Hkrisidùq É Gùngdu Má Rading Ralhum Za
4
Haû mù luî, núngmòq gi, núngmòq lé wùt yù bê nghut mù, wùt yu é hkyô eq gíngdán é dông chyungxe duì keq nghû, haû Yhûmsing é yánmai, htóng lúng sû ngò Poluq gi, núngmòq lé lhoqpun lhoqkyîng kat lhê. 2 Hkyô hkat hkangmó má i‑myìt lhoqnyhum é eq i‑myìt nú nhâm nyì keq; myìt hing é eq chyitdàp myìt mai rayùq eq rayùq hkam jân lhûm nyì keq. 3 Haû So èq byî é myìt hui hkyô lé, nguì ngón hkyô dông mai châng nyì râ matú, wó dùt é í shi-kùt nyì keq. 4 Núngmòq gi, wùt yù hui kô é hkûn, myìt myòqbyù hkyô rashut za wùt yù hui bekô nghut é eq rajung za, gùngdu ralhum eq Sô ralhum za nghut nyi ri. 5 Yhûmsîng rayùq za, lùmjíng hkyô rahkat za, baptisima ralhum za nghut nyi ri. 6 Bànshoq bâng é Îwa nghut sû Garai Gasang le, rayùq za nghut nyi ri; Yhang gi, bànshoq bâng é ahtoq má nghut luî, lhúnglháng dông mai mû kut é eq lhúnglhâng é ahkaû má lúng nyî sû nghut ri.7 Nghut kôlhang, ngá-nhúng yùq hkangmó gi, jeju chyûnghuq lé, Hkrisidùq mai ké byî é dông wó yu é nghut lhê. 8 Hau é yánmai,
“Yhang gi, myhang é jowò shut dòq ló é hkûn, shúm zung é bang lé shuî chûng mù, byu pé lé chyûnghuq tsing gàm byî ri.”a
ga, Chyúmdang má taî tô é nghut lhê. 9 Haû “dòq ló” gâ é lichyúm gi, myigùng é a‑o tsáng má le, Yhang gyó jé bê nghut lhê, gá nau é a nghut lhí? 10 Haû gyó lé é Sû gi, junghkang jungmó lé lhoqbyíng jùp râ matú, mauhkûng bànshoq é ahtoq má dòq ló é Sû yhang nghut lhê. 11 Yhang gi, ra-am lé, lagyô pé, ra-am lé, myìqhtoî pé, ra-am lé, gabú danglù hko kyo râ bang, ra-am lé, hpúng-ùp pé eq sará pé kut tsing byî to bê nghut ri. 12 Haú bang gi, Garai Gasâng é byu pé lé wùn wàq âng é múzó pê é matú, hen lajâng é bang nghut ri. Haú hkûn shèq, Hkrisidùq é gùngdu gi, 13 haû lùmjíng hkyô eq Garai Gasâng é Yhangzo lé sê é hkyô má, ngá-nhúng bànshoq bang rading ralhum za wó dùt mù, kô dìng bang dùt luî, Hkrisidùq é gúmjùp é isâm bànshoq lé wó yu é hkûn jé shoq, wó kô jàt nyì râ nghut lhê.
14 Haû mù, ngá-nhúng gi, wuìbaù pê èq hí shut htâng shut bàt myhû é su dùt é eq, byu pê é agè ashop é eq haq htung é mhoq hpyoq hpàqchyî pé eq mhoqshit hkyô laìdun hkangmó èq, shí shut hé shut mùt tâng é su dùt é lé hui zô é zoshâng wuì su a nghut lô é za, 15 chyitdàp myìt mai tengmán é dang lé taî nyì jáng, Hkrisidùq nghu é ulhum má hkyô hkangmó kô myhang lò râ nghut lhê. 16 Yhang dông mai, gùngdu gón gi, ralhum eq ralhum htuqbáng é gùngsho showui showang pé lé xoq byî to bê nghut mù, gùngsho showui showang haú pé gi, yhûmsing é múzó lé zui saî nyi é nghut jáng, gùngdu haû gi, chyitdàp myìt má, yhânggùng yhang kô lò myhang lò râ nghut lhê.
