4
Ngò taí nau é lichyúm gi, haû a-myû hkûngxoq dùt râ sû gi, i-kun sùtzè bànshoq lé sîng ang sû nghut kôlhang, yhang, zoshâng nghut ashî hkûn gi, jùn hpó eq haî a shaî nghut ri. 2 Yhang gi, yhâng wa masàt tô é ahkyíng jé shoq, yhang lé zúng é sû eq yhûm lé ùp su é a‑ô má ru lúng nyi ashî nghut ri. 3 Haû eq rajung za, ngá-nhúng le zoshânga nghut é hkûn gi, mingkan ùphkâng târâ ô má jùn dut nyi é bang nghut lhê. 4 Nghut kôlhang, ahkyíng lo ngàp jáng, zo dùt râ ahkáng lé byíng shoq, ngá-nhúng wó yû sháng gàq ga, Garai Gasang gi, jep é târâ hkaû mâ é byu pé lé hkyi yù râ matú, 5 jep é târâ hkaû má, myiwe mai hku kat nhang é Yhang Zo lé, nhang kat byi bê nghut ri. 6 Hkâsu mù gâ le, núngmòq le, zo wuî nghut bê yánmai, “Aba, Âwa ê.” ga dàt wùt é, Yhang Zô é Sô lé, Garai Gasang gi, ngá-nhûng é i‑myìt ûnghkaû má kat byi bê nghut ri. 7 Haû mù luî, nàng gi, jùn a nghut lô é za, zo rayùq nghut bê nghut ri; nàng gi, zo rayùq nghut é yánmai, Garai Gasang gi, nang lé Yhâng é a-myû hkûngxoq dùt nhâng bê nghut ri.Galatiq Mau Bang Lé Poluq Myìt Chiq Byî É Hkyô
8 Hí hkûn, Garai Gasang lé núngmòq a sé shî é u lé, núngmòq gi, nàt hparà lháng a nghut bâng é a‑ô má jùn dùt é bang nghut ri. 9 Ahkuî kúm, Garai Gasang lé núngmòq sé bê nghu é htoq agó, Garai Gasang gi, núngmòq lé sé bê nghut le nhîng, núngmòq gi, hkâsu mù, haû wum nyhôm é eq a-kyû a byî é, mingkan ùphkang é târâ shut dum lhing taû ló nyi akô lhú? Núngmòq gi, haú pê èq jùn zô é dum hui zó nau akô lhú? 10 Núngmòq gi, buìnyì wú, lhôhkyap wú, ahkyíng yàm-yòq wú, zànwut wú é hkyô pé lé, ahkyàk kut nyi ashî kó nhung! 11 Núngmòq chyáng ngò wum kat pyâm é hkyô gi, akôm dùt bê âbe nghû, núngmòq é matú ngò myìt chiq nyi ri.
12 Gu-mang wuì ê, ngò gi, núngmòq su dùt bê nghut é yánmai, núngmòq le ngò su dùt keqb nghû, núngmòq lé dûng tôngbán kat lhê. Núngmòq gi, ngo lé haî le a kut shut wú kô é nghut lhê. 13 Sânghî dàm ngò núngmòq lé gabú danglù hko kyô é hkyô gi, núngmòq sê é eq rajung za, ngò nòhpyo huî é yánmai nghut lhê. 14 Ngá é nòhpyo gi, núngmòq é matú wuîhke hkyô dùt kôlhang, núngmòq gi, ngo lé a wú tiq pyám kô é htoq agó, a wú chaq pyám kô é za, Garai Gasâng é maumang lagyo rayùq lé su le, Hkrisidùq Yesuq lé su yhang le, ngo lé lhom hàp yù kô é nghut lhê. 15 Haû sû é nhîng, núngmòq é gabú hkyô bànshoq gi, haî dùt byùq bekô lhú? Núngmòq gi, ru wó dùt é nghut jáng, núngmòq é myòqjí lé choq yû mù, ngo lé wám byî pyám kôrâ í dùt laî lò bê hkyô lé, ngò sàksé wó hkâm lhê. 16 Ahkuî, ngò gi, núngmòq lé haû tengmán hkyô taî kyô é yánmai, núngmòq é gyè dùt to bê nghut lhê lhú?
