Kyû Dung Byi Râ Matú Lung Kat É Hkyô
3
Gu-mang wuì ê, je htâng má pying kat nau é hkyô gi, núngmòq chyáng dùt wú bê eq rajung za, haû Yhûmsing é mungdang gi, hân hân byo myín ló mù, lhoqgyaú é hui sháng gàq, ngá-mòq é matú kyû bo dung byi kó làq. 2 Yùq hkangmó gi, lùmjíng myìt bo é a nghut é yánmai, haû achaq achyut agè ashop é byu pê chyáng mai ngá-mòq wó lùt râ matú le, kyû bo dung byi kó laq. 3 Nghut kôlhang, haû Yhûmsîng gi, lhumzuî é sû nghut é yánmai, Yhang núngmòq lé wum-o lhoqkíng byi mù, haû agè ashop su chyáng mai núngmòq lé hung yù râ nghut lhê. 4 Núngmòq gi, ngá-mòq pying tô é dang pé lé kut nyî mù, xoq luî le kut nyî râ nghut lhê nghû, haû Yhûmsîng má ngá-mòq hkyak myìt lum tô lhê. 5 Haû Yhûmsîng gi, núngmòq lé Garai Gasâng é chyitdàp hkyô eq Hkrisidùq é hkam jan hkyô má, shuî wàng sháng gàq ô!Mû Zui Shi-kùt Râ É Hkyô
6 Gu-mang wuì ê, ngá-mòq gi, ngá-mòq chyáng mai núngmòq hàp yù bê ngá-mòq mhoqshit é hkyô dông a nyì yàp é eq lagôn é gu-mang ó yùq eq le, we we nyì keq nghû, haû Yhûmsîng Yesuq Hkrisidùq é myìng mai núngmòq lé hkunmó hkyô kat lhê. 7 Hkâsu mù gâ le, ngá-mòq kut é alìk lé hká dông cháng râ dùt é gi, núngmòq yhang sê lhê. Ngá-mòq gi, núngmòq eq rahá nyi tô é hkûn, lagôn é hkyô a bo wú é htoq agó, 8 ó yùq é zoshuq lé le, ngùn a byî é a zô wú é nghut lhê. Núngmòq má ó yùq lé le wòlai a byi sháng gàq nghû, ngá-mòq gi, múzó shi-kùt hkyô eq wuîhke hkyô má, nyí lé, myín lé, zui saî é nghut lhê. 9 Ngá-mòq gi, núngmòq lé garúm nhâng râ ahkáng a wó é a nghut, yhûmsing gùng lé núngmòq cháng râ matú alìk dùt sháng gàq nghû shèq, haû su kut é ru nghut lhê. 10 Hkâsu mù gâ le, ngá-mòq, núngmòq eq rahá nyi é hkûn, “Mû a kâm zui sû gi, a zo sháng gàq.” nghû, núngmòq lé ngá-mòq mai sang to bê nghut lhê.
11 Hkâsu mù gâ le, núngmòq chyáng mâ é byù ra-am lagon luî, hai mû le a zuî é za, mû châng lhoqgyô byî wún akô gâ é hkyô lé, ngá-mòq wó gyô é yánmai nghut lhê. 12 Ngá-mòq gi, haû su kut é bang lé, zim za nyì mù zui saí luî, yhûmsing é zoshuq ho nyì kó sháng gàq nghû, haû Yhûmsîng Yesuq Hkrisidùq é myìng lé lang luî, hkunmó hkyô kat mù, wum byî kat lhê. 13 Gu-mang wuì ê, núngmòq kúm gi, ge é múzó kut é hkyô má, hkâ-nhám le, hkâ-ngú byùq bùm kó.
14 Byù rayùq yùq gi, laiká shî má ngá-mòq mhoqshit é hkyô lé, a châng é nghut jáng, haú yùq lé rago chôm xûm yu to mù, yhang hoq bun sháng gàq, yhang eq hkâzûm yàp kó. 15 Nghut kôlhang, yhang lé gyè rayùq dông a sôn é za, gu-mang rayùq dông lhoqpun lhoqkyîng nyì keq.
Ló Htâng Lhê É Shi-kyám Dang
16 Haû nguì ngón hkyo é Yhûmsîng yhang gi, ahkyíng hkangmó eq hkyô hkat hkangmó má, núngmòq lé nguì ngón hkyô byî nyì sháng gàq. Haû Yhûmsîng gi, núngmòq bànshoq bang eq rû nyi nyì sháng gàq.
17 Ngò, Poluq gi, ngá é lòq èq yhang shi-kyám dang shî lé kâ kat lhê; shî gi, ngò kâ é laiká bànshoq má alhô agàn nghut lhê. Ngò kâ é gi, shí dông chyat nghut lhê.
18 Ngá-nhûng é Yhûmsîng Yesuq Hkrisidùq é jeju gi, núngmòq bànshoq bâng chyáng ru joq nyî sháng gàq ô!