Lùmjíng Myìt Lhú? Jep É Târâ Lhú?
3
Galatiq mau mâ é byùbâm pé ê! Yesuq Hkrisidùq gi, tapzîng má jén sat hui bê hkyô lé, núngmòq é myòq má bò nhang to bê le nhîng, ó yùq èq wá núngmòq lé lâng nghoq yû bekô lhú? 2 Núngmòq gi, haû Sô lé, jep é târâ cháng luî wó yû kô é nghut lhê lhú? A nghut jáng, núngmòq wó gyô yu é gabú danglù lé lùmjíng luî wó yû kô é nghut lhê lhú? Haû rahkat lé za, ngò sê yû nau ri. 3 Núngmòq gi, haú í yhang bâm akô lhú? Haû Sô lé lùmhkaû mù kut hî kôluî nhîng, ahkuî, gùngsho wum-o lé lùmhkaû mù, yhûmsîng myìt tô é hkyô lé lhoqpán râ matú shi-kùt nyi akô lhú? 4 Núngmòq, myo myo hpuzô pyâm é gi, akôm nghut akô lhú? Gè gè yhang, haû gi, akôm nghut byùq bekô lhú? 5 Garai Gasang, núngmòq lé Yhâng é Sô byî é htoq agó, núngmòq chyáng làklaí alhô agàn kut é gi, jep é târâ lé núngmòq châng é yánmai nghut akô lhú? A nghut jáng, núngmòq wó gyô é gabú danglù lé, núngmòq lùmjíng é yánmai nghut akô lhú?6 “Abraham gi, Garai Gasang lé lùmjíng bê nghut mù, yhang lé díngmán sû ga sôn yu é hui bê nghut ri.”a ga, Abraham eq séng luî taî tô é lé myìt wú keq. 7 Haû mù luî, lùmjíng myìt bo é bang gi, Abraham é yhang zô péb yhang dùt bê nghut é hkyô lé sé keq. 8 Lùmjíng myìt é yánmai, tûngbaù pé lé Garai Gasang mara hkyut san byi râ nghut lhê ga, Chyúmdang mai hí byu-myang to bê nghut mù luî, Abraham lé hí shit kyô tô é gabú danglù gi, “Náng é yánmai, byùhú chângjup gi, shimân jeju wó yû kôrâ nghut lhê.”c gâ ri. 9 Haû mù luî, lùmjíng myìt bo é bang gi, lùmjíng myìt bo é Abraham eq rahá, shimân jeju lé myang hkam yù kôrâ nghut lhê.
10 Jep é târâ châng é hkyô má ngè hkau é lhúnglhâng bang gi, nhîng pyâm é hui bang chyat nghut lhê. Hkâsu mù gâ le, “Târâ laiká má kâ tô é lhúnglháng lé a xoq kut é sû, ó yùq nghut kôle, nhîng pyâm é hui kôrâ nghut lhê.”d ga luî, kâ tô ri. 11 Hau htoq agó, “Haû díngmán sû gi, lùmjíng myìt mai chyungxe duì râ nghut lhê.”e ga kâ tô é yánmai, ó yùq nghut kôle, Garai Gasâng é hí má jep é târâ lé cháng luî, mara hkyut san byî é a huî é hkyô gi, san za nghut bê nghut ri. 12 Haû jep é târâ gi, lùmjíng myìt eq haî a sêng é nghut luî, “Haú pé dông châng é sû gi, haú pé mai chyungxe duì râ nghut lhê.”f ga kâ tô ri. 13 Haû Chyúmdang má, “Sik zîng má jén lhâng to huî é sû ó yùq nghut kôle, nhîng pyâm é hui sû nghut ri.”g ga kâ tô é eq rajung za, Hkrisidùq gi, ngá-nhûng é matú nhîng pyâm é hui sû dùt bê nghut é yánmai, jep é târâ mâ é nhîng é hkyô mai ngá-nhúng lé hkyi yù bê nghut ri. 14 Haû Abraham lé byî tô é shimân jeju gi, Hkrisidùq Yesuq é yánmai tûngbaù pê chyáng le jé sháng gàq ga, Yhang ngá-nhúng lé hkyi yu é nghut ri; haû mù, ngá-nhúng gi, danghtum htûm tô é Sô haû lé, lùmjíng myìt mai wó yû râ nghut lhê.
