Noqkuq Hkyô Eq Séng Luî Mhoqshit Byî É Hkyô
2
Haû mù luî, ngò, hí pying kat nau é gi, târâ hkúnggâ é eq hkúngga gíng é hkyô bànshoq má, ngá-nhúng wó nguì ngón yùqyo nyì sháng gàq, hkóhkâm pé eq ahkáng ayá wó bang bànshoq é matú le, 2 yùq hkangmó é matú le, dûng tôngbán byi, kyûdung byi, dûng xoq byi, jeju hkya-on byi, kut àq nghû nau ri. 3 Haû gi, ge é hkyô nghut mù, ngá-nhûng é hkyi yù Sû Garai Gasang ô nau é hkyô nghut ri. 4 Yhang gi, byù lhúnglhâng bang hkyi yu é hui mù, tengmán é mungdang lé sê gyo râ lé, ô nau nyi ri. 5 Hkâsu mù gâ le, Garai Gasang gi, rayùq za nghut luî, Garai Gasang eq byu é gyoro má sô xoq byi sû le rayùq za nghut lhê; haú yùq gi, xângzo byù nghut é Hkrisidùq Yesuq nghut ri. 6 Yhang gi, byù lhúnglhâng bâng é matú shîhtaí gùnglik hkungga dông Yhânggùng lé byî pyám bê nghut ri; haû gi, ahkyíng yàm-yòq jé é hkûn, sàksé htoq shit bê nghut lhê. 7 Ngò gi, tûngbaù pé lé, tengmán é lùmjíng hkyô mhoqshit râ matú, hko kyo sû rayùq eq lagyo rayùq dông hkyin tô é hui sû nghut lhê. Ngò, haû su taî é gi, mhaû taî é a nghut, têng é hkyô lé za taî nyi é ru nghut lhê.8 Yùqgè wuì gi, nhikjum yô é hkyô eq dang htíng htîng lhûm é hkyô a bo é za, jowò hkangmó má chyoiyúng é lòq tû mù kyûdung râ lé, ngò ô nau ri.
9 Myiwe wuì gi, xâm nìk nìk é, hîng zè, palhé, hpaû jung mèbû èq a mhôn chung é za, siri bo é mèbu wùt chûng mù, tap tap za, shuq shuq za kut luî, 10 Garai Gasang lé noqkuq é myiwe wuì eq gíng shoq, ge é múzó èq yhûmsing gùng lé mhôn nyì râ lé, ngò ô nau ri.
11 Myiwe gi, ùphkang tô é dông châng nyì mù, zim za mhoq yû kó sháng gàq. 12 Myiwe gi, yùqgè lé mhoqshit râ hkyô lé le, yùqgè lé ùphkâng râ hkyô lé le, ngò ahkáng a byi; myiwe gi, zim za kut nyì ra râ nghut lhê. 13 Hkâsu mù gâ le, Adam lé hí hpan to mù, Ewaq lé hpan é ru nghut lhê. 14 Hau htoq agó, Adam gi, mhaû é hui zo sû a nghut; haû myiwe shèq mhaû é hui zo luî, mara kut shut é ru nghut lhê. 15 Nghut kôlhang, myiwe wuì gi, lùmjíng myìt, chyitdàp myìt eq chyoiyúng hkyô má, shuq shuq za kut mù, yhángmòq xoq châng nyì kô é nghut jáng, zoshâng hku é dông mai hkyi yu é hui kôrâ nghut lhê.a