TITUQ
Chyáng Hun Kat é Laiká
(Titus)
1
Garai Gasâng é duìnhâng zoshâng eq Yesuq Hkrisidùq é lagyo nghut é sû, ngò Poluq gi, haû ahtum abyùq é chyungxe lé chôm myìt myòqbyu é yánmai, Garai Gasang hkyin yu to bâng é lùmjíng hkyô jàt râ eq, tengmán hkyô lé wó sé mù, târâ hkúngga sé nhâng râ matú, hkyin yù huî é sû nghut lhê. 2 Haû ahtum abyùq é chyungxe duì hkyô lé, mhaú a sê é Garai Gasang gi, ahkyíng nghu é lháng a jòq shi mai danghtum htûm to mù, Yhang tû tô é ahkyíng yàm-yòq má shèq mungdang hko kyô é dông lhoqhtoq shit luî, 3 ngá-nhûng é hkyi yù Sû, Garai Gasang hkunmó hkyô tô é eq rajung za, haû mungdang hko é hkyô lé ngá é lòq má àp byi bê nghut ri.4 Ngá-nhúng chôm lùmjíng é hkyô dông mai, ngá zo sîng nghut é Tituq lé laiká kâ kat lhê. Îwa Garai Gasang eq ngá-nhûng é hkyi yù Sû Hkrisidùq Yesuq chyáng mâ é jeju eq nguì ngón hkyô gi, náng chyáng ru joq nyî sháng gàq ô!
Kireti Zinlóng Má, Tituq Wùn Wàq Râ Múzó
5 Ngò, nang lé Kireti zinlóng má nyhi hkyô tô é gi, ngò, nang lé pying tô é eq rajung za, ngò a ban zui saî é lòqzó pé lé lhoqpán râ matú eq, wà hkangmó má hpúng sûwún ayá dáng to byi râ matú nghut lhê. 6 Haû hpúng sûwún kut râ sû gi, mara hûn râ hkyô a bo é sû; yhang myi rayùq za wó é sû; yhang zô pé le, agè ashop é eq jì-no a gyô é ga, mara hûn râ jowò a jòq é lùmjíng bang nghut é sû, nghut râ lhê. 7 Hkâsu mù gâ le, hpúng-ùp rayùq gi, Garai Gasâng é sùt zum sû rayùq dông nghut lhê mû, mara hûn râ hkyô a bo é sû nghut râ lhê; yhang gi, yhûmsing myìt a cháng; i‑myìt a lûm tot; îhpê é jùn a dùt; mabyòq jishûm a kut; a sansêng é ngùn hîng lé a myìt ô nau é sû nghut râ lhê. 8 Yhang gi, byù bíng lé dàt hkûlûm sû; ge é hkyô lé chyitdàp sû; nûm é sû, díngmán sû; chyoiyúng sû; yhûmsing gùng lé wó hkang é sû; 9 mhoq yu to bê hkyô eq rajung za, lùm gíng é mungdang lé ging ging zuî zing nyi é sû nghut râ lhê. Haú hkûn shèq, yhang gi, góbang lé tengmán é mhoqshit hkyô dông myìt wum wó byî é eq, haû eq shai lhûm é bang lé, shut é hkyô wó tûn shit râ nghut lhê.
10 Hkâsu mù gâ le, gumlau kut é bang, dangsôm taî é bang eq mhaú zô é bang myo myo nyi ri. Ahpyo-kuq hpyit é hpúng bang je riyhang myô akô. 11 Haú bâng é nhut shô lé gi, xaû pyám byi râ lhê. Hkâsu mù gâ le, yhángmòq gi, a tengmán é dông sùtzè lé wó yû shoq ga luî, mhoqshit a gíng é hkyô pé lé mhoqshit mù, rayhum bang bang lé lhoqhpyoq lhoqhtên nyi akô nghut ri. 12 Kireti byù mâ é myìqhtoi rayùq lháng gi, “Kireti byu pé gi, ayang mhaû é bang, tân jung yòsô gaunyhaû pé, lagôn é zo myòqnòq bang nghut akô.” ga taî wú ri. 13 Sàksé shî gi, têng ri. Haû mù luî, yhángmòq gi, Yudaq byu pê é myìt htoq mhô-myi dang lé le; tengmán hkyô lé he-ngìk pyâm é bang pying tô é dang pé lé le, a gyo kô é za, 14 haû lùmjíng hkyô má gingtîng nyì kó sháng gàq, yhángmòq lé htân htân tân mhoqshit byî nyì àq. 15 Sân-yúng bâng é matú gi, azíng zê lhúnglháng sân-yúng ri; a sân-yúng bang eq a lùmjíng bâng é matú kúm gi, haî le a sân-yúng é chyat nghut nyi ri; hkâsu mù gâ le, yhángmòq é myìt nhiklhum eq myìt sôn sê é hkyô pé gi, gè gè yhang, a sân-yúng dùt byùq bekô nghut ri. 16 Yhángmòq gi, Garai Gasang lé sê lhê ga kôlhang, yhûmsîng zui saî é lòq zó dông, Yhang lé he-ngìk pyâm é bang nghut akô. Yhángmòq gi, achaq achyut é bang, jì-no a gyô é bang eq, ge é mû jòq mîjòq eq a htuk é bang nghut akô nghut ri.