Jep É Târâ Eq Htûm Tô É Danghtum
15 Gu-mang wuì ê, nyí wui é chyungxe duì hkyô mâ é lé dangtú yù mù, ngò núngmòq lé taí kôlé, byù mai chôm tô tô é dangshikaq lé, ó yùq èq le wó lhoqhpyoq pyám râ a nghut, ó yùq èq le haú má wó jàt kat râ a nghut. 16 Abraham eq yhâng é awùt ashín lé danghtum htûm tô é le haû eq rajung za nghut ri. “Awùt ashîn pé lé” gâ é dang gi, byù myo myo lé gâ lhê; nghut kôlhang, haû Chyúmdang má, haû lé taí nau é a nghut é za, “náng é awùt ashín lé”h ga taí nau é ru nghut lhê, hau é lichyúm gi, byù rayùq lé za taî é nghut lhê, haû gi, Hkrisidùq nghut ri; 17 haû mù luî, ngò taí nau é gi, Garai Gasang, dangshikaq tô tô é htâng, myí sho sum xê zàn má lé jòq é târâ gi, dangshikaq haû lé le wó lhoqhpyoq pyám râ a nghut, danghtum htûm tô é lé le wó lhoqhtên pyám râ a nghut. 18 Hkâsu mù gâ le, haû silî wunlî gi, jep é târâ eq sêng lhûm é nghut jáng, danghtum htûm tô é eq gi, haî le a sêng lhum lo nghut ri; nghut kôlhang, Garai Gasang gi, Yhâng é jeju yánmai, Abraham lé danghtum htûm tô é dông silî wunlî haû byî to bê nghut ri.
19 Haû su nghut jáng, haû jep é târâ gi, hai a-kyû bò râ lhú? Haû gi, danghtum htûm tô é dông lhoq-âng tô é awùt ashín nghut é sû jé lé é hkûn jé shoq, mara kut shut nyi bùm kô é yánmai, jàt kat tô é nghut lhê; jep é târâ haû gi, maumang lagyô pé mai gyoro sô xoq byí sui é lòq dông byî tô é ru nghut lhê. 20 Gyoro sô xoq byi sû gi, rahkyam shut mâ é bang eq baú sêng é a nghut, nghut kôlhang, Garai Gasang gi, rayùq za nghut lhê.
21 Haû mù luî, jep é târâ gi, Garai Gasang danghtum htûm tô é pé eq htuqhtîng lhûm lhê lhú? Ra-tsuí le a nghut. Hkâsu mù gâ le, dui é chyungxe wó byî é jep é târâ lé byî to bê nghut le gi, gè gè yhang, díngmán hkyô gi, jep é târâ mai lò râ nghut lhê. 22 Nghut kôlhang, mingkan gón mâ é bang gi, yubàk marâ é htóngbyu pé chyat nghut akô ga Chyúmdang má bo tô ri; haû mù luî, haû danghtum htûm tô é lé gi, Yesuq Hkrisidùq lé lùmjíng é bang lé byi râ nghut lhê.
23 Lùmjíng hkyô haû a jé shi-má, ngá-nhúng gi, haû jep é târa èq htóngbyû dông lhûng tô é hui luî, lùmjíng hkyô haû htoq shit é hkûn jé shoq myhî lhûng tô é huî wú bê nghut lhê. 24 Haû mù luî, ngá-nhúng gi, lùmjíng é yánmai mara hkyut san byî é hui sháng gàq ga, jep é târâ gi, ngá-nhúng lé Hkrisidùq chyáng shuî ê râ matú, ngá-nhûng é hkyô-u shê sû dùt bê nghut ri. 25 Ahkuî kúm gi, haû lùmjíng hkyô jé bê nghut é yánmai, ngá-nhúng gi, haû jep é târâ mai hkyô-u she é lòqhkaû má a nghut lo.
Garai Gasâng É Yhang Zô Pé
26 Núngmòq lhúnglhâng bang gi, Hkrisidùq Yesuq lé lùmjíng é yánmai, Garai Gasâng é yhang zô pé nghut bê; 27 Hkrisidùq má wuìmyhup hkám bê é bang núngmòq bànshoq gi, Hkrisidùq lé mèbu su wùt to bekô nghut ri. 28 Núngmòq lhúnglhâng bang gi, Hkrisidùq Yesuq má rading ralhum za nghut é yánmai, Yudaq byù nghu é eq Grik nghu é, jùn nghu é eq lùthkyô nghu é, yùqgè nghu é eq myiwe nghu é, a gam hkoq lo nghut ri. 29 Núngmòq gi, Hkrisidùq eq séng bekô nghut jáng, Abraham é awùt ashín pé le, haû danghtum htûm tô é eq rajung za silî wunlî hkam yù bang le, nghut akô nghut ri.