmuì haû htê lhâng tô é lé myàng kôjáng, “Shí yùq gi, gè gè yhang byù sat é sû teng râ dùt ri; wuì mai wó lùt ló kôlhang, yhang chyungxe dui nyì râ matú, Tengmán târâ gi, a dóng lo nhung!” ga luî, rayùq eq rayùq taî lhûm bum akô nghut ri. 5 Poluq kúm gi, lhângmuì haû lé myihkyóm má ko hkyô kat luî, haî le a dùt é za nyi tô ri. 6 Yhángmòq gi, yhânggùng wâm lò berâ, haû a nghut jáng, byò dàn ratung shi hkyaq lêng ló berâ, ga myìt láng nyi bum akô. Nghut kôlhang, myáng myáng láng wú nyi bum le, yhang má haî le a dùt lo é lé myàng kôjáng, yhángmòq é i‑myìt dum htaî pyám kôluî, shí yùq gi, hparà rayùq shèq nghut ri ga dum taî bum akô nghut ri.7 Hau é nàm má, zinlóng agyì hpó Popili sing é maumyî pé jòq tô ri. Haú yùq gi, ngá-mòq lé lhom te yù mù, yhâng yhûm má sum nyí yhang lalúm la‑nye lhom hkûlum yu ri. 8 Haú u lé, Popili é yhâng wa gi, alì nyé no nyi é eq wuìwam shun lèq tô ri. Poluq gi, haú yùq chyáng wàng mù, kyûdung byi luî, yhâng é ahtoq má lòq ke byi mù, yhang lé lhoqgê byî ri. 9 Haû su dùt é yánmai, zinlóng mâ é nò byù góbang bànshoq le, lé luî lhoqgê byî é hui bekô nghut ri. 10 Yhángmòq gi, ngá-mòq lé a hkyô hkyô dông hkúngga kôluî, ngá-mòq wuìsanghpo ji mù, dum toq ló râ hkûn, ngá-mòq râ é gû lé châng byî kat akô nghut ri.
Romaq Wà Mó Má, Poluq Jé É Hkyô
11 Lha-mó sum hkyap lai jáng, Alesandri-a wà mó mâ é, “Hparà zozûm nhiktâng” gâ é alhô dàp é wuìsanghpo má, ngá-mòq wang jî htoq ló bê nghut lhê. Wuìsanghpo haû gi, gyòqmyò lé zinlóng haú má jòq laî é nghut ri. 12 Surakusa wà mó má jé jáng, haú má ngá-mòq sum nyí nô yu é nghut lhê. 13 Haû mai jî xoq lhing ló le, ngá-mòq gi, Regi wà mó má jé ri. Htang nyí gi, maupyî laì hik lô mù luî, í nyí nyí má nghut jáng, Poti-oli wà mó má jé lô bê nghut lhê. 14 Haû mâ é gu-mang wuì ra-am eq hui luî, ngá-mòq lé nyhit nyí no râ matú lùng kômù, ngá-mòq gi, nô yù bê; hau htâng, Romaq wà mó má jé ló bê nghut lhê. 15 Haû mâ é gu-mang wuì gi, ngá-mòq jé lo nyi é hkyô lé wó gyo kôjáng, te yù râ ga, Api Gaì gâ é wà eq Bíng Yhûm Sûm Lhum gâ é wà jé shoq lé akô. Poluq gi, haú bang lé lhom myàng jáng, Garai Gasang lé hkya-on kúngtôn mù, myìt wum wó yû bê nghut ri. 16 Ngá-mòq, Romaq wà mó má jé wang ló é hkûn, Poluq gi, yhang lé zúng râ gyèzo rayùq eq gótû san nyì râ matú, ahkáng wó ri.
