Sô Mai Lo É Garai Gasâng É Hpàqchyî Byéng-yá
2
Gu-mang wuì ê, ngò gi, Garai Gasang eq sêng é sàksé hkyô lé núngmòq chyáng taî pyô râ matú jé lé é hkûn, dang taí kûng é eq hpàqchyî byéng-yá mó bo é dông lé é a nghut. 2 Hkâsu mù gâ le, ngò, núngmòq eq rahá nyi é u lé, Yesuq Hkrisidùq eq Yhang tapzîng má jén sat huî é hkyô mai lai luî, jung hkangmó lé tô-myhî pyám râ nghû myìt hpyit yû bê nghut lhê. 3 Ngò gi, núngmòq chyáng jé lé é hkûn, wum nyhôm é eq gyai yhang gyùq nán é nghut lhê. 4 Ngá é danglù eq ngò hko kyô é hkyô gi, hpàqchyî bo é eq mhuî yu é dang pé dông a nghut é za, So é a-tsâm èq núngmòq lé shit é dông ru nghut mù, 5 núngmòq é lùmjíng myìt gi, byu é hpàqchyî byéng-yá má a nghut é za, Garai Gasâng é hpungwup a-tsam má nghut nyi lhê.6 Nghut kôlhang, ngá-mòq gi, myìt dìng bê bang lé hpàqchyî byéng-yá dông nyo lhê; shí pyàt lhê é hpàqchyî byéng-yá eq htên byòq nyì huî é shí pyàt mâ é zaú wui é hpàqchyî byéng-yá dông kúm a nghut. 7 Ngá-mòq taî é gi, haq tô é eq, ahkyíng nghu é lháng a jòq shi mai ngá-nhûng é hpungwup shingkâng é matú Garai Gasang tô to byî é hpàqchyî byéng-yá nghut é, Garai Gasâng é zaú tô é hpàqchyî byéng-yá lé taî é ru nghut lhê. 8 Shí pyàt lhê é zau wuî gi, hpàqchyî byéng-yá haû lé rayùq lháng a sê gyo kó nghut ri; yhángmòq sê gyo kô é ru nghut le gi, hpungwup shingkang bo é Yhûmsîng lé tapzîng má jén sat pyám kôrâ a nghut. 9 Nghut kôlhang, Chyúmdang má,
“Ó yùq èq le a myang wú, ó yùq èq le a wó gyô wú, ó yùq èq le a bûn myìt wú é hkyô lé, Garai Gasang gi, Yhang lé chyitdàp bâng é matú lajâng to byi bê nghut ri.”a
ga kâ tô é eq rajung za nghut ri. 10 Nghut kôlhang, Garai Gasang gi, haú hkyô lé, Yhâng é Sô dông ngá-nhúng lé hpông shit bê nghut ri.
Sô haû gi, jung hkangmó lé ho gôn wú é nghut luî, Garai Gasâng é zaú tô é hkyô lé lháng ho gôn wú é sû nghut ri. 11 Byù má lúng é sô za a nghut jáng gi, byù rayùq myìt é hkyô pé lé, ó yùq wá wó sê lhê lhú? Haû eq rajung za, Garai Gasâng é Sô za a nghut jáng, Garai Gasang myìt é hkyô lé, ó yùq le wó sê é a nghut. 12 Ngá-nhúng gi, mingkân é sô lé hàp yu tô é a nghut é za, Garai Gasâng èq ngá-nhúng lé byî to bê jeju lé, ngá-mòq wó sê gyo râ matú, Garai Gasâng chyáng mâ é Sô lé shèq hàp yu tô é ru nghut lhê. 13 Haû mù luî, ngá-mòq gi, waxâng zô wui é hpàqchyî byéng-yá èq mhoq byî é dang dông taî é a nghut, Garaî é So èq mhoq byî é dang dông taî é shèq ru nghut mù, sô eq sêng é tengmán hkyô lé sô eq sêng é dang dông taî sân kyô é nghut lhê. 14 Haû Sô lé a wó é sû gi, Garai Gasâng é Sô mai lo é hkyô pé lé a hàp yu é nghut lhê; haî mù gâ le, haú pé gi, yhâng é matú ngòk é hkyô nghut luî, so é hkyô dông mai haú hkyô lé a wú é yánmai, yhang gi, haú pé lé a wó sê gyo nghut ri. 15 Sô eq sêng é byù gi, lhúnglháng lé wó jéyáng lhê, nghut kôlhang, yhang lé kúm gi, ó yùq èq le wó jéyáng é a nghut. 16 Chyúmdang má,
“Hkâsu mù gâ le, ó yùq wá, haû Yhûmsing é myìt lé sé mù, Yhang lé wó mhoqshit wú é lhú?”b
ga kâ tô ri. Nghut kôlhang, ngá-nhúng gi, Hkrisidùq é myìt lé wó é bang nghut lhê.