2
Ngò gi, núngmòq é matú le, Ladoki wà mó bâng é matú le, ngò eq myòqdong hkyúm a huî wú shî é bang bànshoq é matú le, hkâ-í yhang awui ahke shi-kùt nyi é hkyô lé, núngmòq lé sé nhâng nau ri. 2 Haû su awui ahke shi-kùt é hkyô gi, yhángmòq, myìt má wum-o byî é hui râ eq chyitdàp myìt má rading ralhum za wó dùt râ matú nghut lhê. Haú hkûn, yhángmòq gi, Garai Gasâng é zaú tô é hkyô nghut é, Hkrisidùq lé wó sé râ matú, sê gyô é u-nuq lhúnglhâng é isùt byíng shoq lé wó yû kôrâ nghut lhê. 3 Haû Hkrisidùq má kúm gi, hpàqchyî byéng-yá eq sumsé hpàqchyî gâ é sùtzè lhúnglháng lé tsîng tô ri. 4 Núngmòq lé ngò haú hkyô taî kyô é gi, ó yùq le, dang ngón dang ngui èq mhoq hpyoq é dông, núngmòq lé a wó mhaú zo râ matú nghut lhê. 5 Hkâsu mù gâ le, ngá gùngdu núngmòq eq rahá a nyì kôlhang, ngá é myìt gi, núngmòq eq rahá nghut nyî luî, núngmòq shuq shuq tap tap za nghut nyî kô é eq Hkrisidùq lé lùmjíng é má hkâ-í gingtîng nyì kô é lé myàng mù, ngò gabú nyi lhê.Hkrisidùq Dông Mai Wó É Gúmjùp É Chyungxe Duì Hkyô
6 Haû mù luî, núngmòq gi, Hkrisidùq Yesuq lé Yhûmsîng nghû hàp yù bekô nghut é eq rajung za, Yhang má chyungxe xoq dui nyì keq. 7 Yhang má a-pûn a-myìt chîn gîng nyì mù, kô myhang lò luî, núngmòq mhoq yû bê eq rajung za, lùmjíng hkyô má wum-o lhoqkíng mù, jeju hkya-ôn é hkyô byíng zan nyì keq.
8 Hkrisidùq chyáng mâ é a nghut é za, mingkan shî mâ é ùphkâng târâ pé eq xângzo wui é htûngli cháng luî, mhaú zô é myìt són hpàqchyî eq a-kyû a bo é dang dông, ó yùq èq le, núngmòq lé a wó shuî nghoq yû kó sháng gàq, sidìq nyì keq.
9 Hkâsu mù gâ le, Garai Gasâng é gúmjùp hkyô bànshoq gi, Hkrisidùq é gùngdu hkyangmân má lúng nyî mù, 10 núngmòq gi, a-tsam bo é bànshoq eq ahkáng ayá wó é bànshoq é ushuq nghut é Hkrisidùq eq sêng é bang nghut kômù, gúmjùp é bang dùt bekô nghut ri. 11 Yhang má, núngmòq gi, byu lòq èq kut é ahpyo-kuq hpyit hkyô dông a nghut é za, ahpyo-kuq hpyit é su, Hkrisidùq èq yubàk gùngsho mara lé hkyut sêng pyâm é hkyô lé hkam yù bekô nghut ri. 12 Núngmòq gi, wuìmyhup hkâm é hkûn Hkrisidùq eq rahá myhup yhûm é hui bekô nghut mù, Yhang lé shi é mai lhoqdui toq yu é, Garai Gasâng é a-tsam lé núngmòq lùmjíng kô é yánmai, Yhang eq rahá lhoqdui toq yu é hui bekô nghut ri.
13 Núngmòq é yubàk mara pê é yánmai le, núngmòq é yubàk gùngsho mara lé huî sêng pyâm é a hkam yu é yánmai le, núngmòq shi tô é hkûn, Garai Gasang gi, núngmòq lé, Hkrisidùq eq rahá chyungxe duì nhâng bê nghut ri. Yhang gi, ngá-nhûng é yubàk mara lhúnglháng lé hkyut pyám byi luî, 14 ngá-nhúng eq shai lhum mù, ngá-nhúng lé htuqhtîng é, târâ pé bo é jéyáng râ jihpán lé huî sêng pyám byi bê nghut ri. Yhang gi, haû lé tapzîng htoq má dòk tap pyâm é dông yu pyám byi bê nghut lhê.a 15 Haú dông mai, a-tsam bò bang eq ahkáng ayá wó bâng é a-tsam lé lâng hkyut hkyô pyám mù, Yhang gi, tapzing èq yhángmòq lé ung pyâm é dông, byu pê é hí má yhángmòq lé de de kut to bê nghut ri.
16 Haû mù luî, nàng haî zo haî shuq é yánmai le, noqkuq htûng eq sêng é poî buìnyì, Lhôxan Lhôsik poî, Bánno Buìnyì eq séng luî le, núngmòq lé, ó yùq èq le a wó jéyáng kó sháng gàq. 17 Haú pé gi, dùt lò râ hkyô pê é wùpzo chyat nghut lhê; haû gùng gyíng gi, Hkrisidùq yhang nghut nyi ri. 18 Myìt lhoqnyhum mhaû é eq maumang lagyô pé lé noqkuq é lé myìt nguì é sû ó yùq èq le, núngmòq lé, chyûnghuq eq a gíngdán râ dông hkâkut nhâng kó. Haû sû é yùq gi, yhûmsîng byu-myang é léb za taî shi-kùt mù, yhûmsing é gùngsho myìt mai, akôm yhang nghut é lé gyáng dang taî é sû nghut ri. 19 Yhang gi, Garai Gasang kô myhâng nhang é su, gùngdu gón é gùngsho showui showang pé eq shogyi pé lé htuqbáng byi mù rahá lâng tsing tô é haû ulhum nghut é Hkrisidùq eq xoq é hkyô lé byòq ló nhâng bê nghut ri.
20-21 Núngmòq gi, Hkrisidùq eq rahá, mingkan shî mâ é târâ pé eq shi gang bekô nghut le nhîng, haî mù, haû eq sêng lhûm nyi ashî kó lhú? “Hkâzui, hkâchyâm, hkâzáng.” gâ é târâ ô má nyi nyi ashi kó lhú? 22 Haú pé gi, waxâng zô wui é hkunmó pé eq mhoqshit hkyô pé nghut é yánmai, chung jai é hkûn, htên byùq râ chyat nghut lhê. 23 Haû sû é târâ pé gi, yhûmsîng yhang noqkuq shi-kùt é, myìt lhoqnyhum mhaû é eq gùngdu lé gunjâng é pé nghut luî, hpàqchyî byéng-yá bo é su dùt kôlhang, gùngshô é agè ashop yùt yùt ô naù hkyô lé wó hkûm zing pyám râ má, hai a-kyû a bò nghut ri.