Poluq, Tûngbaù Pê É Târâ Hkô Sará
3
Haû su nghut mù, Hkrisidùq Yesuq é hkyô lé, núngmòq tûngbaù pê chyáng hko kyô é yánmai, htóngbyû dùt sû, ngò Poluq gi, núngmòq é matú kyûdung byî lhê.2 Núngmòq lé dójaú râ é matú, ngo lé byî tô é Garai Gasâng jeju ayá shî lé, núngmòq gè gè wó gyô wú bekô râ nghut lhê. 3 Haû gi, hí hkûn, ngò, tot é dông kâ tô wú bê eq rajung za, haû zaú tô é hkyô lé, shing-rán dông ngo lé sé nhang é nghut ri. 4 Haú hkyô lé, núngmòq nghap wú é hkûn, Hkrisidùq eq sêng é zaú tô é hkyô, ngò rago sê é lé, núngmòq wó sé kôrâ nghut lhê. 5 Haû lé, laî lò bê i-pyàt pé mâ é byu pé lé a sé nhang é nghut kôlhang, ahkuî gi, Garai Gasâng é chyoiyúng é, lagyô pé eq myìqhtoî pé lé, haû So èq hpông shit bê nghut ri. 6 Zaú tô é hkyô haû gi, gabú danglù dông mai, Hkrisidùq Yesuq má, Isira-elaq byu pé eq rahá, tûngbaù pé le, hkûngxoq bang wó dùt luî, gùngdu ralhûm é gùngsho showui showang pé chyat dùt é eq, danghtum htûm tô é lé wó chôm hkam yu é bang dùt é hkyô nghut ri.
7 Yhâng é hpungwup a-tsam mai, ngo lé byî tô é Garai Gasâng jeju chyûnghuq é yánmai, ngò gi, gabú danglù shî taí râ duìnhâng zoshâng dùt é nghut lhê. 8 Ngò gi, haû Garai Gasâng é byu pé mâ é tiq dik sû htoq má lháng je tiq sû nghut kôlhang, haû Hkrisidùq é a ung htoq taî é wó sùt hkyô lé, tûngbaù pê chyáng hko kyo râ matú le, 9 haû lhúnglháng lé hpan é Garai Gasang má, laî lò bê i-pyàt pé má zaú tô é, zaú tô é hkyô haû lé hkâsu kut tô é lé, yùq hkangmó lé taî sân kyo râ matú le, jeju shî, ngo lé byi bê nghut ri. 10 Haû gi, ngá-nhûng é Yhûmsîng Hkrisidùq Yesuq má lhoqpán bê nghut é, Yhang ahtum abyùq myìt hpyit to bê eq rajung za, 11 haû Garai Gasâng é hpàqchyî mó góng lé, noqkuq hpúng dông mauhkûng htoq tsáng myhâng mâ é ùphkâng bang eq ahkáng ayá wó bang lé, ahkuî sé nhâng râ matú nghut lhê. 12 Ngá-nhúng gi, ngá-nhûng é Yhûmsîng Hkrisidùq Yesuq eq rading ralhum za nghut é yánmai le, Yhang lé lùmjíng é yánmai le, Garai Gasang chyáng, wám é myìt eq a gyùq a wàm é myìt èq wó htèp e é nghut lhê. 13 Haû mù luî, ngò, núngmòq lé dûng tôngbán nau é gi, núngmòq é matú, ngò wuîhke jamjau hui zô é yánmai, núngmòq i‑myìt hkâgyui kó; haû gi, núngmòq é matú a-kyû bò râ hkyô nghut lhê.
Ehpesu Wà Mó Byu Pé Lé Kyûdung Byî É Hkyô
14 Haú pê é yánmai, ngò gi, haû Îwâ é hí má hkyîhput htuq luî kyûdûng é nghut lhê. 15 Mauhkûng eq myigùng htoq mâ é Yhâng é i-kun byù lhúnglháng gi, Yhâng chyáng mai myìng wó yu é chyat nghut lhê. 16 Núngmòq é lùmjíng myìt mai, núngmòq é i‑myìt ûnghkaû má Hkrisidùq wó nyi nyì sháng gàq nghû, 17 Yhâng é hpungwup shingkang bo é agùn agó wó sùt é mai, núngmòq é i‑myìt ûnghkaû mâ é sû lé, Yhâng é Sô dông, hpungwup a-tsâm èq wum-o lhoqkíng byi râ matú, ngò kyûdung byi lhê. Hau htoq agó, núngmòq gi, chyitdàp myìt má a-myìt chîn to luî, awang hi to mù, 18 sân-yúng bang eq rahá, hau é a-pyî, a-tsûng, myhâng, nìk, hkâ-í nghut é lé, rago wó sé kôluî, 19 Garai Gasâng é gúmjùp é hkyô lhúnglhâng èq wó lhoq gúmjùp yù kó sháng gàq nghû, sê hkyang é u-nuq htoq má gyaú é Hkrisidùq é chyitdàp hkyô lé, núngmòq wó sé râ matú, ngò kyûdung byi lhê.