Myìqhtoi Htoî É Chyûnghuq Pé Eq Làklaí Dang Nyo É Chyûnghuq Pé
14
Chyitdàp hkyô má le cháng mù, so é hkyô eq sêng é chyûnghuq lé le gyai yhang myìt o nyì keq. Myìqhtoi htoî é chyûnghuq lé je riyhang myìt o nyì keq. 2 Hkâsu mù gâ le, làklaí dang ahú hú nyo é sû ó yùq le, byù lé nyo é a nghut é za Garai Gasang lé nyo é ru nghut lhê. Yhang lé ó yùq èq le a sê gyo byi, zaú tô é hkyô pé lé haû So èq nyo htoq é nghut ri. 3 Nghut kôlhang, myìqhtoi htoî é sû yùq hkangmó gi, byu pé lé wum byi dang eq nhiktíng dang taî ri. 4 Làklaí dang rahû nyo é sû gi, yhûmsing gùng lé htuqbáng byî ri; nghut kôlhang, myìqhtoi htoî é sû gi, noqkuq hpúng lé htuqbáng byî ri. 5 Ngò gi, núngmòq yùq hkangmó làklaí dang ahú hú pé nyò râ lé ô nau ri, nghut kôlhang, núngmòq myìqhtoi htoi râ lé je ô nau é nghut lhê. Hkâsu mù gâ le, làklaí dang ahú hú nyo é sû gi, haû noqkuq hpúng lé wó htuqbáng râ matú, lichyúm lé taî sân kyô é za a nghut jáng, myìqhtoi htoi sû gi, yhâng htoq je gyaú é nghut lhê.6 Ahkuî, gu-mang wuì ê, ngò gi, núngmòq chyáng lé jé mù, làklaí dang pé nyo é nghut kôle, shing-rán nghut nghut, sumsé hpàqchyî nghut nghut, myìqhtoi dang nghut nghut, mhoqshit dang nghut nghut, núngmòq lé a taî kyô é nghut le gi, núngmòq é matú ngò hai a-kyû htoq râ lhú? 7 Htê lhoqhtoq é kângsoq a bo jung zè pé má lháng gi, sámpyí nghut nghut, tíng nghut nghut, gam hkoq tô é htê a jòq é nghut jáng, mùt myhíng bàt myhîng é htê haî nghut é lé, hkâsu wó sé râ lhú? 8 Dum, tut htê le gam hkoq é dông a mùt kyô é nghut jáng, majan htoq râ rì rì ó yùq wá hên râ lhú? 9 Núngmòq chyáng le haú dông nghut lhê. Nàng, làklaí dang ahú hú nyo le, sê gyô é danghkun mai nyo é za a nghut jáng, nàng haî taî nyi é lé ó yùq wá hkâsu wó sé râ lhú? Núngmòq gi, maulat má za taî hâng pyâm nyì kôrâ nghut lhê. 10 Mingkan má dang ahú hú yhang jòq é nghut lhê, nghut kôle, dang lichyúm a htoq é dang gi, a jòq é nghut lhê. 11 Haû mù luî, rayùq yùq haî taî nyi é lichyúm lé ngò a dàt chyup é nghut jáng, ngò gi, haû dang taí su é matú maigan byù dùt mù, yhang gi, ngá é matú maigan byù dùt é nghut lhê. 12 Núngmòq chyáng le haú dông nghut lhê. Núngmòq gi, so é hkyô eq sêng é chyûnghuq pé lé gyai yhang ô nau nyì bekô nghut mù, haû noqkuq hpúng lé kô myhâng nhang é chyûnghuq pé lé je ho shi-kùt nyì keq.
13 Haû nghut é yánmai, làklaí dang ahú hú taî é sû ó yùq le, yhang haû taî é lichyúm wó taî sân kyo sháng gàq, kyûdung râ dùt lhê. 14 Hkâsu mù gâ le, làklaí dang ahú hú dông ngò kyûdûng é nghut jáng, ngá é sô mai dûng é nghut lhê; nghut kôlhang, ngò myìt é má hai a-kyû a bò nghut ri. 15 Haû mù, ngò hkâsu kut râ lhú? Ngò gi, ngá é sô mai le kyûdung râ, ngá é sê hkyang é u-nuq mai le kyûdung râ nghut lhê; ngò gi, ngá é sô mai le mahkôn hkôn râ, ngá é sê hkyang é u-nuq mai le mahkôn râ nghut lhê. 16 Núngmòq gi, núngmòq é sô mai za Garai Gasang lé hkya-on kô é nghut jáng, a sê gyô é bang mâ é rayùq gi, núngmòq haî taî é lé a sê é nghut mù, núngmòq jeju hkya-ôn é hkûn, “Amen” ga hkâsu wó taí râ lhú? 17 Núngmòq gi, ge dìk shoq jeju hkya-on kô é âbe, nghut kôlhang, góbang gi, htuqbáng é a hui kó nghut ri.
18 Ngò gi, núngmòq bànshoq bâng htoq má làklaí dang ahú hú je wó taî é yánmai, Garai Gasang lé jeju bûn ri. 19 Nghut kôlhang, noqkuq hpúng má, làklaí dang rahû dông danghkun ra-mun ngò taí râ htoq má, góbang lé mhoqshit râ a-kyû bo é dang ngo hkun taí râ lé ngò je ô nau ri.
