Yerusalem Wà Mó Mâ É Lùmjíng Bâng É Matú Alû Hkyuî Râ Hkyô
16
Ahkuî, Garai Gasâng é byu pê é matú alû hkyuî râ hkyô eq séng luî gi, haû Galatiq mau mâ é noqkuq hpûng pé lé ngò kut nhang é su kut keq. 2 Ngò jé lé é hkûn, alû hkyuî râ hkyô a kut ra râ dông, bàt hkangmó mâ é sânghî nyí má, yùq hkangmó gi, yhûmsîng wó ho é má cháng mù, gam tô to láng keq. 3 Ngò jé lé é hkûn, ngò gi, núngmòq hkyin tô é byu pé lé, shit kyô é laiká pé byi mù, núngmòq é chyûnghuq lé, Yerusalem wà mó má ê dé nhâng râ nghut lhê. 4 Ngò le ê ang râ dùt é nghut jáng, yhángmòq gi, ngá é byìnzùm kut râ nghut lhê.Poluq Lum Kat É Hkyô Pé
5 Ngò gi, Makedoni mau laî byìt é htâng, núngmòq chyáng jé lé râ nghut lhê. Hkâsu mù gâ le, ngò gi, Makedoni mau laî byìt râ za nghut lhê. 6 Ngò hká má ê kôlhang, ngá é hkyôwuì má núngmòq wó garúm kat kôrâ matú, ngò gi, rayòq zo nghut nghut, gyòqmyò lháng lai shoq nghut nghut, núngmòq eq rahá nyì âbe. 7 Ngò gi, laî ló uchyang za núngmòq lé lé kum râ nghut mù, ahkuî wó myâng râ lé a nau é nghut lhê; ngò gi, haû Yhûmsîng dóng é nghut jáng, núngmòq eq rahá rayòq nyì râ lé myìt myòqbyu lhê. 8 Nghut kôlhang, ngò gi, Penteko-ti poî buìnyì jé shoq Ehpesu wà mó má nyì râ nghut lhê. 9 Haî mù gâ le, ngo lé htuqhtîng é bang myo myo nyi é nghut kôlhang, a-kyû htoq é múzó é matú hkum mó ngo lé hpông to byî é yánmai nghut lhê.
10 Timohti jé lé jáng, yhang, núngmòq eq rahá nyi é u má, gyùq é hkyô haî le a jòq râ matú wú byi keq; hkâsu mù gâ le, yhang gi, haû Yhûmsing é múzó lé, ngò su wùn wàq wún é sû nghut lhê. 11 Haû mù, ó yùq le, yhang lé hkâwú shóm kó. Yhang gi, ngá chyáng wó dum taû jé sháng gàq, yhâng é hkyôwuì má nguì ngón é dông nhang kat keq. Haû gu-mang wuì eq rahá lò kôrâ lé, ngò myìt láng nyi lhê.
12 Ahkuî, ngá-nhûng é gu-mang Apolo é hkyô eq séng luî ga jáng: yhang gi, haû gu-mang wuì eq rahá núngmòq chyáng lé râ lé, ngò, gyai yhang wum taî tsuq lhê. Yhang kúm gi, ahkuî lé nau é myìt a dê bò shi, nghut kôlhang, yùqyo é ahkyíng wó jáng, yhang lé lô râ nghut lhê.
13 Machyâ nyî keq; lùmjíng hkyô má ging ging tíng tíng yàp nyì keq; gyùq kyûm myìt hkâbô kó; wúm bo nyì keq. 14 Jung hkangmó lé, chyitdàp myìt eq zui saí keq.
15 Sitehpana eq yhâng é yhûmbyù wuì gi, Ahkai-a mau má sânghi hpúng wâng bang nghut luî, yhángmòq gi, yhûmsing gùng lé, haû sân-yúng bâng é dójaú hkyô má àp nhông bekô lé, núngmòq sê akô nghut ri. Gu-mang wuì ê, ngò, núngmòq lé wum taî tsuq kat kôlé, 16 haû sû é bâng é a‑ô má le, haû múzó má bo wang lòm mù, mú zui shi-kùt bang yùq hkangmó é a‑ô má le, nyì keq. 17 Ngò gi, Sitehpana, Hporitunatu eq Ahkaiku pé jé lo é hkûn, gyai gabú é nghut lhê, haî mù gâ le, yhángmòq gi, núngmòq a kut byî é hkyô lé, lhoqpyíng byi bekô nghut ri. 18 Hkâsu mù gâ le, yhángmòq gi, ngá é sô eq núngmòq é sô lé lhoqngón byi bekô nghut ri. Haû sû é bang lé, hpautap nyî keq.
Ló Htâng É Shi-kyám Dang
19 Asi-a mau mâ é noqkuq hpúng pé gi, núngmòq lé shi-kyâm kat akô. Akula eq Prisikila nhik le, yhángnhik é yhûm má chôm huî é noqkuq hpúng lé, haû Yhûmsîng má núngmòq lé gyai yhang shi-kyâm kat akô. 20 Shí má nyi é gu-mang wuì bànshoq bang gi, núngmòq lé shi-kyâm kat akô. Rayùq eq rayùq chyoiyúng é chyitpuq èq shi-kyâm lhum keq.
21 Ngò, Poluq gi, shi-kyám dang shî lé, ngá é lòq èq yhang kâ é nghut lhê.
22 Rayùq yùq, haû Yhûmsîng lé a chyitdàp é nghut jáng, haú yùq gi, nhîng pyâm é hui sháng gàq. Yhûmsîng ê, jé lé àq hkoi!
23 Haû Yhûmsîng Yesuq é jeju gi, núngmòq eq rahá nghut nyî sháng gàq.
24 Ngá é chyitdàp myìt gi, Hkrisidùq Yesuq má núngmòq bànshoq bâng chyáng jòq nyì sháng gàq. Amen.