Garai Gasâng É Yhang zô Pé
3
Ngá-nhúng gi,
haû Garai Gasâng é yhang zô pé ga wùt râ hui bê nghut é yánmai,
haû Îwâ é chyitdàp myìt gi,
ngá-nhûng ahtoq má hkâ-í yhang kô nyi ri myhî-nhung!
Ngá-nhúng gi,
yhang zô pé yhang nghut bu‑nhung!
Mingkan gi,
Yhang lé a sê é yánmai,
ngá-nhúng lé le a sé nghut ri.
2 Chyitdàp é luzúm wuì ê,
ahkuî,
ngá-nhúng gi,
Garai Gasâng é yhang zô pé nghut nyi to kôlhang,
ngá-nhúng hkâsu dùt râ hkyô lé,
a tûn shit shi nghut ri.
Nghut kôlhang,
Hkrisidùq htoq shit é hkûn,
ngá-nhúng gi,
Yhang su dùt râ nghut é hkyô lé,
ngá-nhúng sê lhê;
hkâsu mù gâ le,
Yhang hkâsu nghut é hkyô lé roq yhang,
ngá-nhúng myàng râ nghut lhê.
3 Myìt myòqbyù hkyô shî lé,
Yhâng chyáng má wó tô é bang ó yùq nghut kôle,
Yhang sân-yúng é eq rajung za,
yhûmsing gùng lé lhoqsan lhoqyúng nyi ri.
4 Mara kut é sû ó yùq nghut kôle,
târâ lu laî é sû nghut ri;
gè gè ga jang,
mara gi,
târâ lu laî é hkyô nghut nyi ri.
5 Nghut kôlhang,
Yhang gi,
ngá-nhûng é yubàk mara lé hkyut pyám byi râ matú,
nyi htoq bê hkyô lé núngmòq sê akô;
Yhâng chyáng mara a bò nghut ri.
6 Yhang má dui nyi é sû ó yùq nghut kôle,
mara a xoq kut nyî nghut ri;
mara xoq kut nyî sû ó yùq nghut kôle,
Yhang lé a myàng,
a sé shi nghut ri.
7 Chyitdàp é zo wuî ê,
núngmòq lé ó yùq èq le hkyô a shuî nghoq kó sháng gàq;
Yhang gi,
díngmán é eq rajung za,
díngmán é hkyô lé kut é sû ó yùq nghut kôle,
díngmán nyi ri.
8 Mara kut nyi é sû gi,
nàt Tsádán chyáng mâ é nghut nyi ri;
hkâsu mù gâ le,
Tsádán haû gi,
sânghi mai yhang mara kut nyî bê nghut ri.
Haû Garai Gasâng é Yhangzo gi,
Tsádán é múzó lé lhoqhpyoq lhoqhten râ matú nyi htoq lo é nghut lhê.
9 Garai Gasâng chyáng mai hku kat é sû ó yùq nghut kôle,
Yhâng é a-myui bo tô lhê nghut é yánmai,
mara a xoq kut lo nghut ri;
haú yùq gi,
Garai Gasâng chyáng mai hku kat é hui bê nghut é yánmai,
mara wó xoq kut lo râ a nghut.
10 Ó yùq nghut kôle,
díngmán é hkyô a kut é eq,
yhâng gu-mang lé a chyitdàp é sû gi,
Garai Gasâng yhang zo a nghut.
Hau é yánmai,
ó pé gi,
Garai Gasâng é yhang zô pé nghut é,
ó pé gi,
nàt Tsádán é yhang zô pé nghut é hkyô lé,
san za ngá-nhúng wó sê yu ri.
Rayùq Eq Rayùq Chyitdàp Lhum Râ Hkyô
11 Ngá-nhúng rayùq eq rayùq chyitdàp lhum râ lhê gâ é hkyô haû gi,
sânghi mai núngmòq wó gyô yù bê danglù nghut ri.