Byù Sik Dông Chyungxe Duì Râ Hkyô
17 Haû mù luî, haû Yhûmsing é ahko ahkáng mai ngò núngmòq lé taí nau é hkyô gi, haû tûngbaù pé gi, a-kyû a bo é lé myìt mù, chyungxe duì kô é su, núngmòq gi, hkâkut kó. 18 Yhángmòq gi, sê gyô é u-nuq chut byùq bekô nghut é eq yhángmòq myìt htan nyì kô é nghut mù, haî le a sé kô é yánmai, Garai Gasang byî é chyungxe eq wê gâng byùq bekô nghut ri. 19 Yhángmòq gi, gyùq hoq hkyô a bo byùq lo kô é yánmai, myòqnòq myìt dông a sansêng é hkyô jung hkangmó lé je wó kut xoq nyì shoq ga, yhûmsing gùng lé, gùngsho ô naù gadaú é hkyô má àp pyám bekô nghut ri.
20 Núngmòq kúm gi, Hkrisidùq é hkyô lé haú dông mhoq yû kô é a nghut. 21 Núngmòq gi, Yesuq chyáng mâ é tengmán hkyô dông, Yhâng é hkyô lé wó gyô wú é eq mhoq yu wú bekô nghut lhê. 22 Haû mù, núngmòq gi, hí hpyang lhê é núngmòq é nyì yàp sâmlai nghut é, ô naù gadaú luî, yhûmsing gùng yhûmsîng mhaû pyâm é dông htên byòq ló nyi é núngmòq é byù xau lé tô pyám râ matú mhoq yû bê eq rajung za, 23 núngmòq é i-myìt lé asik htaî pyám nhâng keq; 24 hau htoq agó, núngmòq gi, tengmán é eq sêng é díngmán hkyô eq chyoiyúng hkyô má, Garai Gasang eq dù shoq hpan to hui bê nghut é byù sik lé, yu wùt to keq.
25 Haû mù, ngá-nhúng bànshoq bang gi, gùngdu ralhûm é gùngsho showui showang pé chyat nghut é yánmai, núngmòq yùq hkangmó gi, mhaû é hkyô lé tô pyám luî, yhûmsing é chyáng nâm mâ é sû lé, tengmán é dang taí ra râ nghut lhê. 26 “Núngmòq nhikjum yô é hkûn, mara hkâkut kó.”b núngmòq gi, buì wàng shoq nhikjum hkâyô nyì kó. 27 Nàt Tsádán lé le, jowò hkâbyi kó. 28 Hkau sû gi, a dum hkau lo sháng gàq; râ nyi é bang lé, rajung jung wó gâm byi shoq, yhûmsing é lòq èq a-kyû bo é hkyô pé lé kut nyî luî, múzó zuî shi-kùt ra râ nghut lhê.
29 Núngmòq é nhut mai agè agaú é dang haî le hkâhtoq nhâng kó; wó gyô é bang a-kyû bò shoq, yhángmòq râ tô é má cháng luî, haú bang kô lam lò râ dang za taí keq. 30 Haû hkyi yù râ buìnyi é matú, dizìk dông núngmòq lé tap to byî é Garai Gasâng é Chyoiyúng Sô lé hkâ lhoqyón kó. 31 Haû myìt tot é, nhikjum yô é, nhik-yô é, byòq lhum byòq cheq é eq lùmù gànsang é, agè agaú é hkyô pé bànshoq lé, núngmòq tô pyám keq. 32 Núngmòq gi, rayùq eq rayùq, ge é hkyô eq shogyo nhikmyîn é hkyô tûn shit lhum luî, Garai Gasang gi, Hkrisidùq má, núngmòq lé mara hkyut byî é su, núngmòq yhangchang le mara hkyut byî lhûm nyì keq.