Jihtûm Buìnyì Pé Má Dùt Lò Râ Hkyô
3
Jihtûm buìnyì pé má, wuîhkê é ahkyíng pé jòq lò râ nghut é lé, nàng xûm yu to aq. 2 Hkâsu mù gâ le, haú u lé, byu pé gi, yhûmsing gùng lé za chyitdàp é bang, ngùn lé myòqnòq é bang, taî nghutbûn é bang, nghutbûn é bang, góbang lé taî hpoî é bang, înu îwa nyo é lé a gyô é bang, jeju a dàt bûn é bang, a chyoiyúng é bang, 3 chyitdàp myìt a bo é bang, mara hkyut byi a sê é bang, lùmù gànsang é bang, yhûmsing gùng lé hkâng a sê é bang, byùwuî pé, ge é hkyô lé a ngui é bang, 4 haq gumlaû é bang, abun aso dùt wún é bang, yhûmsing gùng lé za hkìk bûn é bang, Garai Gasang lé chyitdàp é bang dùt râ malaî ngón kún hkyô lé za chyitdàp é bang, dùt bùm kôrâ nghut lhê. 5 Yhángmòq gi, târâ hkúnggâ é bang su dùt kôlhang, haú pê é a-tsam lé he-ngìk pyâm akô nghut ri; haû sû é bang lé, nàng koi pyâm nyì àq.6 Yhángmòq gi, hpàqchyî haq htûng mù yhûm pé má wàng kôluî, mara wòlai lé wun é, agè ashop é ô naù hkyô ajung jung má sô nghoq ló byùq é, 7 hkâ-nhám le mhoq yu nyì kôlhang, haû tengmán hkyô lé a sê gyô é, myìt nyhôm é myiwe wuì lé wó lâng nghoq yu é bang nghut akô. 8 Yanne eq Yambre nhik gi, Mosheq lé htuqhtîng é su, haú bang le, haû tengmán hkyô lé htuqhtîng akô nghut ri; yhángmòq gi, myìt é hkyô htên byùq kôluî, haû lùmjíng hkyô má lhum a zuî é bang nghut akô. 9 Nghut kôlhang, haú nhik é hkyô byông htoq lo é su, yùq hkangmó é hí má, yhángmòq ngòk é hkyô byông htoq lô râ nghut mù, haû mai lai luî yhángmòq wó kut jàt kôrâ a nghut.
Timohti Lé Pying Kat É Dang
10 Nàng kúm gi, ngá é mhoqshit hkyô, ngá é nyì yàp hkyô, ngò myìt myòqbyu tô é hkyô, ngá é lùmjíng hkyô, myìt hîng hkyô, chyitdàp hkyô, hkam jan hkyô, 11 zing-ri huî é hkyô eq wuîhke jamjau hkyô pé lé le, Anti-oku wà mó, Ikoni wà mó eq Lusitira wà mó pé má ngò hui zô é, zing-ri hkyô pé lé, ngò hkam jan bê hkyô lé le, nàng rago sê lhê. Nghut kôle, haû Yhûmsîng gi, haú pé bànshoq mai ngo lé hkyi xe yù bê nghut ri. 12 Gè gè yhang, agè ashop é byu pé eq mhaû kut é bang gi, mhaú zô nyi bum é eq mhaú zô é huî nyi bùm kôluî, a ge é hkyô shut je riyhang myô jàt lò kô é hkûn, 13 Hkrisidùq Yesuq má târâ hkúnggâ é chyungxe dông nyi yàp nau é bang yùq hkangmó gi, zing-rî é hui kôrâ nghut lhê. 14 Nghut kôlhang, nàng gi, ô pê chyáng mai nàng mhoq yû bê hkyô lé le, Hkrisidùq Yesuq lé lùmjíng jáng hkyi yu é hui shoq, 15 nang lé hpàqchyî byéng-yá wó byî é chyoiyúng Chyúmdang pé lé, zoshâng hkûn mai nàng sê to bê hkyô lé le, nàng sê é yánmai, nàng mhoq yu to bê hkyô eq hkyak lùmjíng to bê hkyô má, xoq kut nyî àq. 16 Chyúmdang hkangmó gi, Garai Gasâng é soq hâng tô é pé chyat nghut é yánmai, mhoqshit é hkyô, tân mhoq é hkyô, lhoqjo byî é hkyô eq díngmán hkyô lé tûn shit byî é hkyô pê é matú, a-kyû bo ri; 17 haû mù luî, haû Garai Gasâng é byù gi, ge é múzó jizó hkangmó lé kut râ matú, wó gúmjùp râ nghut lhê.