HPILIPI
Pê Chyáng Hun Kat é Laiká
(Philippians)
1
Hkrisidùq Yesuq é jun nhik, Poluq eq Timohti gi, Hpilipi wà mó má nyi é, Yesuq Hkrisidùq má sân-yúng bang lhúnglháng eq, hpúng-ùp, hpúngtê pé lé, dang kyô kat lhê.2 Ngá-nhûng é Îwa Garai Gasang eq Yhûmsîng Yesuq Hkrisidùq chyáng mâ é jeju eq nguì ngón hkyô gi, núngmòq chyáng ru joq nyî sháng gàq ô!
Jeju Hkya-ôn É Hkyô
3 Ngò gi, núngmòq lé myìtbûn kat hkangmó, ngá é Garai Gasang lé jeju hkya-ôn nyi lhê. 4 Ngò gi, kyûdung hkangmó, hkâ-nhám le núngmòq bànshoq bâng é matú gabú myìt èq dung byî nyi lhê. 5 Hkâsu mù gâ le, núngmòq gi, sânghî nyí mai ahkuî jé shoq, gabú danglù má ngò eq chôm zùm yàp nyi é yánmai nghut lhê. 6 Haû núngmòq má ge é múzó kut hi é sû Garai Gasang gi, Yesuq Hkrisidùq é buìnyì jé shoq múzó haû lé lhoqpán râ nghut lhê nghû, ngò hkyak myìt lum tô lhê.
7 Núngmòq bànshoq bang gi, ngá é i‑myìt má bo to bê bang nghut é yánmai, núngmòq bànshoq bang eq séng luî, ngò shí dông myìt nyi é gi, gíng lhê; hkâsu mù gâ le, ngò kyum hut huî tô é u lé le, haû gabú danglù hkyô lé taî hûng luî, lhoqgîng é u lé le, núngmòq gi, ngò eq rahá Garai Gasâng jeju chôm hkam yu é bang nghut lhê. 8 Hkrisidùq Yesuq é chyitdàp myìt dông, núngmòq bànshoq bang lé, ngò hkâ-í myìt chyit nyi é hkyô lé, Garai Gasang gi, ngá é sàksé nghut lhê.
9 Hau htoq agó, núngmòq gi, je ge é hkyô lé dàt gam hkoq mù, Hkrisidùq é buìnyì má sanséng luî mara a bo é za, 10 Garai Gasâng é hpungwup shingkang eq hkya-on kúngtôn hkyo é matú, Yesuq Hkrisidùq é yánmai lo é díngmán hkyo é ashi wó byíng nyî sháng gàq nghû le; 11 núngmòq é chyitdàp myìt gi, tengmán é hpàqchyî eq wó sê hkyang é u-nuq bànshoq má je riyhang kô jàt lò sháng gàq nghû le, ngò kyûdûng nyi lhê.
Dui Nyi Le Gi, Hkrisidùq É Matú
12 Gu-mang wuì ê, ahkuî ngò núngmòq lé sé nhâng nau é hkyô gi, ngò má haî dùt laî lò bê hkyô pé gi, gè gè yhang gabú danglù rîng jàt lò râ matú dùt lò bê nghut ri. 13 Hau é yánmai, haû hkóhkâm wâng zúng é lhúnglhâng bang eq gótû bànshoq bâng é hí má, Hkrisidùq é yánmai ngò kyum hut huî é hkyô, de de dùt htoq bê nghut ri. 14 Hau htoq agó, ngò htóng lúng é yánmai, haû Yhûmsîng Yesuq má gu-mang wuì nghut é myo mî-myo gi, myìt wum wó yû kômù, Garai Gasâng é mungdang lé, je riyhang a gyùq a kyûm wám hko kyo bekô nghut ri.
