Hkrisidùq É Dui Toq Hkyô
15
Gu-mang wuì ê, ngò, núngmòq lé hko kyo bê nghut mù, núngmòq le hàp yù luî, núngmòq yàp gîng tô é jowò nghut é gabú danglù hkyô lé, ahkuî, ngò, núngmòq lé lhoqpûn kat nau ri. 2 Ngò, núngmòq lé hko kyo bê é mungdang lé, núngmòq ging ging myhik zing nyì kô é nghut jáng, núngmòq gi, gabú danglù hau é yánmai hkyi yù huî é nghut akô. Haû a nghut jáng, núngmòq lùmjíng é gi, akôm dùt bê nghut lhê.3 Ngò hàp yu tô é pé lé, sânghi ahkyàk é dông, ngò, núngmòq lé lhai byi bê nghut lhê. Haú pé gi, Chyúmdang eq rajung za, Hkrisidùq gi, ngá-nhûng é yubàk marâ é matú shî hkám byi bê gâ é nghut ri; 4 Yhang gi, myhup yhûm é hui luî, Chyúmdang eq rajung za sum nyí nghu é nyí má lhoqdui toq é hui bê nghut mù, 5 Petiruq lé htoq shit luî, haû lagyo raxe í yùq lé le htoq shit ri. 6 Hau htâng má, Yhang gi, ra-u má za, gu-mang wuì ngo shô yùq chyân lé htoq shit ri. Haú bang mâ é myo hpyang gi, ahkuî jé shoq chyungxe dui nyi bum akô; ra-am kúm gi, shi ló byùq bekô nghut ri. 7 Hau htâng, Yhang gi, Yakuq lé htoq shit mù lagyô pé bànshoq bang lé htoq shit ri. 8 Ló htâng má, Yhang gi, hkû buìnyì a jé shî é má hku é dông nghut sû ngo lé le htoq shit bê nghut ri.
9 Hkâsu mù gâ le, ngò gi, lagyô pé mâ é tiq dik sû nghut lhê. Haû Garai Gasâng é noqkuq hpúng lé zing-ri sû nghut é yánmai, ngò gi, lagyo rayùq nghû râ lháng a gíngdán é sû nghut lhê. 10 Nghut kôlhang, ngò ahkuî îsu wó nghut nyi é gi, Garai Gasâng jeju mai nghut lhê. Yhâng é jeju gi, ngá chyáng akôm a dùt é za, ngò gi, yhángmòq bànshoq bâng htoq má je riyhang mû wùn wàq shi-kùt lhê. Haû gi, ngò kut é a nghut, ngò eq rahá nghut nyi é Garai Gasâng jeju shèq ru nghut lhê. 11 Haû mù luî, ngò nghut nghut, yhángmòq nghut nghut, ngá-mòq hko kyô é gi, haú hkyô chyat nghut luî, núngmòq lùmjíng é le, haú hkyô nghut ri.
