Yesuq, Myìt Lhoqnyhum É Hkyô
2
Hkrisidùq eq rading ralhum za nghut nyi é yánmai, myìt wum byî é hkyô, Yhâng é chyitdàp myìt mai nhiktîng é hkyô, Sô eq zùm yàp é hkyô, nú nhâm é myìt eq shogyo nhikmyîn é hkyô rajung jung lé, núngmòq wó yu é nghut le gi, 2 núngmòq gi, haû i‑myìt huî é hkyô rahkat za, chyitdàp myìt rajung za, myìt nhiklhum eq myìt é hkyô má ralhum za kut nyi é dông, ngá é gabú hkyô lé, byíng jùp nhâng keq. 3 Yhûmsing é wuízàt é dông le, akôm gyáng pyâm é dông le, haî le a kut é za, myìt lhoqnyhum nyì mù, góbang gi, núngmòq htoq má je gyaú lhê nghû myìt yu nyì keq. 4 Núngmòq yùq hkangmó gi, yhûmsîng eq sêng é lé za a nghut, góbang eq sêng é lé le, myìt byi râ lhê.5 Hkrisidùq Yesuq má bo é myìt yhang, núngmòq chyáng bò râ dùt lhê.
6 Yhang gi, Garai Gasang su roq za nghut nyì kôlhang, Garai Gasang eq rawuí za nghut é hkyô lé lú zing nyì râ matú a myìt é za,
7 Yhânggùng lé lhoqgôm pyám luî, duìnhâng zôshang é gùnghkyâng lé yu chûng mù, xângzo byù gùng roq lé dùt bê nghut ri.
8 Xângzo byù rayùq dông nghut nyi é hkûn, Yhânggùng lé Yhang lhoqnyhum pyám luî,
haû tapzîng htoq má lháng tap sat pyâm é hui shoq jì-no gyô ri.
9 Haû mù luî, Garai Gasang gi, Yesuq é myìng lé mauhkûng htoq mâ é hkyîhput,
myìdàm htoq mâ é hkyîhput eq moming mâ é hkyîhput hkangmó htuq paí luî,
10 haû Îwa Garai Gasâng é hpungwup shingkâng é matú, Yesuq Hkrisidùq gi, Yhûmsîng nghut lhê nghû,
nhut shô hkangmó yín yû sháng gàq ga,
11 myhang htâng é jowò má Yhang lé lhoqtoq tô é eq, myìng lhúnglhâng é htoq má gyaú é myìng haû,
Yhang lé byî to bê nghut ri.
Kyî Pé Su Dùq bó Nyî Râ Hkyô
12 Haû mù luî, ngò chyitdàp é luzúm wuî ê, núngmòq gi, hkâ-nhám le jì-no gyô nyi é eq rajung za, ngò, núngmòq eq rahá nyi é u lé su za a nghut, ngò eq wê gâng tô é hkûn le, núngmòq hkyi yù hui bê hkyô lé, gyai gyùq hkúnggâ é myìt eq je riyhang lhoqhtoq nyî keq. 13 Hkâsu mù gâ le, Garai Gasang gi, Yhang ô nau é hkyô lé, kut naû râ myìt èq wó kut râ hkyô lé núngmòq má lhoqhtoq byî nyi é sû nghut lhê.