15 Gè gè yhang, byù ra-am gi, Hkrisidùq é hkyô lé mânon é myìt eq lú lhum bàt zìk é myìt mai hko kyô nyi bum akô. Nghut kôlhang, byù ra-am gi, ge é myìt mai hko kyô bum akô nghut ri. 16 Ge é myìt mai hko é bang gi, gabú danglù lé hûng râ matú ngo lé hkyin é hkyô lé, yhángmòq sé kômù, chyitdàp myìt èq hko kyô é bang nghut akô. 17 Haû góbang chyaú gi, sansêng é i‑myìt èq a nghut é za, ngò kyum wùt é hkyô má wuîhke jamjau jàt byi râ matú, myìt nyi bùm kô é nghut mù luî, Hkrisidùq é hkyô lé yhûmsing é wuízàt é dông za, hko taî nyi bum akô nghut ri. 18 Nghut kôlhang, haû gi, haî râ ri lhú? Yhûmsîng wuízàt é dông hko é nghut nghut, tengmán é dông hko é nghut nghut, hkyô hkat hkangmó má Hkrisidùq é hkyô lé hko pyo kat é nghut mù luî, ngò gi, hau é yánmai, gabú nyi lhê.
Gè gè yhang, ru gabú nyî shirâ nghut lhê. 19 Hkâsu mù gâ le, núngmòq kyûdung byî é eq Yesuq Hkrisidùq é Sô garúm é yánmai, ngò má dùt laî lò bê hkyô gi, ngò wó lùthkyô dùt râ nghut é lé ngò sê lhê. 20 Ngò myìt láng tô é eq myìt myòqbyu tô é má, ngò gi, hoq nó haî a râ é za, hí hkun lhê su, ahkuî le, dui nyì kôlhang, shi byùq kôlhang, gyùq kyûm myìt a bo é hkyô lé wó yû mù luî, Hkrisidùq gi, ngá gûng má hkya-on wàq toq é hui râ nghut lhê. 21 Hkâsu mù gâ le, ngò, chyungxe dui nyi le gi, Hkrisidùq é matú, shî jáng gi, ngá é a-myàt nghut ri. 22 Nghut kôlhang, ngò gi, gùngsho má rû dui nyì mù, ngò kut é múzó má ashi zuî lo é nghut le gi, hká lhum lé shèq hkyin yu le gè râ lhú? 23 Ngò gi, hkyô í hkat gyoro má hká hpyang le a hkap dùt tô ri; shi ló luî Hkrisidùq eq rahá nyì râ lé gi, ngò ô nau ri, hkâsu mù gâ le, haû gi, je ge é hkyô nghut ri. 24 Nghut kôlhang, ngò gùngsho má dui nyi le gi, núngmòq é matú a-kyû je bò râ nghut lhê. 25 Haû mù, ngò gi, shí hkyô lé hkyak myìt lum to luî, lùmjíng hkyô má núngmòq kô jàt lo é eq gabú nyî râ matú, nyi gyó luî, núngmòq lhúnglhâng bang eq nyi nyì râ hkyô lé, ngò sê lhê. 26 Haû mù luî, ngò núngmòq chyáng dum jé lé é hkûn, ngá é yánmai, Hkrisidùq Yesuq má núngmòq é gabú hkyô gi, je riyhang jàt lò râ nghut lhê.
27 Haî wá dùt kôlhang, núngmòq gi, Hkrisidùq é gabú danglù eq gíngdán é dông nyì yàp keq. Haû jáng, ngò, núngmòq chyáng jé mù huî lhûm é hkûn nghut nghut, wê gâng lhûm tô é hkûn nghut nghut, núngmòq gi, sô ralhum má za yàp gîng to mù, haû gabú danglù lé lùmjíng hkyô má, i-myìt rahkat zâ èq shi-kùt nyì kô é hkyô lé le; 28 núngmòq gi, hká hkyô má nghut kôlhang, gye pê èq kyuq zô é lé a gyùq lo kô é hkyô lé le, ngò sé râ nghut lhê. Haû gi, yhángmòq é matú htên byòq hui râ alhô agàn dùt lò bê nghut lhê; nghut kôlhang, núngmòq gi, hkyi yù hui râ nghut lhê. Haû gi, Garai Gasang kut é nghut lhê. 29 Hkâsu mù gâ le, Hkrisidùq má wó lùmjíng râ é jeju za a nghut, Yhâng é matú wuîhke jamjau hui râ jeju le, núngmòq hkam yù bekô nghut ri. 30 Haû gi, hí hpyang núngmòq ngò má myang wú é eq, ahkuî núngmòq ngá é hkyô lé wó gyô wú é, ngò hui zô é jamjau hkyô eq rajung za nghut nyi ri.