4
Garai Gasâng é hí má le, dui nyì bang eq shi byùq bang lé târâ dara râ sû Hkrisidùq Yesuq é hí má le, Yhang htoq shit râ hkyô eq Yhâng mîngdán é yánmai, ngò, nang lé pying kat é gi, 2 haû mungdang lé hko kyo aq; ahkyíng yàm-yòq ang kôlhang, a ang kôlhang, rì rì hen to aq; myìt gyaí hing é eq rago za mhoqshit é dông, lhoqjo byi, tân mhoqshit é eq myìt wum byi kut nyî àq. 3 Hkâsu mù gâ le, byu pé gi, tengmán mhoqshit hkyô lé a kâm gyô é ahkyíng jé mù, yhángmòq yùt yùt ô nau é hkyô cháng luî, yhángmòq é no yo buí nau é nohkyap gyô nau é hkyô taí nhâng râ matú, sará pé rajùm rayò lé lhînghkyùq má lhoqtsîng to kôrâ nghut lhê. 4 Yhángmòq gi, haû tengmán hkyô mai yhángmòq é nohkyap lé lhing pyám mù, myìt htoq mhô-myi dang shut lhing ló kôrâ nghut lhê. 5 Nghut kôlhang, nàng gi, dùt tô é hkyô bànshoq má rago sidìq nyì àq; wuîhke jamjau hkyô lé hkam jân nyì àq; gabú danglù hko kyô é múzó kut nyî àq; náng é hpúngmû bànshoq lé wùn wàq nyì àq.6 Hkâsu mù gâ le, ngò gi, shuq jung hkungga ralhum dông hut pyâm é huî nyì gù nghut mù luî, mingkan mai ngò htoq ló râ ahkyíng jé bê nghut ri. 7 Ngò gi, haû ge é majan le zan bê; dìn wum hî lhûm é hkyô le bàn bê; haû lùmjíng hkyô le cháng bê nghut lhê. 8 Ahkuî, haû tengmán é târâ Agyì nghut sû, Yhûmsîng gi, haú buìnyì má ngo lé àp byi râ nghut é, haû díngmán hkyô eq sêng é jánmaú lé, ngá matú tô to byi bê nghut lhê. Haû gi, ngá é matú za a nghut, Yhang htoq shit râ hkyô lé myìt láng nyi é bang bànshoq é matú le nghut lhê.
Timohti Lé Ji Kat É Hkyô
9 Nàng gi, ngá chyáng wó dùt é í hân hân lé lô àq. 10 Hkâsu mù gâ le, Demaq gi, mingkan shî lé chyitdàp é yánmai, ngo lé pyâm to luî, Htesaloni wà mó shut; Krezen gi, Galatiq mau shut; Tituq gi, Dalamati mau shut, e ló byùq bekô nghut é yánmai nghut lhê. 11 Lukaq za ngò eq rahá nghut nyi lhê. Marikuq lé, nàng eq rahá shuî lé lò àq; yhang gi, ngá é hpúngmû má wó htuqbáng râ sû nghut lhê. 12 Ngò gi, Tuhkiku lé Ehpesu wà mó shut nhang kat bê nghut lhê. 13 Nàng gi, lé lo é hkûn, Tro‑a wà mó má, Karipu chyáng ngò tô tô é buhîng haû lé le, ngá é chyúmding lé le, je luî haû sho-kuq chyúmding pé lé le, yu lé lô byi aq.
14 Haû ningdùp hpó Alesanderi gi, ngo lé a ge é myo myo kut bê nghut ri; haû Yhûmsîng gi, yhang kut é eq rajung za, yhang lé dam byi râ nghut lhê. 15 Yhang gi, ngá-mòq é danglù lé wum kat htuqhtíng bê sû nghut é yánmai, nàng le, yhang lé sidìq ra râ nghut lhê.
16 Sânghî dàm, ngá gûng lé ngò taî hung é hkûn, yùq hkangmó gi, ngá é hkyam shut a bo lom é za, ngo lé pyâm tô akô. Nghut kôlhang, haû gi, yhángmòq ahtoq má mara a dùt sháng gàq. 17 Nghut kôlhang, ngò dông mai danglù haû lé rago wó hko pyô kat luî, tûngbaù pé bànshoq bang wó gyo kó sháng gàq ga, haû Yhûmsîng gi, ngá hkyam shut yàp to mù, ngo lé wum-o byî é nghut lhê. Hau htoq agó, ngò gi, hkanghkyî é nhut mai le hkyi yù hui bê nghut lhê.a 18 Haû Yhûmsîng gi, ngo lé agè ashop é hkyô hkangmó mai hkyi yù luî, Yhâng é mauhkûng mîngdán má ngón za shuî jé râ nghut lhê. Hpungwup shingkang gi, Yhâng chyáng ahtum abyùq ru joq nyî sháng gàq ô. Amen.
Shi-kyám Dang
19 Prisikila eq Akula nhik lé le, Onesihpuru yhûmbyù wuì lé le, bo shi-kyám byi laq. 20 Erasitu gi, Korinhtuq wà mó má nyi gyó to bê; Trohpimu lé gi, nò luî, Melitu wà mó má ngò nyhi pyâm to bê nghut lhê. 21 Nàng gi, wó dùt é í, gyòqmyò a wàng shi lé, shî má jé lé lò àq. Ubulu gi, nang lé shi-kyâm kat ri; haû eq rajung za, Puden, Linu, Kilodi‑a eq gu-mang wuì bànshoq bang gi, nang lé shi-kyâm kat akô nghut ri.
22 Haû Yhûmsîng gi, náng é sô eq rahá nghut nyî sháng gàq. Jeju gi, núngmòq chyáng ru jòq nyì sháng gàq ô.