Hkrisidùq Mâ É Lùthkyô
5
Ngá-nhúng lùthkyô wó râ matú, Hkrisidùq gi, ngá-nhúng lé lhoqlhut kat bê nghut ri. Haû mù luî, haû má ru gîng nyì mù, yhûmsing gùng lé jun é wòlai hkaû má hkâtaû baínaî nyì kó.2 Ngá dang lé xûm yu to keq! Ngò Poluq, núngmòq lé taî kyo kôlé, núngmòq ahpyo-kuq hpyit hkam yù kô é nghut jáng, Hkrisidùq gi, núngmòq é matú hai a-kyû le bò râ a nghut. 3 Hau htoq agó, ahpyo-kuq hpyit hkam yu é sû ó yùq lé nghut kôle, ahpyo-kuq hpyit é sû gi, jep é târâ lhúnglháng lé châng kut râ lhê nghû, ngò kyô kat lhê. 4 Jep é târâ châng shi-kùt é dông mara hkyut san byî é hui naû bang, núngmòq gi, Hkrisidùq eq gâng lhûm to bekô nghut luî, haû Garaî jeju mai le byìt gyó byùq bekô nghut ri. 5 Ngá-mòq kúm gi, myìt myòqbyu tô é díngmán hkyô lé, haû So é yánmai lùmjíng myìt èq gyai yhang láng nyi é bang nghut lhê. 6 Hkâsu mù gâ le, Hkrisidùq Yesuq má gi, ahpyo-kuq hpyit é nghut nghut, ahpyo-kuq a hpyit é nghut nghut, hai a-kyû a bò nghut ri; chyitdàp myìt mai htoq lo é lùmjíng myìt za shèq, a-kyû bo lhê.
7 Núngmòq gi, rago din wú bekôa nghut é wá, haû tengmán hkyô lé a cháng sháng gàq ga, núngmòq lé ó yùq èq hkûm zing pyám kô é lhú? 8 Haû su kut mhoq hpyoq yu é hkyô gi, núngmòq lé ji yù Su chyáng mai htoq lo é a nghut. 9 “Mún ra-tsuí zo gi, mùk long gón lé wó lhoqdaû lhê.”b gâ é dang jòq lhê. 10 Nghut kôlhang, núngmòq gi, gótû hkyô dông a lhom yù kôrâ nghut lhê nghû, Hkrisidùq má hkyak ngò myìt lum nyi lhê. Núngmòq lé lhoqbyòk byî é sû, ó yùq nghut kôle, yhûmsing é mara eq rajung za dam byî é hui zo râ nghut lhê. 11 Gu-mang wuì ê, ahpyo-kuq hpyit é hkyô lé, ngò rû hko nyi ashî nghut le gi, haî mù luî, zing-rî é lé ngò hui zô nyì râ lhú? Haú su kut é nghut jáng, haû tapzîng eq séng luî, manghkáng jòq râ a nghut lo. 12 Núngmòq lé lhoqbyòk nyi é bang gi, hau htoq chyân luî, yhûmsing gùng yhûmsîng bànshoq hpyit pyám kó sháng gàq nghû, ngò wó myìt ri.
13 Gu-mang wuì ê, núngmòq gi, lùthkyô wó râ matú ji yù huî é bang nghut akô; nghut kôlhang, núngmòq é lùthkyô ahkáng lé, yubàk gùngsho má hkâcháng nhâng kó, chyitdàp myìt mai kúm gi, rayùq eq rayùq dójaú lhûm nyì keq. 14 Hkâsu mù gâ le, “Náng gûng lé nàng chyitdàp é su, náng é chyáng nâm mâ é bang lé le chyitdàp àq.”c gâ é hkunmó má za, jep é târâ bànshoq lo bo to bê nghut lhê. 15 Núngmòq, rayùq eq rayùq ngàt lhum myui lhûm nyì kô é nghut le gi, rayùq eq rayùq lhoqhtên pyâm lhum kôrâ nghut é lé, sidìq nyì keq.
So Èq Chyungxe Duì Râ Hkyô
16 Nghut kôlhang, ngò taí kôlé, Sô shuî û é dông chyungxe dui nyì keq; haú hkûn, núngmòq gi, yubàk gùngsho ô nau é hkyô cháng kôrâ a nghut. 17 Hkâsu mù gâ le, yubàk gùngsho ô naù hkyô gi, Sô eq shai lhûm nyì; Sô gi, yubàk gùngsho ô naù hkyô eq shai lhûm nyì, dùt ri. Haû í lhum gi, gyè dut lhûm ri; haû mù, núngmòq gi, yhûmsîng ô nau é dông hkâkut kó. 18 Nghut kôlhang, núngmòq lé So èq hkyô hî é nghut jáng, núngmòq gi, jep é târâ ô má a nghut lo nghut ri.
19 Yubàk gùngshô é múzó gi, de de yhang nghut lhê; haú pé gi, ashop é dông gùngsho zùm yàp é hkyô, a sân-yúng é hkyô, shut é dông nyì zô lhúm nau é myìt, 20 hparà noq hkyô, mhántán lòklèq kut é hkyô, a naù a wôm é hkyô, byòq lhûm é hkyô, mânon é hkyô, nhiksoqsup é hkyô, yhûmsing wuízàt é hkyô, gâng lhum sê é hkyô, hpúng gam é hkyô, 21 ningsû é hkyô, î shuq wùt é hkyô, zo yê shuq yê mù achaq achyut kut é hkyô pé eq haú pé su kut é gótû hkyô pé nghut ri; haû su kut nyì yàp é bang gi, Garai Gasâng mîngdán é silî wunlî lé wó hkam yù râ a nghut nghû, ngò, hí hkûn núngmòq lé taî wú bê eq rajung za, ahkuî le, núngmòq lé ngò sidìq byî nyi lhê.
22 Nghut kôlhang, So é ashi gi, chyitdàp hkyô, gabú hkyô, nguì ngón hkyô, myìt hîng hkyô, nhik‑u nû é hkyô, ge é hkyô, lhumzui hkyô, 23 nûm é hkyô, yhûmsing gùng lé wó hkang é hkyô pé nghut ri. Haú hkyô pé lé hkûm zing pyám râ târâ haî le a jòq nghut ri. 24 Hkrisidùq Yesuq eq séng bê bang kúm gi, yubàk gùngsho ô naù hkyô lé le, hau é yùt yùt ô naù myìt eq shîrong é hkyô pé lé le, tapzîng má jén sat pyám bekô nghut ri. 25 Ngá-nhúng gi, Sô mai chyungxe duì bê nghut mù, haû Sô htâng châng nyì sháng. 26 Ngá-nhúng gi, akôm gyáng dang taí luî, rayùq eq rayùq jèq ho lhûm é eq mânon lhûm é bang, a dùt nyì sháng gàq.