Poluq, Romaq Wà Mó Má, Mungdang Hko Kyô É Hkyô
17 Buìnyì sum nyí laî é htâng má, Poluq gi, haû mâ é Yudaq sûwún wuî lé ji yu ri. Yhángmòq jé lé bûm kôjáng, yhang gi, “Gu-mang wuì ê, ngò gi, ngá-nhûng é a-myû lé le, îchyí îwa pê é htûnghking lé le, shut shai é dông haî le a kut wú; nghut kôlhang, ngò gi, Yerusalem wà mó má chyup yu é hui mù, Romaq byu pê é lòq má àp byî kat é hui bê nghut lhê. 18 Romaq zau wuî kúm gi, ngo lé ban jep gôn wú jáng, ngá chyáng shî gíng é mara lé a myàng kô é yánmai, ngo lé nhang kat nau akô nghut ri. 19 Nghut kôlhang, haû lé Yudaq byu pé a dóng kô é yánmai, ngò hkâsu a dàt kut lo mù, Kehtaq chyáng jé râ matú dûng é nghut lhê. Haû nghut kôle, ngá a-myû lé mara hûn râ jowò jòq é yánmai gi, a nghut. 20 Haû mù luî, Isira-elaq a-myu é myìt myòqbyù hkyoa é yánmai, shî shâmtoqtuî èq tuî é ngò hui zô é hkyô eq séng luî, núngmòq eq nyo kún râ matú, ngò, núngmòq lé ji kat é nghut lhê.” ga luî, yhángmòq lé taî ri.
21 Haú hkûn, yhángmòq gi, “Náng é hkyô eq séng luî Yuda mau mâ é laiká ngá-mòq a wó yû nghut ri. Haû mai lé é gu-mang wuì ó yùq le, nàng eq sêng é a ge é lùhkyang lé shit kyô é a bò kó nghut ri. 22 Nghut kôlhang, shî nàng lom é hpúng gi, jowò hkangmó má taî he pyâm é huî é hkyô lé, ngá-mòq sê é yánmai, nàng byu myang é hkyô lé ngá-mòq gyô wú nau ri.” ga tû taî akô.
23 Yhángmòq gi, yhang eq huî kún râ buìnyì ding to kôluî, yhang bíng é yhûm má byù myo myo lé zîng bum akô. Haú hkûn, yhang gi, nàpkyó mai myínhtâng jé shoq, Garai Gasâng é mîngdán hkyô lé sàksé hkâm kyô é eq, Mosheq é târâ eq myìqhtoî pê é dang má cháng mù, yhángmòq lé shi-kùt luî, Yesuq é hkyô taî pun taî kyîng ri. 24 Yhang taî é hkyô lé, ra-am gi, lùmjíng bum akô; ra-am kúm gi, a lùmjíng kó nghut ri. 25 Yhángmòq rayùq eq rayùq haû su myìt a huî lhûm bùm kô é yánmai, Poluq gi, yhángmòq lé, “Chyoiyúng Sô, Myìqhtoi Esai-a é nhut mai núngmòq é îchyí îwâ pé lé taî é dang gi, gyai yhang têng ri. Dang haû gi,
26 ‘Byù haú hû chyáng ê mù,
“Núngmòq gyô tsuq to kôlhang, sê gyo kôrâ a nghut;
wú tsuq to kôlhang, wú sé kôrâ a nghut.” nghû ê taí aq.
27 Hkâsu mù gâ le, a-myû shi é i‑myìt gi, htan byùq luî,
yhángmòq é nohkyap gi, htu byùq bê nghut ri;
yhángmòq é myòq gi, chûm byùq bê nghut ri;
haû a nghut le gi, yhángmòq é myòq èq myàng mù,
yhángmòq é nohkyap èq wó gyo luî,
yhángmòq é i‑myìt má sê hkyâng kômù,
ngá chyáng lhing lò kôluî, ngò yhángmòq lé lhoqgê byi berâ nghut lhê.’b
gâ ri.
28 Haû mù luî, shî Garai Gasâng é hkyi yù hkyô lé, tûngbaù pê chyáng byî kat bê nghut luî, yhángmòq lhom gyô yù berâ hkyô lé, núngmòq yhang sê nyì keq ô!” ga luî, danghkun haû taî kat é htâng má, yhángmòq gi, htoq ló byùq bùm bekô nghut ri. 29 (Poluq haû su ga taî é htâng má, Yudaq byu pé gi, yhángmòq yhangchang dang jet jèt lhum uchyang ló byùq bekô nghut ri.)