Tseyam Pé Má Bo É Sùtzè
4
Ngá-mòq gi, Garai Gasâng jeju mai múzó hkyô haû wó é nghut mù, myìt wum a gyuî é nghut lhê. 2 Ngá-mòq gi, zaú tô é eq hoq htoq é hkyô pé lé tô pyám luî, mhaú zô é hkyô le a kut, Garai Gasâng é mungdang lé le ahpuq alhik a kut é bang nghut lhê. Haû su kut râ malaî, ngá-mòq gi, haû tengmán hkyô lé san za lhoqhtoq shit é dông, Garai Gasâng é hí má yùq hkangmó é myìt sôn sê é hkyô má, yhûmsing gùng yhûmsîng htuk shoq nyi lhê. 3 Ngá-mòq é gabú danglù gi, myòqgo èq nghop pyâm é huî é nghut jáng, haû gi, htên byòq nyì bâng chyáng za nghop pyám huî é ru nghut lhê. 4 Haû Garai Gasâng é azòng isâm nghut sû, Hkrisidùq é hpungwup shingkang bo é gabú danglu é maubó lé, a lùmjíng bang a wó myâng kó sháng gàq ga, i-pyàt shi é garaia gi, yhángmòq é myìt lé lhoqchit byi bê nghut ri. 5 Haû nghut é yánmai, ngá-mòq gi, yhûmsing gùng eq séng luî hko kyô é a nghut é za, Yesuq Hkrisidùq gi, Yhûmsîng nghut é hkyô lé le, Yesuq é matú, ngá-mòq gùng yhang gi, núngmòq é jùn pé nghut é hkyô lé le, hko kyô é ru nghut lhê! 6 Hkâsu mù gâ le, “Mauchut hkaû mai maubó htoq lô sháng gàq.”b ga taî é Garai Gasang gi, Yesuq Hkrisidùq é myòqdong mâ é Garai Gasâng é hpungwup shingkâng é maubó lé sê gyô é u-nuq lé, ngá-nhúng lé byî é dông, Yhâng é maubó lé, ngá-nhûng é i‑myìt ûnghkaû má dùq bó nhâng bê nghut ri.7 Nghut kôlhang, ngá-mòq gi, sùtzè haû bo é tseyam péc nghut nyi lhê. Haû gi, gyaú dik é a-tsam mó gi, ngá-mòq chyáng mâ é a nghut é za Garai Gasâng chyáng mâ é nghut é hkyô lé tûn shit râ matú nghut lhê. 8 Ngá-mòq gi, wuîhke hkyo èq lhînghkyùq mai gyai yhang nhê zìk é hui kôlhang, a gyòp byùq é nghut lhê; myìt lhoqnhûng pyâm é hui kôlhang, myìt a htûm byùq é nghut lhê; 9 zing-rî é hui kôlhang, kâng pyám huî é a nghut; bàt lhêng pyâm é hui kôlhang, htên byòq huî é a nghut. 10 Haû Yesuq é chyungxe duì hkyô le, ngá-mòq é gùngdu má lhoqhtoq shit é hui sháng gàq nghû, ngá-mòq gi, Yesuq shi é hkyô lé, hkâ-nhám le, ngá-mòq é gùngdu má wùn wàq wún é nghut lhê. 11 Hkâsu mù gâ le, Yesuq é chyungxe duì hkyô gi, ngá-nhûng é shî sê é gùngdu má lhoqhtoq shit é hui sháng gàq nghû, chyungxe dui nyi é bang ngá-mòq gi, Yesuq é matû é yánmai, hkâ-nhám le, shi byùq hkyô shut àp pyâm é huî nyi ri. 12 Haû mù luî, shi byùq hkyô gi, ngá-mòq má mû zuî nyi ri; chyungxe duì hkyô kúm gi, núngmòq má mû zuî nyi é nghut ri.
13 “Ngò gi, lùmjíng bê nghut lhê, haû mù, ngò taî é nghut lhê.”d ga kâ tô é eq rajung za, ngá-mòq le, lùmjíng hkyô hau èq yhang, lùmjíng bê nghut mù taî é nghut lhê. 14 Haî mù gâ le, haû Yhûmsîng Yesuq lé shi é mai lhoqdui toq é Sû gi, ngá-mòq lé le, Yesuq eq rahá lhoqdui toq mù, núngmòq eq rahá, ngá-mòq lé Yhâng é hí má shuî jé râ nghut é lé, ngá-mòq sê lhê. 15 Haû jeju wó é byu pé gi, je riyhang myô jàt lò mù, Garai Gasâng é hpungwup shingkâng é matú, jeju hkya-ôn é hkyô gi, byíng mui nyì sháng gàq ga, haú pé bànshoq gi, núngmòq é a-kyu é matú nghut nyi ri.
16 Haû mù luî, ngá-mòq gi, myìt wum a gyuî é nghut lhê. Ngá-mòq é shinggan gùngdu gi, htên byòq ló nyî kôlhang, i‑myìt ûnghkaû gi, ra-nyí eq ra-nyí asik dùt nhang é huî nyi ri. 17 Hkâsu mù gâ le, ngá-mòq é tiq é eq razùp zâ é wuîhke hkyô pé gi, ngá-mòq é matú haú pê htoq gyai hkìk é ahtum abyùq é hpungwup shingkang lé, wó yû nhang ri. 18 Haû mù, ngá-nhûng é myòq gi, byu-myang é lé wú tsuq nyi é a nghut é za, a byu-myang é lé shèq wú tsuq nyi é ru nghut lhê. Hkâsu mù gâ le, byu-myang é gi, razùp rahtâng zâ é nghut mù, a byu-myang é kúm gi, ahtum abyùq é nghut lhê.