2
Haû mù, ngá zo ê, nàng gi, Hkrisidùq Yesuq mâ é jeju hkaû má, wúm bo nyì àq. 2 Nàng gi, sàksé myo myô é hí má ngá chyáng mai wó gyô yù bê hkyô pé lé, góbang lé dàt mhoqshit é, wó lum é bang lé àp byi aq. 3 Hkrisidùq Yesuq é ge é gyèzo rayùq su, wuîhke hkyô lé chôm jân nyì sháng. 4 Gyèzo rayùq dông gyè mû wùn wàq nyi é sû, ó yùq nghut kôle, gótû múzó má a bo lom é za, yhang lé hkunmó hkyô nyi é gyèzau lé, gabú nhâng nau é chyat nghut lhê. 5 Haû eq rajung za, wum hî lhûm é sû rayùq le, wum hî lhum poî wang é hkûn, tô tô é târâ dông a châng é nghut le gi, ung é xânghpoq nge wó chyûnghuq lé wó yû râ a nghut. 6 Yò mû zuî shi-kùt é sû gi, kyôshi lé sânghi myang hkam yù râ sû nghut lhê. 7 Haû Yhûmsîng gi, shí pé bànshoq lé wó sê hkyang é u-nuq nang lé byi râ nghut é yánmai, ngò taî é hkyô pé lé myìt wú aq;8 haû Dawiq é awùt ashín nghut sû, Yesuq Hkrisidùq gi, shi é mai dum dui toq bê hkyô lé myìtbun aq; haû gi, ngá é gabú danglù nghut lhê. 9 Gabú danglù hau é yánmai, mara bò sû rayùq lé su, ngò gi, kyum hut é hui luî, hpuzô nyi é nghut lhê. Nghut kôlhang, Garai Gasâng é mungdang gi, kyum hut huî é a nghut. 10 Haû mù luî, ngò gi, Hkrisidùq Yesuq chyáng mâ é hkyi yù hkyô eq ahtum abyùq é hpungwup shingkang lé wó yû kó sháng gàq nghû, haû hkyin yù hui bâng é matú, jung hkangmó lé hkam jân nyi lhê.
11 A‑ô mâ é dang gi, lùm gíng é dang nghut lhê:
Ngá-nhúng gi, Yhang eq rahá shî bê nghut jáng, Yhang eq rahá duì râ nghut lhê.
12 Ngá-nhúng gi, hkam jân é nghut jáng, Yhang eq rahá ùp râ nghut lhê.
Ngá-nhúng gi, Yhang lé he-ngìk pyâm é nghut jáng, Yhang le, ngá-nhúng lé he-ngìk pyám râ nghut lhê.
13 Ngá-nhúng gi, lhumzui myìt a bò kôlhang, Yhang gi, lhumzuî nyì râ nghut lhê. Hkâsu mù gâ le, Yhang gi, yhânggùng yhang wó he-ngìk pyâm é a nghut.
Garai Gasâng Hí Má Myòqdong Wó É Mû Zui Sû
14 Nàng gi, yhángmòq lé, shí hkyô pé xoq luî lhoqpûn nyì àq. Dang pé eq séng luî, a byòq lhûm nyì kó sháng gàq, Garai Gasâng hí má yhángmòq lé sidìq byi aq. Haû gi, a-kyû a bo é htoq agó, wó gyô é bang lé htên byòq nhang é hkyô za nghut lhê. 15 Nàng gi, haû tengmán é mungdang lé jo shoq chung jai é eq, hoq nó a râ é mû zui sû rayùq dông Garai Gasâng hí má myòqdong wó shoq, wó dùt é myhó shi-kùt àq. 16 Târâ a hkúnggâ é pô-ming ming bang lé koi pyám aq. Hkâsu mù gâ le, haû su kut é bang gi, târâ a hkúnggâ é hkyô má je riyhang wang nân ló byùq é bang dùt kôrâ nghut lhê. 17 Yhángmòq é mhoqshit hkyô gi, mong nòlì su byo myín ló râ nghut lhê; haú bang má Humeni eq Hpilitu nhik le bò kôluî, 18 haû tengmán hkyô mai sô nghoq ló byùq akô. Yhángnhik gi, haû dum dui toq hkyô dùt lai bê ga taí kômù, ra‑âm é lùmjíng hkyô lé lhoqhtên pyám byî akô nghut ri. 19 Nghut kôlhang, “Haû Yhûmsîng gi, Yhang eq sêng é bang lé sê lhê.”a ga luî le, “Haû Yhûmsing é myìng lé yín yu é bang yùq hkangmó gi, agè ashop hkyô mai lhing tau ra kôrâ nghut lhê.” ga luî le, dizìk haû htûng tap tô é, Garai Gasâng é gingtîng é a-pûn awang gi, gîng nyi ri.
20 Yhûm mó ralhum má gi, hîng auhkoq zè, ngùn auhkoq zè baú za jòq é a nghut, sik auhkoq zè, tse auhkoq zè le jòq lhê; ra-am gi, xânghpoq nge wó hkyo é matú, ra-am gi, xânghpoq nge wó hkyo é matú a nghut. 21 Haû mù luî, haú pé mai yhûmsing gùng lé lhoq sansêng pyâm é sû gi, chyoiyúng luî, haû Yhûmsîng chung jaì gíng é sû, ge é múzó hkangmó kut râ hen tô é sû nghut é yánmai, xânghpoq nge wó hkyo é matú chûngzè dùt râ nghut lhê.
22 Zôram é agè ashop é ô naù hkyô lé koi pyám mù, haû sân-yúng é myìt mai, Yhûmsîng lé wùt dûng é bang eq rahá, díngmán hkyô, lhumzui hkyô, chyitdàp hkyô, nguì ngón hkyô pé lé, châng hkat nyî àq. 23 Go é eq ngòk é dông dang jet jèt lhûm é hkyô gi, mabyòq lhoqhtoq é hkyô nghut é lé, nàng sê lhê nghut é yánmai, haú hkyô lé koi pyám aq. 24 Haû Yhûmsing é duìnhâng zoshâng gi, mabyòq a lhoqhtoq é za, yùq hkangmó lé dàt myìt tê byî é, wó mhoqshit é, a dàt nhik-yô é sû dùt ra râ nghut lhê. 25 Yhang gi, yhang lé htuqhtîng é bang lé, nú nhâm é dông mhoqshit byi ra râ nghut lhê; haú hkûn, Garai Gasang gi, yhángmòq lé myìt lhîng hkyô byi mù, tengmán hkyô lé sê gyo nhâng luî, 26 yhángmòq gi, bûn gyîng lò mù, nàt Tsádán ô nau é hkyô lé kut byi râ matú, chyup yû huî é, nàt Tsádán é tuihkyó mai wó hpang lùt ló kó âbe nghû, myìt lum kat lhê.