4
Jùn sîng bang ê, núngmòq é jùn pé lé, tengmán é eq gíng âng é dông lajang byî nyì keq; haî mù gâ le, núngmòq le, mauhkûng htoq má Yhûmsîng rayùq wó é lé sé kô é yánmai nghut lhê.Xoq Luî Pying Kat É Hkyô
2 Núngmòq gi, kyûdûng é má myìt zìng zùq nyì mù, machyâ luî, jeju hkya-ôn nyì keq. 3 Ngò, shâmtoq tui hut huî nyì shoq dùt é, Hkrisidùq é zaú tô é hkyô lé ngá-mòq wó taî pyô sháng gàq, Garai Gasang gi, mungdang lé ngá-mòq taí râ hkyô hkum hpóng byi râ matú kyû bo dung byi kó làq. 4 Haû Hkrisidùq é zaú tô é hkyô lé, ngò taí âng é dông san za wó taî pyô sháng gàq, kyû bo dung byi kó làq. 5 Núngmòq gi, a lùmjíng bang eq zùm yàp é hkûn hpàqchyî bo nyì keq; wó yu é ahkyíng hkangmó lé rago yhang chung jaì keq. 6 Núngmòq gi, yùq hkangmó lé hkâsu tû taí râ hkyô wó sé kó shoq, dáng nyo é má, xô èq nghám nhang é su, hkâ-nhám le jeju byíng é dang bo nyì sháng gàq.
Ló Htâng É Shi-kyám Dang
7 Tuhkiku gi, ngá hkyô eq sêng é danglù bànshoq, núngmòq lé taî kyo râ nghut lhê. Yhang gi, ngá é chyitdàp gu-mang, haû Yhûmsîng má, lhumzuî é hpúng mû wùn sû eq byìnzùm nghut lhê. 8 Ngò, yhang lé núngmòq chyáng nhang kat é hkyô gi, ngá-mòq chyáng dùt nyi é hkyô lé núngmòq wó sé râ eq, núngmòq lé myìt wum wó byi râ matú nghut lhê. 9 Yhang gi, núngmòq chyáng mâ é nghut é, ngá-mòq é lhumzui chyitdàp é gu-mang Onesimu eq rahá lé lo é nghut lhê. Yhángnhik gi, shî má dùt nyi é hkyô jung hkangmó lé taî kyo kôrâ nghut lhê.
10 Ngò eq rahá htóng lúng sû Arisitakuq gi, núngmòq lé shi-kyâm kat ri. Baranaba é yhâng za‑aû Marikuq le, núngmòq lé shi-kyâm kat ri. (Marikuq eq séng luî pying kat é hkyô lé núngmòq wó yu to bê nghut mù, núngmòq chyáng, yhang jé lé é nghut jáng, lhom hkûlum yù keq.) 11 Yusitu le gâ é Yesuq le, núngmòq lé shi-kyâm kat ri. Garai Gasâng é mîngdán matú ngá é byìnzùm mû zui bang má, haú bang za Yudaq byu pé nghut kômù, yhángmòq gi, ngo lé nhiktíng byî é bang nghut akô. 12 Núngmòq chyáng mâ é byù nghut sû eq Hkrisidùq Yesuq é mû wùn sû, Epahpra gi, núngmòq lé shi-kyâm kat ri. Núngmòq gi, Garai Gasang ô nau é hkyô lhúnglháng má hkyak lum to mù, gúmjùp luî wó gingtîng nyì sháng gàq ga, Yhang gi, ayang núngmòq é matú kyûdûng shi-kùt byî nyi ri. 13 Núngmòq é matú le, Ladoki wà mó eq Herapoli wà mó bâng é matú le, yhang gi, gyai yhang mû zui shi-kùt byî é hkyô lé, yhâng é matú ngò sàksé hkâm lhê. 14 Ngá-mòq é chyitdàp chi sará Lukaq eq Demaq gi, núngmòq lé shi-kyâm kat akô nghut ri. 15 Ladoki wà mó mâ é gu-mang wuì lé le, Numhpa eq yhâng yhûm mâ é noqkuq hpúng lé le, bo shi-kyám byi keq.
16 Laiká shî lé, núngmòq lé nghap kyô é htâng má, Ladoki byu pê é noqkuq hpúng má le nghap nhâng mù, Ladoki wà bâng chyáng hun kat é laiká lé le, núngmòq nghap wú keq.
17 “Haû Yhûmsing chyáng mai nàng hàp yu to bê é múzó lé rago za lhoqpân pyám aq.” nghû, Arihkipo lé taî kyo keq.
18 Ngò, Poluq gi, ngá é lòq èq yhang shi-kyám dang shî lé kâ kat é nghut lhê. Ngò, shâmtoq tui wùt tô é lé bûn nyì keq. Jeju gi, núngmòq chyáng ru joq nyî sháng gàq ô.