TIMOHTI
Chyáng Hî Dàm Hun Kat é Laiká
(1 Timothy)
1
Ngá-nhûng é hkyi yù Sû Garai Gasang eq ngá-nhûng é myìt myòqbyù jang nghut é Hkrisidùq Yesuq é hkunmó eq rajung za, Hkrisidùq Yesuq é lagyo nghut sû, ngò Poluq gi, 2 haû lùmjíng hkyô má ngá zo sîng nghut sû, Timohti lé dang kyô kat lhê; haû Îwa Garai Gasang eq ngá-nhûng é Yhûmsîng Hkrisidùq Yesuq chyáng mâ é, jeju eq shogyo nhikmyin hkyô, nguì ngón hkyô gi, náng chyáng ru joq nyî sháng gàq ô!Sará Pyoq Pé Lé Sidìq Râ Hkyô
3 Ngò, Makedoni mau má jé wang ló é hkûn, pying to hkô é eq rajung za, Ehpesu wà mó má nyi to shi aq; haú hkûn shèq, nàng gi, shut shai é mhoqshit hkyô lé mhoqshit é bang a mhoq xoq lo râ matú le, 4 myìt htoq mhô-myi dang eq a dàt htûm é byùxik labaû má yhángmòq a àp nhông râ matú le, haú bang lé hkunmó wó hkyó râ nghut lhê. Haú hkyô pé gi, lùmjíng myìt mai kut htoq é Garai Gasâng é múzó lé lhoqhtoq râ malaî, mabyòq jishûm za shèq lhoqhtoq nyi é nghut lhê. 5 Haû hkunmó hkyó luî myìt myòqbyu tô é hkyô gi, chyitdàp myìt yhang nghut ri; chyitdàp myìt haû gi, sansêng é i‑myìt, mara a bò bûn é myìt eq lùmjíng myìt a-kyîng mai lo é nghut lhê. 6 Byù ra-am gi, haú hkyô pé mai htoq ló kôluî, dangsôm taî é hkyô shut lhing ló byùq bekô nghut ri. 7 Haú bang gi, jep é târâ sará pé dùt naù kôlhang, yhángmòq haî taî nyi é hkyô lé le, hkyak haî lé mhoqshit é hkyô lé le, a sé kó nghut ri.
8 Rayùq yùq, jep é târâ lé rago chung é nghut jáng, jep é târâ gi, ge é hkyô nghut é lé, ngá-nhúng sê lhê. 9 Haû jep é târâ gi, díngmán bâng é matú tô tô é a nghut é za, târâ lu laî é bang eq gumlau toq bâng é matú, târâ a hkúnggâ é bang eq mara kut bâng é matú, a chyoiyúng é bang eq lùmjíng hkyô a cháng bâng é matú, yhángmòq é yhâng wa lé nghut nghut, yhâng nu lé nghut nghut, sat pyám bâng é matú, byù sat bâng é matú, 10 ashop é dông gùngsho zùm yàp é bang eq yùqgè yhangchang nyì zo lhum bâng é matú, jùn dông byù ung zo bang, mhaû é bang eq dâkam mhaú bâng é matú, tengmán mhoqshit hkyô eq shai lhûm é lhúnglhâng bâng é matú shèq, jep é târâ tô tô é nghut é lé, ngá-nhúng sê lhê. 11 Tengmán mhoqshit hkyô haû gi, hkungsô wó é Garai Gasâng èq ngo lé àp byi bê nghut é, Yhâng é hpungwup bo é gabú danglù eq rajung za nghut ri.
Poluq Chyáng Yhûmsing É Jeju Jòq Nyi É Hkyô
12 Ngò gi, ngo lé wum-o byî é, ngá-nhûng é Yhûmsîng Hkrisidùq Yesuq lé jeju hkya-ôn lhê; hkâsu mù gâ le, Yhang gi, ngo lé lhumzui sû rayùq dông sôn yù luî, Yhâng é múzó jizó má hkyin kat yu é yánmai nghut lhê. 13 Hí hkûn, ngò gi, Garai Gasang lé taî hpoi sû, zing-ri sû eq byù rhoî sû nghut wú kôlhang, a sé shi mù lùmjíng myìt a bo é za kut é yánmai, shogyo nhikmyîn yu é hkyô lé ngò wó yu é nghut lhê. 14 Ngá-nhûng é Yhûmsing é jeju lé le, Hkrisidùq Yesuq eq sêng é lùmjíng myìt eq chyitdàp myìt lé le, ngá chyáng agùn agó hut hkyô kat byi bê nghut ri.
15 Yubàk dàp bang lé hkyi yù râ matú, Hkrisidùq Yesuq gi, mingkan má jé lé bê gâ é dang gi, lùm gíng é mungdang nghut luî, gè gè yhang lhom yù gíng é dang nghut lhê. Haû yubàk dàp bang má, ngò gi, yubàk je ko sû nghut é nghut lhê. 16 Nghut kôlhang, Hkrisidùq Yesuq gi, Yhang lé lùmjíng luî ahtum abyùq é chyungxe lé wó yû râ bâng é alìk dùt râ matú, yubàk dàp bang má yubàk je ko sû nghut é, ngá é ahtoq má, Yhâng é hkam jan hkyô lhúnglháng wó tûn shit sháng gàq ga, Garai Gasang gi, ngo lé shogyo nhikmyîn yu ri. 17 Haû mù, haû xânghpoq nge wó hkyô eq hpungwup shingkang gi, ahtum abyùq é, a dàt htên byòq é, myòq èq a byu-myang é Hkóhkâm nghut sû, rayùq zâ é Garai Gasâng chyáng pyàt dedu ahtum abyùq ru joq nyî sháng gàq ô! Amen.
18 Ngá zo Timohti ê, nàng eq séng luî myìqhtoi dang jòq wú é eq rajung za, ngò gi, nang lé haú dông mhoqshit kat lhê; haû mù, nàng gi, haú pé lé chung nyì luî, ge é majan zan mù, 19 lùmjíng myìt eq mara a bò bûn é myìt bo nyì sháng gàq. Byù ra-am gi, haú hkyô pé lé he-ngìk pyám kô é nghut luî, yhángmòq é lùmjíng myìt gi, wuìsanghpo htên byòq ló é su htên byòq byùq bekô nghut ri. 20 Haú bang má, Humeni eq Alesanderi le bò kômù, Garai Gasang lé taî hpoî é dang a taí râ matú mhoq yù kó sháng gàq nghû, ngò, yhángnhik lé Tsádán é lòq má àp pyám bê nghut lhê.