Poluq, Htesaloni Wà Mó Má Garaî Mû Wùn Wàq É Hkyô
2
Gu-mang wuì ê, núngmòq chyáng ngá-mòq lé kûm é hkyô gi, akôm a nghut é lé, núngmòq yhang sê lhê. 2 Núngmòq sê é eq rajung za, ngá-mòq gi, hí hkûn, Hpilipi wà mó má wuîhke jamjau eq rhoi é huî wú bê nghut lhê; nghut kôlhang, ngá-nhûng é Garai Gasang garúm é yánmai, gyaí lhom htuqhtîng é hui kôle, Garai Gasâng é gabú danglù lé, a gyùq a kyûm núngmòq lé wám taî kyô é nghut lhê. 3 Hkâsu mù gâ le, ngá-mòq lhoqpun lhoqkyîng é hkyô gi, shut é, a nghut jáng, a sansêng é i‑myìt dông eq núngmòq lé mhaú zô é dông a nghut é za, 4 haû gabú danglù lé chûng gíng é bang ga, Garai Gasâng chyáng mai ahkáng wó é dông za, ngá-mòq taî é nghut lhê. Ngá-mòq gi, byu pé lé gabú nhâng râ matú a nghut, ngá-mòq é myìt lé chyam wú nyi é Garai Gasang lé, gabú nhâng râ matú shi-kùt é ru nghut lhê. 5 Hkâsu mù gâ le, núngmòq sê é eq rajung za, ngá-mòq gi, lhoqngón mhaû é dang le hkâ-nhám a chung wú, nghop tô é myòqnòq myìt le hkâ-nhám a bò, Garai Gasang gi, ngá-mòq é sàksé nghut lhê. 6 Ngá-mòq gi, byu pé mai le, núngmòq mai le, gótû ó yùq mai le hkya-on râ lé ho nyi é a nghut, Hkrisidùq é lagyô pé nghut é eq rajung za, núngmòq lé wòlai hûn naù jáng wó hun lhê; nghut kôlhang, 7 înu rayùq, yhâng é zoshâng zô pé lé hku baú é su, núngmòq chyáng nú nhâm é dông nyi laî lò bê nghut lhê. 8 Ngá-mòq gi, núngmòq lé gyai yhang chyitdàp luî, Garai Gasâng é gabú danglù za a nghut, ngá-mòq é chyungxe pé núngmòq lé byî pyâm le lháng nhik dìk lhê; hkâsu mù gâ le, núngmòq gi, ngá-mòq chyitdàp dik é bang dùt bekô nghut é yánmai nghut lhê. 9 Gu-mang wuì ê, núngmòq gi, ngá-mòq gyai yhang mû zui shi-kùt é hkyô lé, gè gè bun kôrâ nghut lhê; Garai Gasâng é gabú danglù lé, núngmòq chyáng ngá-mòq hko kyô é u lé, ó yùq lé le, ngá-mòq mai wòlai a byi sháng gàq nghû, ngá-mòq gi, nyí lé, myín lé, mû zuî é nghut lhê.10 Ngá-mòq gi, lùmjíng bê bang núngmòq é hí má, hkâsu chyoiyúng é eq díngmán é, mara hûn râ a bo é bang dùt laî lo é hkyô lé, núngmòq le, Garai Gasang le, sàksé nghut lhê. 11 Hkâsu mù gâ le, ngá-mòq gi, îwa rayùq mai yhûmsing yhang zô pé lé kut byî é su, núngmòq yùq hkangmó lé, myìt wum byî nyi é hkyô lé le, nhik taî tîng nyi é hkyô lé le, 12 Yhâng é mîngdán eq hpungwup shingkang má, núngmòq lé wùt yu é Garai Gasang eq gíngdán é dông, núngmòq chyungxe wó dui nyì sháng gàq nghû, núngmòq lé wum byî nyi é hkyô lé le, núngmòq yhang sê nyi lhê.
13 Ngá-mòq gi, ngá-mòq chyáng mai núngmòq wó gyô yu é Garai Gasâng é mungdang lé, núngmòq lhom yu é hkûn, byu é dang lé lhom yu é dông a nghut é za, lùmjíng é bang núngmòq má mû zuî nyi é, haû Garai Gasâng é mungdang lé yhang, lhom yù kô é yánmai, Garai Gasang lé xoq xoq jeju hkya-ôn nyi lhê. 14 Gu-mang wuì ê, núngmòq gi, Hkrisidùq Yesuq má nghut nyi é, Yuda mau má jòq é Garai Gasâng é noqkuq hpûng pé lé, alìk kut yu é bang dùt bekô nghut ri. Noqkuq hpúng haú pé gi, Yudaq byu pé zing-rî é lé hui zô é su, núngmòq le, yhûmsing mau mâ é byu pé zing-rî é lé hui zô akô nghut ri. 15 Yudaq byu pé gi, haû Yhûmsîng Yesuq eq myìqhtoî pé lé sat pyám kôluî, ngá-mòq lé le hkat htoq akô. Yhángmòq gi, Garai Gasang a ô nau é hkyô kut é bang, byù lhúnglháng eq gyè dut é bang nghut akô. 16 Tûngbaù pé hkyi yù hui râ matú, ngá-mòq hko kyô é hkyô lé, yhángmòq hkûm akô; yhángmòq gi, hkâ-nhám le, yhûmsing é mara lé dìk shoq haú dông lhoqjàt myô yù akô nghut ri. Haû mù, Garai Gasâng é nhikmó-yô é hkyô gi, yhángmòq ahtoq má jé bê nghut ri.
Htesaloni Byu Pé Lé Poluq Huí Nau Nyi É Hkyô
17 Gu-mang wuì ê, ngá-mòq gi, rayòq zo núngmòq eq myòqdong byam gâng to kôle, myìt gi, a gâng é nghut lhê; núngmòq lé gyai bûnnghâm nyì luî, wó myang hui shoq nghû, ngá-mòq gyai yhang shi-kùt nyi lhê. 18 Núngmòq chyáng ngá-mòq jé lé naû mù luî, ngò Poluq yhang, adàm dàm shi-kùt wú bê; nghut kôlhang, Tsádán gi, ngá-mòq lé hkûm tang pyâm ri. 19 Hkâsu mù gâ le, ngá-nhûng é Yhûmsîng Yesuq Hkrisidùq é hí má, Yhang jé lé é hkûn, ngá-mòq é myìt myòqbyù hkyô, gabú hkyô eq nghutbun râ jánmaú gi, haí jung wá nghut lhê gâ le, núngmòq yhang nghut nyi lhê a nghut kó lhú? 20 Gè gè yhang, núngmòq gi, ngá-mòq é nghutbun jowò eq gabú hkyô nghut nyi ri.