Chyoiyúng É Dông Chyungxe Duì Râ Hkyô
3
Haû mù luî, núngmòq gi, Hkrisidùq eq rahá lhoqdui toq é hui bekô nghut jáng, Garai Gasâng é lòqyo hkyama má zung tô é Hkrisidùq é jowò má jòq é, ahtoq mâ é azíng zê pé lé myìt ô nau nyì keq. 2 Núngmòq gi, myìdàm htoq mâ é azíng zê lé myìt tuî é a nghut é za, ahtoq mâ é azíng zê lé myìt tuî nyì keq. 3 Hkâsu mù gâ le, núngmòq gi, shî bekô nghut luî, ahkuî, núngmòq é chyungxe gi, Hkrisidùq eq rahá, Garai Gasang má haq tô é hui bekô nghut ri. 4 Núngmòq é chyungxe nghut sû, Hkrisidùq htoq shit é hkûn, núngmòq le, Yhang eq rahá, hpungwup shingkang hkaû má htoq shit kôrâ nghut lhê.5 Haû mù luî, núngmòq é mingkan hkyô eq sêng é, ashop é dông gùngsho zùm yàp é hkyô, agòt a‑û nyì zô lhûm é hkyô, ye lhaí nau é hkyô, agè ashop yùt yùt ô nau é hkyô eq, hparà noq hkyô nghut é myòqnòq hkyô pé haî lé le, sat pyám keq. 6 Haú hkyô pê é yánmai, Garai Gasâng é nhikmó-yo hkyô gi, jì-no a gyo bâng é ahtoq máb jé râ za nghut lhê. 7 Laî lò bê hkûn, núngmòq le, haú hkyô pé dông sô wú kô é nghut lhê. 8 Nghut kôlhang, ahkuî, núngmòq gi, nhikjum yô é, nhikmó-yô é, agè ashop é dông nò shoq kut é, lùmù gànsang é eq, núngmòq é nhutwuî mai hkunchoq taî é hkyô shí pé bànshoq lé, yhûmsing gùng yhûmsîng tô pyám râ dùt lhê. 9 Rayùq eq rayùq hkâ-mhaû lhum kó; hkâsu mù gâ le, núngmòq gi, núngmòq é byù xau eq byù xaû é nyì yàp hkyô lé hkyut pyám mù, 10 byù sik lé tû wùt yû kô é nghut lhê; byù sik haû gi, sumsé hpàqchyî dông mai, yhang lé hpân Su é gùngdu isâm má asik jàt lò nhang é huî nyi ri. 11 Byù sik má gi, Grik eq Yudaq byù nghu é, ahpyo-kuq hpyit hkâm bang eq a hkâm bang nghu é, byù bíng eq byù jum nghu é, jùn eq jùn a nghut sû nghu é a nyì lô é za, Hkrisidùq gi, bànshoq nghut mù, bànshoq má nyi nyi ri.
12 Haû mù luî, Garai Gasâng èq hkyin yù huî é bang, Yhâng èq gyai yhang chyitdàp é huî é chyoiyúng bang dông, shogyo myìt, gè hkyô shit é myìt, lhoqnyhum é myìt, nú nhâm é myìt eq myìt hing é hkyô pé lé, yhûmsing gùng yhûmsîng mèbu su wùt to keq. 13 Núngmòq yhangchang mara kut shut é hkyô jòq é nghut jáng, hkam jan byî lhum luî, rayùq eq rayùq mara hkyut byî lhum keq. Haû Yhûmsîng gi, núngmòq é mara hkyut pyám byî é su, núngmòq le mara hkyut byî lhum keq. 14 Haû ge é sâmlai bànshoq wó é htoq agó, gúmjùp é rading ralhum za dùt é hkyô má, bànshoq lé rahá wó tuî zing tô é chyitdàp myìt lé puq wùt to keq.
15 Núngmòq gi, nguì ngón hkyô wó râ matú ji yu é hui bekô nghut mù, gùngdu ralhum mâ é bang chyat nghut bekô yánmai, Hkrisidùq é nguì ngón hkyô lé, núngmòq é myìt má ùp nhang nyì keq. Haû mù, jeju hkya-ôn nyì keq. 16 Núngmòq, rayùq eq rayùq, hpàqchyî byéng-yá bànshoq èq mhoqshit é eq lhoqpun lhoqkyîng lhûm é hkûn le, Garai Gasang lé núngmòq jeju bûn é myìt mai, jihkyang dang, hkya-on mahkôn, sô eq sêng é mahkôn pé hkon é hkûn le, haû Hkrisidùq é mungdang lé, núngmòq é myìt nhiklhum má agùn agó bò nhang nyì keq. 17 Núngmòq haî wá kut kut, dang dông nghut nghut, zui saî é dông nghut nghut, bànshoq lé Yhûmsîng Yesuq é myìng mai kut é hkûn, haû Îwa nghut é Garai Gasang lé Yhang dông mai jeju hkya-on keq.
Hkrisitan I-kun Byu Pé Nyì Yàp Râ Hkyô
18 I-kun myhî pé ê, i-kun hpô pé ùphkang é ahkaû má nyì keq. Haû gi, Yhûmsing é hí má kut gíng é hkyô nghut lhê.
19 I-kun hpô pé ê, i-kun myhî pé lé chyitdàp nyì keq. Yhángmòq lé dang htân hkâ-nyô kó.
20 Zo wuî ê, jung hkangmó má núngmòq é mó wui é jì-no gyo keq; hkâsu mù gâ le, haû gi, Yhûmsîng ô nau é hkyô nghut lhê.
21 Îwâ pé ê, núngmòq é zo wuî lé myìt hkâ-nô nhâng kó, nò nhâng jáng gi, yhángmòq, myìt wum gyuî byùq kôrâ nghut lhê.
22 Jùn pé ê, hkyô hkangmó má núngmòq é myìdàm htoq mâ é jùn sîng bang ùphkang é ahkaû má nyi nyì keq; yhángmòq é myòq hí má za zui saí luî, myòqdong ho é dông a nghut é za, haû Yhûmsîng lé gyùq hkúnggâ é eq lhumzuî é myìt mai zui saî nyì keq. 23 Núngmòq haî wá kut kôle, byu é matú kut é a nghut, haû Yhûmsing é matú kut nyi é dông, núngmòq é myìt nhiklhum bànshoq eq zui saî nyì keq. 24 Haî mù gâ le, núngmòq gi, haû Yhûmsing chyáng mai, muìzè lé chyûnghuq dông wó yû kôrâ nghut é lé, sé kô é yánmai nghut lhê. Núngmòq dójaú nyi é sû gi, Yhûmsîng Hkrisidùq ru nghut lhê. 25 Kut shut sû gi, yhang kut shut é marâ matú dam byî é hui zo râ nghut lhê; haî mù gâ le, Garai Gasang gi, myòqdong hkyin é hkyô a jòq.