17 Haû byù góbang gi, núngmòq lé gyai shîrong é hkyô tûn shit ri; nghut kôlhang, ge é hkyô haî a bò; yhángmòq ô nau é hkyô gi, yhángmòq lé núngmòq taû shirông kó âbe ga, núngmòq lé ngá-mòq chyáng mai lhoqkâng yù râ matú ru nghut lhê. 18 Ge é hkyô lé shîrong é gi, ge lhê; ngò eq rahá nyi é hkûn za a nghut, hkâ-nhám le haû su shîrong le ge lhê. 19 Ngò chyitdàp é zo wuî ê, Hkrisidùq é a-kyang núngmòq má gúmjùp lo é jé shoq, ngò gi, zo hkû nò no é su radàm dum hkâm zô nyì luî, 20 núngmòq é hkyô lé myìt wuîhkê tô é yánmai, ahkuî, núngmòq eq rahá myang nyì mù, ngò taî é danghtê wó htaí râ matú, gyai yhang myòqbyu nyi lhê ô.
Hagara eq Sara Nhik É Hkyô
21 Haû jep é târâ ô má nyì nau é bang ê, núngmòq gi, jep é târâ má taî é hkyô lé a sê gyo kô é nghut lhê lhú? Ngo lé taî kyô wú kô làq. 22 Hkâsu mù gâ le, Abraham gi, yùqzo í yùq wó ri; rayùq gi, jùn myhî é yhang zo, rayùq gi, jùn myhí a nghut su é yhang zo, ga kâ tô ri. 23 Haû jùn myhî é yhang zo gi, gùngsho dông hku lé é sû nghut kôlhang, jùn myhí a nghut su é yhang zo kúm gi, danghtum htûm tô é eq rajung za hku lé é sû ru nghut lhê.
24 Haú hkyô pé gi, dangtú ru nghut lhê, myiwe haû í yùq gi, dangshikaq í lhum eq wuí lhê; dangshikaq ralhum gi, Sinaq Bùm mâ éc nghut luî, jùn dùt râ nghut é zo wuî lé hku kat é Hagara lé taí nau é nghut ri. 25 Hagara haû gi, Arabi-a mau mâ é Sinaq Bùm lé taí nau é nghut luî, ahkui lhê é Yerusalem wá mó eq wuí nyi ri. Hkâsu mù gâ le, Yerusalem haû gi, yhang zô pé eq rahá, jep é târa é jùn dùt nyì kô é yánmai nghut lhê. 26 Nghut kôlhang, ahtoq mâ é Yerusalem gi, jùn myhí a nghut sû nghut luî, ngá-nhûng é înu nghut ri. 27 Hkâsu mù gâ le,
“Zoshâng a hku é baùdung myhí ê, gabú nyî àq. Zo hkû nò a no wú shî é myiwe gi, gabú luî, gabú garû nyì àq;
hkâsu mù gâ le, haû chamchyuîyuì dùt é myiwe myhí gi, làng wó é myiwê htoq má zo wuî je myô wó bê nghut ri.”
ga kâ tô ri.d
28 Gu-mang wuì ê, ahkuî, núngmòq gi, Isak su, danghtum htûm tô é zo wuî nghut bê nghut ri. 29 Haú hkûn lé, haû gùngsho dông hku lé lo é sû gi, Sô wum-o dông hku lé lo é sû lé zing-rî ri. Haû eq rajung za, ahkuî le dùt nyi ri. 30 Nghut kôlhang, Chyúmdang má hkâsu ga kâ tô ri lhú gâ le, “Haû jùn myhí eq yhang zo yùqzo lé hkat htoq pyám aq; hkâsu mù gâ le, haû jùn myhî é yhang zo yùqzo gi, jùn myhí a nghut su é yhang zo yùqzo eq rahá, silî wunlî lé wó chôm hkam yù râ a nghut.”e gâ ri. 31 Haû mù luî, gu-mang wuì ê, ngá-nhúng gi, jùn myhî é yhang zô pé a nghut é za, jùn myhí a nghut su é yhang zô pé ru nghut lhê.