20 Gu-mang wuì ê, zoshâng wuì su myìt nyi é lé nô pyám keq. Agè ashop hkyô eq sêng é má gi, nyheqnú dông kut mù, núngmòq myìt é hkyô má gi, ko bang dông kut keq. 21 Haû jep é târâ má kâ tô é gi,
“‘A wó gyô wú é dang dông mai le, gó-ming byu pê é nhutwuî dông mai le, byù shí bang lé ngò taí râ nghut lhê;
nghut kôlhang, yhángmòq gi, ngá dang gyo kôrâ a nghut.’
ga Yhûmsîng taî ri.”a
gâ ri.
22 Haû mù, làklaí dang ahú hú nyo é hkyô gi, lùmjíng bâng matú alhô agàn a nghut é za, a lùmjíng bâng matú shèq ru nghut lhê. Myìqhtoi dang kúm gi, a lùmjíng bâng matú a nghut é za, lùmjíng bâng matú shèq ru nghut lhê. 23 Haû nghut mù, noqkuq hpúng gón chôm zing luî, yùq hkangmó làklaí dang ahú hú nyò kô é nghut jáng, a sê gyô é bang nghut nghut, a lùmjíng é bang nghut nghut, wang lé kô é hkûn, yhángmòq gi, núngmòq nâ bùm bekô ga a taí kôrâ nghut lhê lhú? 24 Nghut kôlhang, yùq hkangmó, myìqhtoi dang taî nyi é u má, a lùmjíng sû nghut nghut, a sê gyô é sû nghut nghut, wang lé é nghut jáng, yhang gi, yubàk dàp sû rayùq nghut é lé, bànshoq èq lhoqpûn kyîng é hui râ eq, bànshoq èq jéyáng é hui râ nghut é htoq agó, 25 yhâng é i‑myìt má zaú tô é hkyô pé lé de de lhoqhtoq shit é hui râ nghut lhê. Haû mù, yhang gi, ngóm gòp luî, Garai Gasang lé noqkuq mù, “Garai Gasang gi, gè gè yhang, núngmòq chyáng rahá nghut nyi ri!” ga taî pyo htoq kat râ nghut lhê.
Shuq Shuq Tap Tap Za Noqkuq Râ Hkyô
26 Haû jáng, gu-mang wuì ê, ngá-nhúng haî taí râ lhú? Núngmòq rahá lé chôm zîng é hkûn, yùq hkangmó gi, Garai hkya-on mahkôn nghut nghut, mhoqshit é dang nghut nghut, shing-rán nghut nghut, làklaí dang ahú hú nyo é hkyô nghut nghut, taî sân kyô é nghut nghut pé lé, wó le ge ri. Haú pé bànshoq gi, noqkuq hpúng lé wum-o byi râ matú chyat kut é dùt râ lhê. 27 Rayùq yùq, làklaí dang ahú hú nyo é nghut jáng, í yùq eq myô htum sum yuq mai a laî é za, rayùq htâng rayùq nyò râ dùt é htoq agó, rayùq yùq haû lé taî sân kyo ra râ dùt lhê. 28 Taî sân kyô é sû a nyi é nghut jáng, làklaí dang ahú hú nyo é sû gi, noqkuq hpúng má zim za nyì râ dùt mù, yhânggùng yhang eq Garai Gasang lé za nyò râ dùt lhê.
29 Myìqhtoi í yùq nghut nghut, sum yuq nghut nghut taî kyo râ dùt lhê; góbang gi, haî taî é lé rago gyô chyam wú râ dùt lhê. 30 Nghut kôlhang, zung tô é sû rayùq yùq chyáng shing-rán jé é nghut jáng, hí taî nyi é sû gi, nô byùq râ dùt lhê. 31 Hkâsu mù gâ le, yùq hkangmó gi, mhoqshit é eq myìt wum byî é wó hui kó sháng gàq, núngmòq bànshoq bang gi, rayùq htâng rayùq myìqhtoi wó htoî é nghut lhê. 32 Haû myìqhtoî pê é sô pé gi, myìqhtoî pé ùphkang é a‑ô má nghut nyi ri. 33 Hkâsu mù gâ le, Garai Gasang gi, a-tau ahû dùt é Garai Gasang a nghut é za, nguì ngón hkyo é Garai Gasang ru nghut lhê.
Sân-yúng bang zîng tô é hpúng bànshoq mâ é eq rajung za, 34 myiwe wuì gi, noqkuq hpúng pé má zim za nyì râ dùt lhê. Yhángmòq gi, dang taí ahkáng a wó é nghut mù, haû jep é târâ má bo é eq rajung za a‑ô má nyì kó sháng gàq. 35 Yhángmòq gi, rajung jung sé naû kô é nghut jáng, yhûm má yhángmòq é yhûmsîng hpô pê chyáng myi kó sháng gàq; hkâsu mù gâ le, myiwe rayùq noqkuq hpúng má dang taî é gi, ahoq ahî hkyô nghut ri.
36 Haû Garai Gasâng é mungdang gi, núngmòq chyáng mai htoq lo é nghut lhê lhú? Haû gi, núngmòq chyáng za lé jé bê nghut lhê lhú? 37 Rayùq yùq, yhang gi, myìqhtoi, a nghut jáng, sô chyûnghuq byî é hui sû nghut lhê ga myìt é nghut jáng, ngò, núngmòq lé ká byî é pé gi, haû Yhûmsing é hkunmó nghut é lé, yhang sê yù sháng gàq. 38 Yhang gi, haû lé haî su a ngàm kut é nghut jáng, yhânggùng le, haî su a ngàm kut é hui zo râ nghut lhê.