Sûwún Wuî Eq Zorâm Wuì
5
Núngmòq mâ é hpúng sûwún wuî lé, ngò, núngmòq é byìnzùm sûwún, Hkrisidùq é jamjau hkyô pê é sàksé nghut sû eq lhoqhtoq shit râ nghut é Yhâng é hpungwup shingkang lé bo hkâm râ nghut sû dông mai sang kat kôlé; 2 Núngmòq lé àp to bê nghut é Garai Gasâng é sau hpúnga lé zúng bang dùt mù, shuî u bang dông dójaú nyî keq; zúng é hkûn, a kut a ge luî kut é a nghut é za, Garai Gasang, núngmòq lé dùt nhâng nau é su, yhûmsîng kâm é myìt mai kut é nghut râ lhê; ngùnzè lé a myòqnòq é za, shirông myìt mai dójaú râ lhê. 3 Núngmòq é lòq má àp byî to bê bang lé a ùp zô é za, yhángmòq é hí má alìk dùt nyì keq. 4 Haû jáng, Sau zúng Agyì mób htoq shit é hkûn, núngmòq gi, hpungwup shingkang bo é, hkâ-nhám le a shum a byùq é jánmaú lé myang hàp yù kôrâ nghut lhê.5 Zorâm wuì ê, núngmòq le, núngmòq htoq i-pyàt ko bâng é a‑ô má nyì keq. Núngmòq lhúnglhâng bang gi, myìt lhoqnyhum é hkyô lé mèbu su wùt to mù, rayùq eq rayùq dójaú nyî keq; hkâsu mù gâ le,
“Garai Gasang gi, nghutbûn é bang lé hkûm zing pyám kôlhang, myìt lhoqnyhum é bang lé jeju byî ri.”c
gâ tô ri. 6 Haû mù luî, ahkyíng jé jáng Garai Gasang núngmòq lé wàq toq sháng gàq, núngmòq gi, Yhâng é hpungwup a-tsam mó bo é lòqhkaû má, yhûmsing myìt lé yhûmsîng lhoqnyhum nyì keq. 7 Núngmòq é myìt chiq hkyô bànshoq lé, Yhâng htoq má dú kê pyâm to keq; haî mù gâ le, Yhang gi, núngmòq é matú chiq byî nyì sû nghut lhê.
8 Yhûmsing gùng lé yhûmsîng hkâng mù, machyâ nyì keq. Núngmòq é gyè nghut é nàt Tsádán hpó gi, rayùq yùq lé wó zô myui pyám shoq ga, mying wún é hkanghkyi su hkat gadaú jón wún ri. 9 Yhang lé htuqhtîng pyám mù, lùmjíng myìt má gingtîng nyì keq, haî mù gâ le, mingkan gón mâ é núngmòq é gu-mang wuì le, rajung zâ é jamjau hkyô pé hui zô nyì kô é lé, núngmòq sê lhê.
10 Haû mù, jeju bànshoq é Garai Gasang gi, Hkrisidùq má ahtum abyùq jòq nyi é Yhâng é hpungwup shingkâng matú núngmòq lé ji yù bê nghut luî, núngmòq razùp zo jamjau huî é htâng má, Yhang yhang núngmòq lé gúmjùp nhâng mù, wum bô nhâng luî, ging ging tíng tíng dùt nhâng râ nghut lhê. 11 Haû hpungwup a-tsam bànshoq gi, Yhâng chyáng pyàt dedu ahtum abyùq ru joq nyî sháng gàq. Amen.
Ló Htâng É Shi-kyám Dang
12 Lhumzuî é gu-mang nghû ngò sôn yu é Sila èq garúm luî, ngò gi, núngmòq lé myìt wum byî lhê; dang haú pé gi, Garai Gasâng é tengmán é jeju nghut é lé sàksé hkâm é pé lé, tot za kâ kat é dang nghut lhê. Tengmán é jeju haú má yàp gîng nyì keq.
13 Babelon má nyi é, núngmòq eq rahá hkyin yù huî é Hpúng gi, núngmòq lé shi-kyâm kat ri; ngá zo dông nghut sû Marikuq le, núngmòq lé shi-kyâm kat ri. 14 Rayùq eq rayùq, chyitdàp bo-puq puq é èq shi-kyâm lhum keq.
Nguì ngón hkyô gi, Hkrisidùq má nghut nyi é núngmòq bànshoq bâng chyáng ru joq nyî sháng gàq ô.