3
Ngá-mòq gi, yhûmsing gùng yhûmsîng dum owaq hi ló é nghut lhê lhú? Byù ra-am kut é su, núngmòq chyáng, ngá-mòq é matú htuqlùq htuqbáng laiká ká byi kô é ngá-mòq ra râ lùq, núngmòq yuq ngá-mòq é matú ká byi ra kôrâ lùq? 2 Núngmòq gùng yhang gi, ngá-mòq é myìt nhiklhum má kâ tô é, yùq hkangmó èq nghap luî sê yu é laiká gûng pé nghut akô. 3 Núngmòq gi, núngmòq chyáng ngá-mòq hpúngmû wùn wàq é yánmai, Hkrisidùq chyáng mâ é laiká nghut kô é hkyô lé shit nyi akô. Haû gi, kâ jung chî èq kâ tô é dông a nghut é za, rû dui nyi é Garai Gasâng é So èq kâ tô é nghut é htoq agó, lùqlong pé má kâ tô é dông a nghut é za, xângzo byu é myìt nhiklhum long pé má kâ tô é ru nghut lhê.4 Haû su nghû hkyak wó myìt lum é hkyô gi, Garai Gasâng é hí má, Hkrisidùq dông mai ngá-mòq wó yu é nghut lhê. 5 Ngá-mòq gi, yhûmsing gùng haî lé le wó kut lhê nghu é a nghut, ngá-mòq é a-tsam gi, Garai Gasâng chyáng mai lo é nghut lhê. 6 Yhang gi, ngá-mòq lé, dangshikaq asik lé wó wùn wàq râ a-tsam byi bê nghut ri. Dangshikaq asik haû gi, târâ laiká mai lo é a nghut é za, Sô mai lo é ru nghut lhê. Hkâsu mù gâ le, laiká gi, shî dàm byî lhê, Sô kúm gi, chyungxe byî é nghut lhê.
Dangshikaq Asik É Hpungwup Shingkang
7 Ahkuî, haû Mosheq é myòqdong mâ é hpungwup shingkâng é yánmai, haû Isira-elaq byu pé gi, yhâng é myòqdong lé a wó wú tsuq to kó nghut ri. Hpungwup shingkang haû shûm ló byùq sê é nghut kôlhang, lùqlong má dòk kâ tô é, shî‑nò hkyô lhoqhtoq é târâ múzó gi, hpungwup shingkang eq rahá jé lé é nghut lhê. 8 Haû su nghut jáng, haû So é múzó gi, hpungwup shingkang je riyhang dùt râ a nghut kó lhú? 9 Gè gè yhang, haû byù lé mara byî é târâ múzó lháng, hpungwup shingkang bo é nghut le gi, díngmán nhang é hkyô sik gi, je riyhang hpungwup shingkang bo é nghut lhê ô! 10 Hkâsu mù gâ le, hpungwup shingkang bo é târâ múzó gi, hpungwup shingkang je bo é dangshikaq asik eq whuî é hkûn, hpungwup shingkang a bò lo dùt byùq bê nghut ri. 11 Shum byùq ló é târâ lháng gi, hpungwup shingkang eq rahá lé jé bê nghut le gi, ru gîng nyi é dangshikaq asik é hpungwup shingkang gi, je riyhang gyaú râ nghut lhê ô!
12 Haû mù luî, ngá-mòq gi, haû sû é myòqbyù hkyô wó é yánmai, gyùq kyûm myìt a bo é hkyô shit é nghut lhê. 13 Ngá-mòq gi, Mosheq su a nghut. Yhang gi, dùq bang é hkyô shûm byùq ló é hkûn, haû Isira-elaq byu pé haú lé a wú tsuq râ matú, yhâng é myòqdong lé myòqgo èq nghop pyâm é sû nghut ri. 14 Nghut kôlhang, yhángmòq é myìt gi, lhoqchut byî é hui bekô nghut ri; hkâsu mù gâ le, hkû-nyí jé shoq, dangshikaq axau lé nghap é hkûn, rajung zâ é myòqgò gi, ru nghop to byî ashî nghut ri. Haû gi, huî sêng pyâm é a hui shi, haî mù gâ le, Hkrisidùq dông za haû lé wó yu pyâm é nghut lhê. 15 Hkû-nyí jé shoq lháng, Mosheq é laiká lé nghap é hkûn, yhángmòq é myìt nhiklhum má myòqgo èq nghop tô é nghut ri. 16 Nghut kôlhang, ó yùq le, Yhûmsing chyáng hká u lhing lò kôlhang, haú hkûn jáng, myòqgò gi, hî pyám byî é hui râ nghut lhê. 17 Yhûmsîng gi, haû Sô nghut mù, Yhûmsing é Sô nyi é jowò má, lùthkyô le jòq lhê. 18 Haû Yhûmsing é hpungwup shingkang lé lhoqhtoq shit é bang bànshoq nghut é myòqdong má myòqgò a nghop é bang ngá-nhúng gi, ru myô jàt nyi é hpungwup shingkang lhoqhtoq byi hkyô nghut é, Yhâng é isâm shut htaî lhik wang é huî nyì bê nghut lhê. Haú hkyô gi, haû Sô nghut sû Yhûmsing chyáng mai lo é nghut lhê.