Garai Gasang Ô Nau É Dông Chyungxe Duì Râ Hkyô
4
Xoq luî taí nau é gi, gu-mang wuì ê, ngá-mòq gi, ahkuî núngmòq cháng nyi é eq rajung za, núngmòq hká dông nyì yàp luî, Garai Gasang lé gabú nhâng râ hkyô núngmòq lé mhoqshit byi bê nghut lhê. Ahkuî le, ngá-mòq gi, shí hkyô lé núngmòq hau htoq je wó châng jàt râ matú, Yhûmsîng Yesuq má núngmòq lé dûng tôngbán luî, myìt wum byi kat lhê. 2 Hkâsu mù gâ le, núngmòq gi, haû Yhûmsîng Yesuq é ahko ahkáng dông, ngá-mòq mai, núngmòq lé mhoqshit to byî é hkyô pé lé, sê akô nghut ri.3 Garai Gasang ô nau é hkyô gi, haû núngmòq sân-yúng é hui râ matú le, ashop é dông gùngsho zùm yàp é hkyô lé koi pyám râ matú le; 4 núngmòq yùq hkangmó gi, haû Garai Gasang lé a sê é, a lùmjíng bang kut é su, gùngsho yùt yùt ô nau é hkyô a châng é za, 5 haû chyoiyúng é eq hkungga gíng é sû wó dùt shoq, yhûmsing gùng lé wó hkang é hkyô mhoq yû râ matú le; 6 shí hkyô eq séng luî, ó yùq le, yhûmsing é gu-mang lé, a ge shut, a ge ûngzo râ matú le nghut lhê. Ngá-mòq, núngmòq lé taî kyo mù, lhoqpun lhoqkyîng to gù nghut bê eq rajung za, haû Yhûmsîng gi, haú hkyô shut é bànshoq lé, dam byi râ nghut lhê. 7 Hkâsu mù gâ le, Garai Gasang gi, ngá-nhúng lé a sân-yúng é bang dùt râ matú wùt yu é a nghut, chyoiyúng é dông chyungxe dui nyì râ matú shèq wùt yu é ru nghut lhê. 8 Haû mù luî, mhoqshit hkyô shî lé he-ngìk pyâm é sû gi, byù lé he-ngìk é a nghut, haû núngmòq lé, Yhâng é Chyoiyúng Sô byî tô é sû, Garai Gasang lé he-ngìk pyâm é shèq ru nghut lhê.
9 Rayùq eq rayùq chyitdàp lhum râ matú, núngmòq yhang, Garai Gasâng èq mhoqshit é hui bekô nghut é yánmai, gu-mang yhangchang chyitdàp lhûm é hkyô eq séng luî, ngá-mòq gi, núngmòq chyáng kâ kat byi a ra lo nghut ri. 10 Haû eq rajung za, núngmòq gi, Makedoni mau gón mâ é gu-mang wuì bànshoq lé chyitdàp nyi akô nghut ri. Nghut kôlhang, gu-mang wuì ê, haû su je myo kut râ matú núngmòq lé ngá-mòq wum byî lhê.
11-12 Núngmòq é nyí wui lhê é chyungxe duì hkyô má, gótû byu pê èq hkúnggâ é wó yû luî, ó yùq lé le, lùmhkaû a ra wó dùt sháng gàq, hí hkûn núngmòq lé ngá-mòq taî kyô tô é eq rajung za, num num byù zè râ hkyô lé le, yhûmsîng eq a sêng é hkyô a kut wún râ lé le, yhûmsing lòq èq zui saí mù nyì râ lé le, núngmòq é myìt myòqbyù jowò kut yû keq.
Haû Yhûmsîng Gyó Lé Râ Hkyô
13 Gu-mang wuì ê, myìt myòqbyù hkyô a wó é byù góbang su, núngmòq, iyon ningtsáng a dùt kó sháng gàq, haû yhup ngón byùq é bang eq séng luî, núngmòq a sé râ lé, ngá-mòq a ô nau é nghut lhê. Yhup ngón byùq é bang gâ é gi, lùmjíng luî shi ló byùq é bang lé gâ é nghut lhê. 14 Hkâsu mù gâ le, Yesuq shî luî, dum dui toq bê hkyô lé ngá-nhúng lùmjíng é yánmai, Garai Gasang gi, Yesuq má yhup ngón byùq é bang lé, Yesuq eq rahá shuî lé râ nghut lhê nghû, ngá-nhúng lùmjíng é nghut lhê. 15 Haû Yhûmsîng taî é dang eq rajung za, núngmòq lé ngá-mòq taî kyo kôlé, haû Yhûmsîng dum lé é hkûn, chyungxe dui nyi é eq myìt gyó tô é bang ngá-nhúng gi, yhup ngón byùq bê bâng htoq ra-tsuí le wó hí râ a nghut. 16 Hkâsu mù gâ le, haû Yhûmsîng yhang gi, htê mó hkunmó èq le, maumang lagyo mó é hte èq le, Garai Gasâng é tutmó mùt hte èq le, mauhkûng mai gyó lé lô luî, haû Hkrisidùq má shi ló bê bang hí dui toq râ nghut lhê. 17 Hau htâng, chyungxe dui nyi é eq myìt gyó tô é bang ngá-nhúng gi, yhángmòq eq rahá mhut htoq má shuî toq yu é hui luî, maulat má haû Yhûmsîng eq hui râ nghut lhê. Haú hkûn, ngá-nhúng gi, haû Yhûmsîng eq ahtum abyùq nyi nyì berâ nghut lhê. 18 Haû mù luî, núngmòq gi, dang shí pé mai rayùq eq rayùq myìt wum byî lhûm nyì keq.