5
Nghut kôlhang, gu-mang wuì ê, ahkyíng buìnyì eq séng luî, núngmòq lé ngá-mòq kâ hûn byi a ra lo nghut ri. 2 Hkâsu mù gâ le, haû Yhûmsing é buìnyì gi, myín lé hkau sû wang é su jé lé râ nghut é hkyô lé, núngmòq rago za sê akô nghut ri. Yhûmsing é buìnyì gi, Yesuq dum jé lé râ buìnyì lé taí nau é nghut lhê. 3 Byu pé gi, “Nguì ngón yùqyo ri.” ga taî nyi bùm kô é u lé, gùng laî é myiwe rayùq zohkû nò no lo é su, htên byòq hkyô gi, byò dàn tung yhángmòq chyáng jé luî, hká dông le yhángmòq wó hpang lùt kôrâ a nghut.4 Nghut kôlhang, gu-mang wuì ê, núngmòq gi, mauchut hkaû má nyi é bang a nghut é yánmai, buìnyì haû gi, hkau sû lé é su, núngmòq é matú byò dàn tung dùt râ a nghut. 5 Núngmòq lhúnglhâng bang gi, maubó é yhang zô pé eq nyí é yhang zô pé nghut lhê. Ngá-nhúng gi, myín eq mauchut hkaû eq sêng é bang a nghut. 6 Haû mù luî, ngá-nhúng gi, byù góbang su a yhup nyi é za, machyâ luî, gying gying kut nyî sháng. 7 Hkâsu mù gâ le, yhup é bang gi, myín lé yhup akô; î shuq wùt é bang le, myín lé shuq wùt akô. 8 Nghut kôlhang, ngá-nhúng gi, nyí eq sêng lhê nghut é yánmai, gying gying kut nyî luî, lùmjíng myìt eq chyitdàp myìt lé gi, wànggò long lé su gò to, hkyi yù hui râ lé myìt myòqbyù tô é hkyô lé gi, shâmtoq mùq lé su tsûng to, kut sháng. 9 Hkâsu mù gâ le, Garai Gasang gi, Yhâng nhikmó-yô é hkyô lé hkâm zo râ matú, ngá-nhúng lé hkyin tô é a nghut é za, ngá-nhûng é Yhûmsîng Yesuq Hkrisidùq mai, hkyi yù hkyô lé ngá-nhúng wó yû râ matú hkyin to bê nghut lhê. 10 Yesuq gi, ngá-nhúng yhup bûn nyì kôlhang, yhup ngón to kôlhang, Yhang eq rahá wó nyi nyì sháng gàq ga, ngá-nhûng é matú shî hkám byi bê nghut ri. 11 Haû mù luî, núngmòq gi, ahkuî, núngmòq kut nyi é eq rajung za, rayùq eq rayùq myìt wum byî lhum mù, htuqlùq htuqbáng kut lhûm nyì keq.
Ló Htâng Lhê É Mhoqshit Hkyô
12 Gu-mang wuì ê, núngmòq mâ é múzó shi-kùt luî, haû Yhûmsîng má núngmòq lé ùp nyi é eq lhoqpun lhoqkyîng nyi é bang lé, núngmòq hkúngga râ matú le; 13 yhángmòq zui saî é múzó jizó é yánmai, yhángmòq lé chyitdàp myìt dông gyai yhang hkúngga râ matú le, núngmòq lé ngá-mòq sang kat lhê. Núngmòq le, rayùq eq rayùq nguì ngón lhûm nyì keq. 14 Gu-mang wuì ê, núngmòq lé ngá-mòq wum byî kat nau é gi, lagôn é bang lé lhoqpun lhoqkying keq; nhiknge é bang lé myìt wum byi keq; wum nyhôm é bang lé htuqlùq htuqbáng kut keq; yùq hkangmó lé, i-myìt hîng byî nyì keq; 15 ó yùq lé nghut kôlhang, a ge é hkyo é yánmai, a ge é dông a taû kut râ lé lhoqpun lhoqkyîng nyì keq; núngmòq rayùq eq rayùq le, góbang bànshoq eq le, shi-kùt luî, hkâ-nhám le, ge é hkyô kut byî lhum nyì keq.
16 Hkâ-nhám le, ru gabú nyî keq; 17 abyìt alan kyûdûng nyì keq; 18 hkyô hkat hkangmó má jeju hkya-ôn nyì keq, hkâsu mù gâ le, haú pé gi, Hkrisidùq Yesuq má, núngmòq é matú Garai Gasang ô nau é hkyô pé nghut lhê.
19 Haû Sô lé hkâ lhoqjôm pyám kó; 20 myìqhtoi htoî é lé, haî su a ngàm hkâkut kó. 21 Jung hkangmó lé, chyam wú luî, ge é hkyô lé zuî zing nyì mù, 22 agè ashop é hkyô hkangmó lé, koi pyám keq.
23 Nguì ngón hkyo é a-pûn awang nghut é Garai Gasang yhang, núngmòq lé, lhúnglháng lhoq sân-yúng pyám byi sháng gàq; ngá-nhûng é Yhûmsîng Yesuq Hkrisidùq dum lé é hkûn, núngmòq é sô, myìt nhiklhum, gùngdu gi, mara hûn râ hkyô a bò sháng gàq. 24 Núngmòq lé ji yu é Sû gi, lhumzuî é Sû nghut lhê mù, Yhang, shí hkyô lé kut râ nghut lhê.
25 Gu-mang wuì ê, ngá-mòq é matú kyû bo dung byi kó laq. 26 Gu-mang wuì bànshoq bang lé, chyoiyúng é chyitpuq puq é dông bo shi-kyám byi kó laq. 27 Gu-mang wuì bànshoq bang lé, hun kat é laiká shî nghap kyo râ matú, haû Yhûmsing é myìng mai, ngò, núngmòq lé pying kat lhê.
28 Ngá-nhûng é Yhûmsîng Yesuq Hkrisidùq é jeju gi, núngmòq chyáng ru joq nyî sháng gàq ô!