14 Haî kut kôlhang, taî pùt lhûm é dông, haû a nghut jáng, dang jet jèt lhûm é dông hkâkut kó. 15 Haû jáng shèq, myìt goí é, agè ashop é pyàt hkaû má, núngmòq gi, mara a bo é, sân-yúng é, shut hkyô a bo é, Garai Gasâng é yhang zô pé dùt kôrâ nghut lhê. 16 Hau htoq agó, núngmòq gi, chyungxe mungdang lé chung htoq uchyang, mauhkûng mâ é kyî pé su, yhángmòq chyáng wó dùq bó nyî kôrâ nghut lhê. Haú hkûn, ngò gi, ajè a din pyâm é, a nghut jáng, múzó lé akôm a zuî pyâm é yánmai, Hkrisidùq é buìnyì má taî nghutbun jowò wó berâ nghut lhê. 17 Nghut kôlhang, ngò gi, shuq jung hkunggaa ralhum su, núngmòq é lùmjíng myìt mai sôdun byî é shigu hkungga ahtoq má hut gyûn pyâm é hui le lháng, gabú luî, núngmòq bànshoq bang eq rahá chôm gabú nyi lhê. 18 Haû eq rajung za, núngmòq le gabú luî, ngò eq rahá chôm gabú nyî râ dùt lhê.
Timohti Eq Epahprodi Nhik Lé Nhang Kat Râ Gâ É Hkyô
19 Ngò gi, núngmòq chyáng Timohti lé hân za wó nhang kat râ lé, haû Yhûmsîng Yesuq má myìt myòqbyu nyi lhê; haú hkûn shèq, núngmòq eq sêng é lùdang lé ngò wó sé jáng, ngò myìt ngón râ nghut lhê. 20 Núngmòq é hkyô lé, yhang su hkyak za ge myìt chiq byî é byù gótû rayùq le ngò a wó. 21 Hkâsu mù gâ le, yùq du jùp gi, Yesuq Hkrisidùq eq sêng é hkyô lé a nghut é za, ó le ó eq sêng é hkyô lé za ho nyi bum akô nghut ri. 22 Yhang kúm gi, zo rayùq mai îwa lé htuqbáng é su, haû gabú danglù hkyô má ngò eq rahá dójaú é yánmai, yhang lùmlùq é hkyô tûn shit é lé, núngmòq sê nyi lhê. 23 Haû mù luî, ngò gi, ngò má hkâsu dùt râ lé sê é hkûn yhang, yhang lé nhang kat râ matú ngò myìt myòqbyu nyi lhê. 24 Hau htoq agó, hkâ-myháng a myáng má, ngò yhang le núngmòq chyáng wó jé râ nghut lhê nghû, haû Yhûmsîng má hkyak lum nyi lhê.
25 Nghut kôlhang, ngò gi, ngá é gu-mang hpó le nghut mù, mû zui luzúm eq sarhê luzúm nghut é, ngò râ é hkyô má wú gon byi râ matú núngmòq nhang kat é, núngmòq é gùnglik le nghut é sû, Epahprodi lé núngmòq chyáng dum nhang taû kat byi râ lhê nghû, ngò myìt hpyit to bê nghut lhê. 26 Hkâsu mù gâ le, yhang gi, núngmòq lhúnglhâng bang lé myàng nau nyi é za a nghut, yhang no é hkyô lé núngmòq wó gyo bekô nghut é yánmai, gyai yhang myìt myo myìt chiq nyi ri. 27 Gè gè yhang, yhang gi, alùq shoî shî shoq no pyâm é nghut lhê. Nghut kôlhang, Garai Gasang gi, yhang lé shogyo nhikmyîn yu ri; yhang lé baú a nghut, ngò yón htoq yón a dùt nyì râ matú, ngo lé le shogyo nhikmyîn yu ri. 28 Haû mù luî, yhang lé núngmòq lhom dum myàng jáng, núngmòq myang gabú râ matú le, ngò yón é hkyô yom ló byùq râ matú le, yhang lé ngò hân hân nhang kat byí nau ri. 29 Núngmòq gi, gyai yhang gabú é myìt èq, haû Yhûmsîng má yhang lé lhom hkûlum yù mù, yhang su dùt é bang lé hkúngga keq. 30 Hkâsu mù gâ le, yhang gi, ngo lé núngmòq a wó garúm é hkyô lé garúm râ matú, yhâng é chyungxe lé lháng a ha loshoq kut mù, haû Hkrisidùq é múzó é yánmai, alùq shoî shoî shi byùq é hui zô ri.