Shi Byùq Bâng É Dui Toq Hkyô
12 Nghut kôlhang, haû Hkrisidùq shi é mai lhoqdui toq é hui bê hkyô lé hko kyô nyì bê nghut mù, núngmòq mâ é ra-am gi, shi byùq bâng é dui toq hkyô a jòq nghû, hkâsu wó taí kôrâ lhú? 13 Shi byùq bâng é dui toq hkyô a jòq é ru nghut le gi, Hkrisidùq le lhoqdui toq é hui berâ a nghut. 14 Hau htoq agó, Hkrisidùq gi, lhoqdui toq é a huî é ru nghut le gi, ngá-mòq hko kyô é hkyô eq, núngmòq é lùmjíng hkyô gi, akôm dùt byùq râ nghut lhê. 15 Hau htoq agó, Garai Gasang gi, haû Hkrisidùq lé shi é mai lhoqdui toq bê hkyô lé, ngá-mòq sàksé hkám bê nghut é yánmai, ngá-mòq gi, Garai Gasâng é hkyô má sàksé a-pyoq pé dùt byùq râ za nghut lhê. Nghut kôlhang, shi byùq bang lhoqdui toq huî é hkyak a jòq é ru nghut le gi, Garai Gasang, Yhang lé lhoqdui toq kat râ a nghut. 16 Hkâsu mù gâ le, haû shi byùq bang lhoqdui toq é a huî é nghut jáng, Hkrisidùq le, lhoqdui toq é hui berâ a nghut. 17 Hkrisidùq gi, lhoqdui toq é a huî é nghut jáng, núngmòq é lùmjíng hkyô gi, akôm dùt luî, núngmòq gi, núngmòq é yubàk mara hkaû má rû nyi nyì shi kôrâ nghut lhê. 18 Haû nghut jáng, Hkrisidùq má shi ló byùq bê bang le, htên byòq byùq râ za nghut lhê. 19 Ngá-nhúng gi, shí i-pyàt lhê é matú za, Hkrisidùq má myìt myòqbyù hkyô wó é nghut jáng, byù bànshoq bâng htoq má shogyo rayhup dùt é je hui zo bang dùt kôrâ nghut lhê.
20 Nghut kôlhang, Hkrisidùq gi, gè gè yhang shi é mai lhoqdui toq é hui bê nghut mù, shi ló byùq bâng é sânghî ashi dùt bê nghut ri. 21 Hkâsu mù gâ le, shî‑nò hkyô gi, byù rayùq dông mai lò bê nghut é eq rajung za, shi byùq bâng é dui toq hkyô le, byù rayùq dông mai lo é nghut lhê. 22 Hkâsu mù gâ le, lhúnglhâng bang gi, Adam é yánmai shi byùq é su, lhúnglhâng bang gi, Hkrisidùq eq rading ralhum za nghut é yánmai lhoqdui toq é hui râ nghut lhê. 23 Nghut kôlhang, yùq hkangmó gi, ó le ó âng é hkûn lhoqdui toq é hui râ nghut lhê: Hkrisidùq gi, sânghi lhoqdui toq huî é sû nghut lhê. Hau htâng má, Yhang jé lé é hkûn, Yhang eq sêng é bang lhoqdui toq é hui râ nghut lhê. 24 Hau htâng, jihtûm jé râ nghut lhê; haú hkûn, Yhang gi, ùp é bang bànshoq, ahkáng ayá eq a-tsam pé lé ban lhoqhtên pyâm é htâng, haû Îwa nghut sû Garai Gasang lé mîngdán àp byi râ nghut lhê. 25 Hkâsu mù gâ le, Yhang gi, Yhâng é gye pé bànshoq lé, Yhâng é hkyîwang ô má tô pyâm é hkûn jé shoq ùp nyì ra râ nghut lhê. 26 Haû lhoqhtên pyâm é hui râ nghut é ló htâng é gyè gi, shî‑nò hkyô nghut ri. 27 Hkâsu mù gâ le, “Garai Gasang gi, jung hkangmó lé, Yhâng é hkyîwang ô má tô pyám bê nghut ri.”a ga Chyúmdang má kâ tô ri. “Jung hkangmó lé” Yhâng é a‑ô má tô pyám bê ga taî é hkûn, jung hkangmó lé Hkrisidùq é a‑ô má tô pyám bê sû Garai Gasang yhang kúm a lom é hkyô, san za nghut nyi ri. 28 Yhang gi, haú hkyô ban kut é htâng má, haû Zo yhang le, jung hkangmó lé Yhâng é a‑ô má to byi bê sû Garai Gasâng é a‑ô má nyì sû dùt nhang é hui râ nghut mù, Garai Gasang gi, lhúnglhâng htoq má gyaú sû nghut luî, lhúnglháng lé sîng sû nghut râ nghut lhê.
