Garai Gasâng É Matú Chyungxe Duì Râ Hkyô
4
Haû mù luî, Hkrisidùq gi, Yhâng é gùngdu má hpuzo bê nghut é yánmai, núngmòq le, Yhâng é i‑myìt sâmlai hau èq yhûmsing gùng má gyèhking dông wùt to keq, haî mù gâ le, yhâng é gùngdu má hpuzo bê sû gi, mara eq gang bê nghut ri. 2 Haû nghut é yánmai, yhang gi, yhang nyi tûm tô é mingkan chyungxe duì hkyô má, agè ashop é xângzo byù ô nau é dông a nghut é za, Garai Gasang ô nau é dông chyungxe dui é ru nghut lhê. 3 Hkâsu mù gâ le, núngmòq gi, laî lò bê ahkyíng má, a lùmjíng shî é byu pé hkyin kut nau é hkyô nghut é, shut é dông nyì zô lhúm nau é i‑myìt, agè ashop é yùt yùt ô nau é hkyô, î shuq wùt é hkyô, zo yê shuq yê mù achaq achyut kut é hkyô, ye lhai râ wùt lo jung zoshuq lé yùt yùt ô nau é hkyô, achaq achyut é hparà noq hkyô pé má, ahkyíng lùq shoq nyi laî lò bê bang nghut akô. 4 Núngmòq gi, ladu lai shoq achaq achyut kut é hkyô má, yhángmòq eq rahá a bo châng kut wún lo kô é nghut mù, yhángmòq gi, maú byùq luî, núngmòq lé lùmù gànsang pyâm akô nghut ri. 5 Nghut kôlhang, yhángmòq gi, dui nyi é bang eq shî bê bang lé târâ jéyáng râ rì rì nghut to Sû lé jihpán shit kyo ra kôrâ nghut lhê. 6 Hau é yánmai, ahkuî shi byùq bê bang lé lháng gabú danglù hko kyo bekô nghut ri; haû gi, gùngdu eq séng luî ga jang, yhángmòq gi, byù dông mai târâ jéyáng é hui râ eq, sô eq séng luî ga jang, Garai Gasang dông mai chyungxe wó duî râ matú nghut lhê.7 Lhúnglháng htum râ ahkyíng gi, chyáng bê nghut ri. Haû mù luî, núngmòq kyû wó dung kó sháng gàq, bûn gying luî, yhûmsing gùng yhûmsîng hkang nyì keq. 8 Bànshoq htoq má ahkyàk é gi, rayùq eq rayùq gyai yhang chyitdàp lhûm é hkyô nghut lhê, haî mù gâ le, chyitdàp myìt gi, yubàk mara myo myo lé wó nghop pyâm é nghut lhê. 9 Rayùq eq rayùq, taî nyung nyâng é hkyô a bo é za, rago hkûlum lhum keq. 10 Yùq hkangmó gi, yhûmsîng wó hkam yù bê chyûnghuq eq rajung za, góbang lé dójaú râ lhê; Garai Gasâng jeju chyûnghuq ajung jung lé, lhumzui é èq rago chung jaì râ lhê. 11 Rayùq yùq taî é nghut jáng, Garai Gasâng é mungdang haû eq yhang rajung za taí ra râ nghut lhê. Garai Gasang gi, lhúnglháng má Yesuq Hkrisidùq é yánmai hkya-ôn é hui sháng gàq; rayùq yùq dójaú é nghut jáng, Garai Gasang byî é wum-ô èq dójaú ra râ nghut lhê. Haû hpungwup shingkang eq a-tsam gi, Yesuq Hkrisidùq chyáng pyàt dedu ahtum abyùq jòq nyì sháng gàq ô. Amen.
Hkrisitan Dùt É Yánmai Jamjau Huî É Hkyô
12 Chyitdàp é luzúm wuî ê, wuîhke hkyô dông chyam é lé núngmòq hkâm zô nyi é hkûn, núngmòq chyáng maú nhô zâ é hkyô dùt htoq bê dông, hkâgyùq dàn kó. 13 Hkrisidùq é jamjau hkyô pé lé bo hui zô é yánmai kúm gi, núngmòq gabú keq; haú hkûn shèq, Yhâng é hpungwup shingkang eq rahá Yhang htoq shit é hkûn, núngmòq gi, gabú dik é hui kôrâ nghut lhê. 14 Hkrisidùq é myìng yánmai, núngmòq gi, rhoi é hui zô é nghut jáng, hkungsô wó nyi ri; hkâsu mù gâ le, hpungwup shingkang bo é Sô nghu é, Garai Gasâng é Sô gi, núngmòq chyáng nyi nyi ri. 15 Núngmòq mâ é rayùq yùq jamjau huî é nghut le gi, byù sat sû, hkau sû, gótû agè ashop kut sû, góbâng é mú má châng gunjang sû dông jamjau huî é a dùt sháng gàq. 16 Nghut kôlhang, Hkrisitan rayùq dông núngmòq jamjau huî é nghut le gi, hkâhoq nyî kó, Garai Gasang lé kúm gi, myìng hau é yánmai hkya-ôn nyì keq. 17 Hkâsu mù gâ le, târâ jéyáng râ ahkyíng gi, jé bê nghut luî, Garai Gasâng é i-kun byu pé mai hî râ nghut lhê; haû gi, ngá-nhúng mai hi é nghut jáng, Garai Gasâng é gabú danglù lé a châng é bang gi, hkâsu wá dùt lò râ nghut lhê lhú?
18 “Haû díngmán sû, hkyi yù hui râ wuî é nghut le gi, târâ a hkúnggâ é eq yubàk dàp é sû gi, hkâsu wá dùt râ nghut lhê lhú?”a
gâ tô ri.
19 Haû nghut mù luî, Garai Gasang ô nau é dông jamjau huî é bang gi, yhûmsing gùng lé, lhumzuî é Hpân Su chyáng àp byi mù, ge é lé xoq kut nyì ra râ nghut lhê.