Poluq Lé Lagyô Pé Lhom Hàp Yu É Hkyô
2
Raxe myi zân laî é htâng má, ngò gi, Baranaba eq rahá Yerusalem wà mó má dum dòq ló é hkûn, Tituq lé le shuî chung é nghut lhê. 2 Garai Gasang byî é shing-rán eq rajung za dòq ló luî, ngò kut wú bê múzó eq ahkuî kut é múzó pé akôm a dùt pyám sháng gàq nghû, tûngbaù pê chyáng ngò hko kyô nyi é gabú danglù lé, haû sûwún dùt bâng é hí má za shap kyô é nghut lhê. 3 Nghut kôlhang, ngò eq rahá nghut é Tituq gi, Grik byù nghut kôle, yhang lé ahpyo-kuq a hpyit nhâng kó nghut ri. 4 Haû hkaû wang lo é mhaû é gu-mang wuì gi, Hkrisidùq Yesuq má ngá-mòq wó é lùthkyô má jówú luî, ngá-nhúng lé jùn dùt nhâng râ hên kô é yánmai, haú hkyô gabyông htoq lo é nghut ri.a 5 Nghut kôlhang, haû gabú danglu é tengmán hkyô gi, núngmòq chyáng jòq gîng nyì sháng gàq nghû, razùp za lháng, yhángmòq é dang lé ngá-mòq gyo byî é a nghut.6 Ahkyàk é byù su dùt é bang gi, yhángmòq haí jung kut kôlhang, ngò eq a séng nghut ri; Garai Gasang gi, du lé wú mù jéyáng é sû a nghut; byù haú bang gi, ngá é mungdang má haî le a jàt kat é za, 7 Petiruq gi, Yudaq byu péb lé, haû gabú danglù hko kyo râ mû má lum tô é hui bê eq rajung za, ngò gi, tûngbaù péc lé, haû gabú danglù hko kyo râ mû má lum tô é hui bê hkyô lé za, yhángmòq myang akô nghut ri. 8 Hkâsu mù gâ le, Yudaq byu pê é matú Petiruq lé lagyo ayá dáng byî é sû Garai Gasang gi, tûngbaù pê matú ngo lé le lagyo ayá dáng byi bê nghut lhê. 9 Haû hkúngmó-zîng su ahkyàk é, Yakuq, Petiruq eq Yohan pé gi, ngo lé byî tô é jeju lé myang sé kôjáng, ngò eq Baranaba lé, zùm yàp hkyô gâ é lòqyo lòq èq shi-kyâm yù kôluî, yhángmòq gi, Yudaq byu pê shut, ngá-nhik lé gi, tûngbaù pê shut ê râ lhê ga, myìt hui bekô nghut ri. 10 Yhángmòq gi, ngá-nhik mai myùng bang lé ru bûn nyì râ matú za pying kat akô; haû gi, ngò gyai yhang kut nau nyi é hkyô nghut lhê.
Petiruq Lé Poluq Htuqhtîng É Hkyô
11 Anti-oku wà mó má Petiruq jé lé é hkûn, yhang lé mara hûn râ hkyô jòq é yánmai, ngò gi, byu hí má yhang, yhang lé lhom htuqhtîng é nghut lhê. 12 Hkâsu mù gâ le, Yakuq chyáng mai lé é bang a jé shî é u lé, yhang gi, tûngbaù pé eq rahá chôm zo chôm shuq lhaq kut ri. Nghut kôlhang, haú bang jé é hkûn, yhang gi, ahpyo-kuq hpyit râ lhê gâ é hpúng má lom é bang lé gyùq é yánmai, tûngbaù pê chyáng mai htoq gang luî, yhang baú nyi tô ri. 13 Yhang, gègùn labyoq kut é hkyô má, gótû Yudaq byu pé le bo châng kut akô nghut mù luî, Baranaba lháng yhángmòq kut é gègùn labyoq hkyô má bo châng nghoq ló bê nghut ri. 14 Haû gabú danglu é tengmán hkyô eq rajung za, yhángmòq a cháng kô é lé myàng jáng, ngò gi, yhángmòq bànshoq bâng é hí má, Petiruq lé, “Nàng gi, Yudaq byù nghut to mù luî, Yudaq byù rayùq dông a nyi é za, tûngbaù rayùq dông nyì luî nhîng, tûngbaù pé lé Yudaq byu pê é htûngli hkâsu kut wó cháng nhâng râ lhú?
15 Ngá-mòq gi, yubàk dàp bang gâ é tûngbaù pé a nghut é za, hku é buìnyì mai yhang, Yudaq byù nghut to gù nghut lhê. 16 Byù gi, jep é târâ lé cháng luî mara hkyut san byi huî é a nghut é za, Yesuq Hkrisidùq lé lùmjíng é yánmai shèq mara hkyut san byi huî é hkyô lé, ngá-mòq sê lhê. Haû mù luî, ngá-mòq gi, jep é târâ lé cháng luî a nghut é za, Yesuq Hkrisidùq lé lùmjíng é yánmai, mara hkyut sân pyám byî é hui sháng gàq nghû, Yesuq Hkrisidùq lé lùmjíng bê nghut lhê; hkâsu mù gâ le, ó yùq le, jep é târâ lé châng é yánmai, mara hkyut san byî é hui râ a nghut.
17 Ngá-mòq gi, Hkrisidùq má ngá-mòq é mara hkyut san byî é hui râ hkyô ho nyi é hkûn, yubàk dàp é bang ngá-mòq nghut é lé myang é nghut jáng, mara lé gi, Hkrisidùq mai kut nhang é nghut lhê lhú? Ra-tsuí le a nghut. 18 Ngò gi, ngò hpyoq pyám bê hkyô lé dum saî kut é nghut jáng, târâ lu laî é byù ngò nghut é lé tûn shit ri. 19 Ngò gi, jep é târâ eq sêng é má, jep é târâ é yánmai shî jáng shèq, Garai Gasâng é matú wó dui nyì râ nghut lhê. 20 Ngò gi, Hkrisidùq eq rahá jén sat é hui bê nghut mù luî, ngá gûng ngò dui nyi é a nghut lo, Hkrisidùq shèq ngò má dui nyi é ru nghut lhê. Ahkuî, ngò gùngsho má chyungxe dui nyi é gi, ngo lé chyitdàp luî, ngá é matú yhâng gùng lé Yhang byî pyâm é, haû Garai Gasâng é Yhangzo lé lùmjíng é yánmai ru nghut lhê. 21 Ngò gi, Garai Gasâng é jeju lé tô pyâm é a nghut, hkâsu mù gâ le, díngmán é hkyô lé, jep é târâ dông wó yu é ru nghut le gi, Hkrisidùq shî hkâm é gi, akôm dùt byùq râ nghut lhê.” nghû taî é nghut lhê.