Hpúng-ùp Eq Hpúngtê Kut Râ Bâng É Hkyô
3
Rayùq yùq, hpúng-ùp ayá lé ô nau nyi é nghut jáng, haú yùq gi, xânghpoq nge wó é múzó lé ô nau nyi ri gâ é dang gi, lùm gíng é dang nghut nyi ri. 2 Haû mù luî, hpúng-ùp rayùq gi, mara hûn râ hkyô a bo é sû, myiwe rayùq za wó é sû, dàt sidìq é sû, yhûmsing gùng lé wó hkang é sû, hkúngga gíng é sû, byù bíng lé dàt hkûlum é sû, dàt mhoqshit é sû, 3 îhpê é jùn a dùt é sû, byòq lhum byòq cheq a kut é za nûm é sû, mabyòq jishûm a lhoqhtoq é sû, ngùnzè lé a chyitdàp é sû, nghut râ lhê. 4 Yhang gi, yhâng é i-kun lé rago dàt ùphkâng luî, yhang zô pé mai hkúngga myìt bo é èq yhâng dang lé gyo byî é sû le, nghut râ lhê. 5 Rayùq yùq, yhûmsing é i-kun lé lháng a dàt ùphkang é nghut le gi, Garai Gasâng é noqkuq hpúng lé gi, hkâsu kut wó wú gon râ lhú? 6 Chángzo dùt é a myáng shî é sû gi, hpúng-ùp wó kut râ a nghut, kut é nghut jáng, yhang gi, nghutbûn lò luî, jéyáng é hkyô lé nàt Tsádán hui zô é su hui zo âbe. 7 Hpúng-ùp rayùq gi, tûngbaù pê hí má ge é myìng wó é sû le dùt râ lhê; haû jáng, yhang gi, taî hpoî pyâm é lé le a hui, nàt Tsádán é tuihkyó má le a myí, dùt râ nghut lhê.8 Haû eq rajung za, hpúngtê pé gi, hkúngga gíng é bang, shô-kó a xân é bang, îhpê é jùn a dùt é bang, a tengmán é a-myàt lé a ho é bang, nghut râ lhê. 9 Yhángmòq gi, lùmjíng hkyô mâ é nìk é maúhpo tengmán hkyô pé lé, sansêng é i‑myìt èq châng nyì ra râ nghut lhê. 10 Yhángmòq gi, chyam é lé hí huî wú kó sháng gàq, hau htâng, yhángmòq lé mara hûn râ hkyô haî a bò lo jáng, hpúngtê mû lé wùn kó sháng gàq.
11 Haû eq rajung za, yhángmòq é yhûmsîng myhî pé le, myìt nò nhang é dang a taî é za, dàt sidìq é eq hkyô hkangmó má lùm gíng luî, hkúngga gíng é myiwe wuì, nghut ra râ dùt lhê.
12 Hpúngtê rayùq gi, myiwe rayùq za wó é sû, yhang zô pé eq yhâng i-kun lé rago za dàt wùn wàq é sû, dùt ra râ nghut lhê. 13 Hpúngtê mû lé rago za wùn wàq bê bang gi, yhûmsing é matú xânghpoq nge wó hkyô lé le, Hkrisidùq Yesuq lé yhángmòq lùmjíng hkyô má, gyùq kyum é hkyô a bo é myìt mó lé le, hkyak wó yu akô nghut ri.
14 Ngò gi, hkâ-myháng a myáng má náng chyáng lé jé râ matú, myìt myòqbyu to kôlhang, ahkyíng du myáng pyâm le, 15 Garai Gasâng é i-kun hkaû má, byu pé hká dông nyì yàp râ é hkyô lé, nàng sé sháng gàq nghû, pying kat é dang shi pé lé ká byî kat lhê; i-kun haû gi, rû dui nyi é Garai Gasâng é noqkuq hpúng nghut luî, tengmán hkyo é hkúngmó-zîng eq a-pûn awang nghut ri. 16 Târâ hkúngga hkyo é zaú tô é hkyô gi, kô dik é nghut é lé, ó yùq le wó he-ngìk pyâm é a nghut;
haû gi, Yhang, byù gùngsho má htoq shit mù, haû Sô mai Yhang lé sàksé hkám byi luî, maumang lagyô pé gi, Yhang lé myàng bê nghut ri;
byùhú ahú hú má Yhâng é hkyô lé hko kyo mù, Yhang lé mingkan byu pé lùmjíng luî, hpungwup shingkang eq Yhang lé mauhkûng shut shuî toq yû bê nghut ri.