29 Dui toq hkyô a jòq é ru nghut le gi, shi byùq bê bâng é matú wuìmyhup hkám byî bùm kô é gi, hai a-kyû bò kôrâ lhú? Haû shi byùq bang lhoqdui toq é a hui kô é ru nghut le gi, yhángmòq matú haî mù byu pé wuìmyhup hkâm yù kôrâ lhú? 30 Ngá-mòq gi, ngá-mòq é matú, hkyíng hkangmó haî mù chiq râ jowò má nyì râ lhê lhú? 31 Gu-mang wuì ê, ngò gi, nyí wuî alùq shoî shoî shi é hui zô é nghut lhê. Haû su nghu é gi, ngá-nhûng é Yhûmsîng Hkrisidùq Yesuq má, núngmòq é hkyô lé ngò hkyak wó taî nghutbûn é yánmai nghut lhê. 32 Ngò gi, xângzo hkyam dông mai za, Ehpesu wà mó má tân jung gaunyhaû pé lé majan zân nyi é nghut jáng, ngá é matú hai a-kyû bò râ lhú? Shi byùq bang lhoqdui toq é a huî é ru nghut le gi,
“Ngá-nhúng gi, nàpmá shî râ nghut é yánmai,
zo sháng, shuq sháng.”b
nghû râ za nghut lhê.c 33 “A ge é zùm yàp luzúm wuî gi, ge é nyì yàp sâmlai lé hten nhang é nghut lhê.” gâ é sânghkyang eq rajung za, hkyô shuî nghoq é hkâhui zo kó! 34 Núngmòq gi, taû bûn gyîng lò mù, mara hkâkut shut lo kó; hkâsu mù gâ le, Garai Gasang lé a sê é byù ra-am nyi akô. Ngò haû su nghû taî é gi, núngmòq hoq bun râ matú nghut lhê.
Dui Toq É Gùngdu
35 Nghut kôlhang, rayùq yùq gi, “Haû shi byùq bê bang, hkâsu kut lhoqdui toq é hui kôrâ lhú? Yhángmòq gi, hkâsû é gùngdu nghut kôrâ lhú?” ga myi râ nghut lhê. 36 Haû í nghâ sû ê! Nàng hô hkyô kat é pé gi, shi byùq é za a nghut jáng, yùq htoq lô râ a nghut mhaî. 37 Nàng, kyô hkyô é hkûn, yùq lò râ nghut é agàm lé hô hkat é a nghut é za, súngsô a-myui nghut nghut, gótû a-myui rajung jung nghut nghut lé za hô kat é ru nghut lhê. 38 Nghut kôlhang, Garai Gasang gi, Yhang myìt hpyit to bê eq rajung za haû lé gùngdu ralhum byi mù, kyôshi myui hkangmó lé, ó le ô é gùngdu byî ri. 39 Gùngsho lhúnglháng gi, rajung za a nghut. Byu pê é gùngsho gi, rajung, gaunyhaú pê é gi, gójung, nghoq pê é gi, gójung, ngozô pê é gi, gójung ru nghut lhê. 40 Mauhkûng gùng pé le jòq é nghut luî, myìdàm gùng pé le jòq ri; nghut kôlhang, mauhkûng gùng pê é shingkang gi, rajung, myìdàm gùng pê é shingkang gi, gójung ru nghut lhê. 41 Haû buì má bo é shingkang gi, rajung, lha-mó mâ é gi, gójung, kyî pé mâ é gi, gójung ru nghut lhê; kyî racham eq rachâm é shingkang le gótû tû shai lhûm lhê.
42 Haû mù, shi byùq bê bâng é dui toq hkyô le, haû eq rajung za nghut ri. Haû hô hkyô kat é gùngdu gi, htên byòq sê é nghut luî, lhoqdui toq huî é gùngdu kúm gi, htên byòq a sê é nghut lhê. 43 Hô hkyô kat é hkûn gi, xânghpoq nge wó hkyô a bò, lhoqdui toq huî é hkûn gi, hpungwup shingkang bo ri. Hô hkyô kat é hkûn gi, wum nyhóm mù, lhoqdui toq huî é hkûn gi, a-tsam bo ri. 44 Gùngsho gùngdu gi, hô hkyô é hui mù, sô gùngdu gi, lhoqdui toq é huî ri.