12 Haû agè ashop sû eq le sêng é,
yhang gu lé sat pyâm é Ka-in su a ge kut.
Yhang gi,
haî mù luî yhang gu lé sat pyâm lhê lhú ga le,
yhâng é múzó pé gi,
agè ashop hkyô,
yhang gû é múzó pé gi,
díngmán é hkyô nghut é yánmai nghut ri. a
13 Ngá é gu-mang wuì ê,
núngmòq lé mingkân èq a nguì a naù a wom kut kôlhang,
hkâ-maú kó.
14 Ngá-nhúng gi,
ngá-nhûng é gu-mang wuì lé chyitdàp é yánmai,
shi byùq é mai wó lùt luî chyungxe dui é hkyô lé,
wó sê é nghut lhê.
Chyitdàp myìt a bò sû gi,
shi é hkyô má lúng tô ashî nghut ri.
15 Yhâng é gu-mang lé a nguì a naù a wôm é sû gi,
byù sat sû dùt râ nghut lhê;
byù sat sû ó yùq chyáng nghut kôle,
ahtum abyùq é chyungxe a bo é hkyô lé,
núngmòq sê nyi akô.
16 Yesuq Hkrisidùq gi,
ngá-nhûng é matú Yhâng é chyungxe byî pyám bê lé wú jáng,
chyitdàp myìt hkâsû é nghut é hkyô lé,
ngá-nhúng wó sê ri.
Ngá-nhúng le,
gu-mang wui é matú,
ngá-nhûng é chyungxe lé byî pyám gíng ri.
17 Ó yùq nghut kôlhang,
mingkan sùtzè wó to luî,
yhâng gu-mang hpó asho awui dùt nyi é lé myàng kôlhang,
a shogyô yu é nghut jáng,
haû Garai Gasâng é chyitdàp myìt gi,
yhâng chyáng hkâsu wó bô râ lhú?
18 Chyitdàp é zo wuî ê,
ngá-nhúng gi,
dang nhut shô mai za a nghut,
múzó eq tengmán é dông le chyitdàp nyì sháng.
19 Haú hkûn,
ngá-nhúng gi,
tengmán hkyô eq séng bê bang nghut é lé wó sê é eq,
ngá-nhûng é i‑myìt mai ngá-nhúng lé mara hun lò hkangmó,
Garai Gasâng é hí má ngá-nhúng i‑myìt wó ngón nyî bê nghut ri.
20 Hkâsu mù gâ le,
Garai Gasang gi,
ngá-nhúng myìt é htoq má je kô é sû nghut mù,
jung hkangmó lé sê nyi ri.
21 Chyitdàp é luzúm wuî ê,
ngá-nhûng é i‑myìt mai ngá-nhúng lé mara a hun é nghut le gi,
Garai Gasâng hí má ngá-nhúng gyùq kyûm râ hkyô a jòq lo nghut ri.
22 Ngá-nhúng gi,
Yhang hkyô tô é hkunmó pé lé châng kut é eq Yhang lé gabú nhang é hkyô haî lé le kut é yánmai,
ngá-nhúng dûng é hkyô lhúnglháng lé,
Yhâng chyáng mai wó yû râ nghut lhê.
23 Yhang hkunmó hkyô tô é eq rajung za,
Yhâng é zo Yesuq Hkrisidùq é myìng má lùmjíng é eq,
rayùq eq rayùq chyitdàp lhûm é hkyô gi,
Yhang hkyô tô é hkunmó yhang nghut bê.
24 Yhang hkyô tô é hkunmó pé lé,
châng kut é bang gi,
Yhang má dui nyì bê nghut mù,
Yhang le haú bâng chyáng dui nyì bê nghut ri.
Yhang ngá-nhûng chyáng dui nyì bê hkyô lé,
ngá-nhúng lé Yhang byî tô é Sô dông ngá-nhúng wó sê yu é nghut lhê.