Mauhkûng Htoq Mâ É Yhûm
5
Haû myìdàm zúm nghut é ngá-nhúng lúng nyi é gùngdu gi, htên byòq sê é nghut kôlhang, byu lòq èq saî é a nghut é za, mauhkûng htoq má jòq é ahtum abyùq é yhûma nghut é, Garai Gasâng chyáng mâ é yhûm lé, ngá-nhúng wó é hkyô lé, ngá-nhúng sê lhê. 2 Nghut kôlhang, ahkuî, ngá-nhúng gi, ngá-nhûng é mauhkûng yhûm lé tû hut byî é lé gyai yhang hui naû mù, nò-kying su kyîng nyi lhê. 3 Haî mù gâ le, ngá-nhúng gi, hut byî é hui jáng, gùngdu a bò bang a dùt lo râ nghut lhê. 4 Hkâsu mù gâ le, ngá-nhúng gi, zúm shî má lúng nyi é u lé, wòlai wùn mù, nò-kying su kyîng nyi lhê; haû gi, shi byùq sê é lé, chyungxe dui é èq wó htaî lhik pyám sháng gàq nghû, ngá-nhúng gi, a hut byî é hui râ lé a ô nau é za, ngá-nhûng é mauhkûng yhûm lé tû hut byî é hui râ lé ô nau é yánmai nghut lhê. 5 Ahkuî kúm, jeju haû hkam yù râ matú, ngá-nhúng lé lajâng to byî é sû gi, Garai Gasang nghut mù, jé lô râ hkyô gi, hkyak jòq lhê nghu é masàt zè dông, ngá-nhúng lé haû Sô byi bê nghut ri.6 Haû mù luî, ngá-mòq gi, hkâ-nhám le hkyak lum tô lhê. Gùngdu shî má yhûm dông ru lúng nyî nyî gi, haû Yhûmsîng eq wê gâng nyi ashî nghut é lé ngá-mòq sê nyi lhê. 7 Ngá-mòq gi, byu-myang é dông mai a nghut é za, lùmjíng myìt mai chyungxe dui é ru nghut lhê. 8 Ngá-mòq gi, hkyak myìt lum tô lhê nghû, ngò taî lhê, haû mù, gùngdu shî mai wê gang luî, haû Yhûmsîng eq rahá nyì râ lé ngá-mòq je riyhang ô nau é nghut lhê. 9 Haû mù, ngá-mòq gi, gùngdu shî má yhûm dông lúng nyi é nghut nghut, haû mai wê gâng é nghut nghut, ngá-mòq myìt myòqbyu tô é jowò gi, Yhang lé gabú nhâng râ matú nghut lhê. 10 Hkâsu mù gâ le, yùq hkangmó gi, gùngdu shî má yhûm dông lúng nyi é u lé, ge é nghut nghut, a ge é nghut nghut, kut é eq rajung za hkam yù râ matú, Hkrisidùq é târâ jéyáng tánghkuq hí má, ngá-nhúng bànshoq bang htoq shit ra râ nghut lhê.
Nguì ngón Hkyô Xoq É Múzó
11 Haû mù, Yhûmsîng lé gyùq hkúngga râ hkyô haî nghut é lé ngá-mòq sê é nghut luî, ngá-mòq gi, byu pé lé taî pûn kyîng shi-kùt lhê. Ngá-mòq haî nghut é gi, Garai Gasâng chyáng san za nghut nyî mù, núngmòq é myìt sôn sê é hkyô má le san za nghut râ lé, ngò myìt lum lhê. 12 Haû myìt nhiklhum má bo é lé nghutbun râ malaî, byu-myang é lé nghutbûn é bang lé, núngmòq wó tû taí kó sháng gàq nghû, ngá-mòq gi, núngmòq chyáng yhûmsing gùng lé dum owaq shi-kùt é a nghut é za, ngá-mòq é hkyô lé, núngmòq wó nghutbun râ ahkáng, núngmòq lé byî é ru nghut lhê. 13 Ngá-mòq a gyîng é dông nghut le gi, Garai Gasâng é matú a gyîng é nghut lhê; ngá-mòq gyîng é dông nghut le gi, núngmòq é matú gyîng é nghut lhê. 14 Hkâsu mù gâ le, Hkrisidùq é chyitdàp myìt èq ngá-mòq lé kut nhang nyi é nghut lhê. Haû gi, bànshoq bâng é matú rayùq shî hkám byi bê nghut mù, bànshoq bang shi é dông nghut bê nghû, ngá-mòq hkyak sê gyô é yánmai nghut lhê. 15 Yhang gi, chyungxe dui nyi é bang, yhángmòq yhûmsing gung é matú a duì lô é za, yhángmòq é matú shî hkám byi luî, lhoqdui toq é huí Su é matú duì kó sháng gàq ga, bànshoq bâng é matú shî hkám byi bê nghut ri.
16 Haû mù, ngá-mòq gi, ahkuî mai, ó yùq eq séng luî le, mingkan hkyam dông mai a wú lô é nghut lhê. Ngá-mòq gi, hí hkûn Hkrisidùq lé haú dông wú é nghut kôlhang, haû su hkâ-nhám le a kut lô é nghut lhê. 17 Haû nghut mù luî, rayùq yùq gi, Hkrisidùq má nghut nyi é nghut jáng, yhang gi, asik hpân hui sû dùt bê nghut ri; haû axau gi, byùq byùq mù, lhúnglháng asik dùt bu‑nhung! 18 Haú pé bànshoq gi, Garai Gasâng chyáng mâ é chyat nghut lhê. Yhang gi, Hkrisidùq dông mai ngá-nhúng lé Yhânggùng eq nguì ngón hkyô xoq yû luî, nguì ngón hkyô xoq é múzó ngá-mòq lé byi bê nghut ri. 19 Haû gi, Garai Gasang gi, byu pê é mara lé a xûm to byî é za, Hkrisidùq dông mingkan lé Yhânggùng eq nguì ngón hkyô xoq yû bê nghut luî, Yhang gi, nguì ngón hkyô xoq yu é mungdang haû lé, ngá-mòq lé àp byî to bê nghû nau é nghut lhê. 20 Haû mù luî, ngá-mòq gi, Hkrisidùq é gùnglik pé nghut lhê mù, Garai Gasang gi, ngá-mòq dông mai núngmòq lé lhoqpûn kyîng nyi é nghut lhê. Garai Gasang eq nguì ngón hkyô xoq yû keq nghû, ngá-mòq gi, Hkrisidùq é gùnglik dông núngmòq lé dûng tôngbán nyi lhê. 21 Ngá-nhúng gi, Hkrisidùq dông mai Garai Gasâng é díngmán bang wó dùt kó sháng gàq ga, Garai Gasang gi, yubàk mara a bò Sû lé, ngá-nhûng é matú mara hkyut hkungga dùt nhâng bê nghut ri.