Gùngsho gùngdu jòq é nghut le gi, sô gùngdu le jòq é nghut lhê. 45 Haû nghut mù, “Haû sânghi yùq byù Adam gi, chyungxe dui é xângzo dùt bê nghut ri.”e ga kâ tô ri. Haû ló htâng é Adam kúm gi, chyungxe byî é sô nghut ri.d 46 Haû sô eq sêng é hí lé jòq é a nghut é za, gùngsho eq sêng é hí lé jòq é htâng má shèq, sô eq sêng é lé jòq é ru nghut lhê. 47 Haû sânghî yùq byù gi, myìdàm mâ é tseyûn lé saî é nghut mù, htang lhê yùq byù gi, mauhkûng htoq mâ é nghut ri. 48 Haû myìdàm byù nghut sû su, myìdàm eq sêng é bang le nghut nyi akô; haû mauhkûng htoq mâ é byù nghut sû su, mauhkûng eq sêng é bang le nghut nyi akô. 49 Ngá-nhúng gi, myìdàm byu é gùnghkyâng isâm lé hkam yù bê nghut é su, mauhkûng htoq mâ é byu é gùnghkyâng isâm lé le myang hkam yù râ nghut lhê.
50 Gu-mang wuì ê, ngò, núngmòq lé shit kyo kôlé, gùngsho eq sui gi, Garai Gasâng é mîngdán é silî wunlî lé wó yû râ a nghut, htên byòq sê é le, htên byòq a sê é silî wunlî le wó yû râ a nghut. 51 Gyô to keq, zaú tô é hkyô lé, ngò, núngmòq lé taî kyo kôlé: Ngá-nhúng bànshoq bang gi, shi byùq râ a nghut é za, htaî lhik é hui râ ru nghut lhê. 52 Haû gi, ló htâng é tut htê mying é hkûn, ralhap za, myòqkuq ralàp má dùt râ nghut lhê. Hkâsu mù gâ le, tut htê myìng râ nghut lhê, haú hkûn, shi byùq bê bang gi, htên byòq a sê é shut lhoqdui toq yu é hui râ nghut mù, ngá-nhúng gi, htaî lhik é hui râ nghut lhê. 53 Hkâsu mù gâ le, htên byòq sê é gi, htên byòq a sê é lé htaî wùt yù mù, shi byùq sê é gi, shi byùq a sê é lé htaî wùt yù râ dùt é nghut lhê. 54 Haû htên byòq sê é gi, htên byòq a sê é lé htaî wùt yù mù, shi byùq sê é gi, shi byùq a sê é lé htaî wùt yu é hkûn shèq, “Shî‑nò hkyô gi, ûng budâng èq myui pyâm é hui bê nghut ri.”f ga kâ tô é eq,
55 “Shî‑nò hkyô ê, náng é ûngmyuq hkyô gi, hká má lhú? Shî‑nò hkyô ê, náng é nyin gi, hká má lhú?”g
gâ tô é sânghkyang gi, dìk râ nghut lhê. 56 Haû shî‑nò hkyo é nyin gi, yubàk mara nghut ri; yubàk marâ é a-tsam gi, jep é târâ nghut ri. 57 Nghut kôlhang, Garai Gasang lé jeju hkya-ôn lhê! Yhang gi, ngá-nhûng é Yhûmsîng Yesuq Hkrisidùq dông mai, ngá-nhúng lé ûngmyuq hkyô byî é nghut ri.
58 Haû mù luî, ngá é chyitdàp gu-mang wuì ê, yàp gingtîng nyì keq. Hai èq le, núngmòq lé hkâ lhoqdui nún nhâng kó. Núngmòq gi, haû Yhûmsîng má núngmòq wùn wàq é múzó akôm a nghut é lé sé kô é nghut lhê yánmai, haû Yhûmsing é múzó lé ayang wùn wàq shi-kùt nyì keq.